ಮೌಸ್ ಬಳಸಿ ಬರೆದದ್ದು !

ರೊದ್ದ ಶ್ರೀನಿವಾಸರಾಯರು (1850-1929)
ಹುಟ್ಟಿದ್ದು  ಧಾರವಾಡದಲ್ಲಿ . ಬಡತನದಿಂದಾಗಿ ಹೆಚ್ಚಿನ ಶಿಕ್ಷಣ ಪಡೆಯಲಾಗದೆ ಹುಬ್ಬಳ್ಳಿಯಲ್ಲಿ ಶಿಕ್ಷಕನಾಗಿ ಕೆಲಸಕ್ಕೆ ಸೇರಿದರು. ಕೆಲಕಾಲದ ನಂತರ  ರೆವಿನ್ಯೂ ಖಾತೆಯಲ್ಲಿ ಕೆಲಸಮಾಡಿ ವಿದ್ಯಾಖಾತೆಯನ್ನು ಸೇರಿದರು. ಅನೇಕ ಹೈಸ್ಕೂಲುಗಳಲ್ಲಿ ದುಡಿದ ನಂತರ 1878ರಲ್ಲಿ ಅಸಿಸ್ಟೆಂಟ್ ಡೆಪ್ಯುಟಿ ಕಮೀಷನರ್ ಆದರು. ನಂತರ ಡೆಪ್ಯುಟಿ ಕಮೀಷನರ್ ಆದರು. 1989ರಲ್ಲಿ   ಟ್ರೇನಿಂಗ್ ಕಾಲೇಜಿನ ಪ್ರಿನ್ಸಿಪಾಲರಾದರು. 1908ರಲ್ಲಿ ನಿವೃತ್ತರಾದರು. ಶಿಕ್ಷಣಕ್ಷೇತ್ರದಲ್ಲಿ ಅವರ ಸೇವೆಗಾಗಿ ಆಗಿನ ಬ್ರಿಟಿಷ್ ಸರಕಾರವು ಅವರನ್ನು   'ರಾವ್ ಬಹದ್ದೂರ್ ' ಪದವಿಯನ್ನು ಕೊಟ್ಟು ಗೌರವಿಸಿತು. ತಮ್ಮ ನೌಕರಿಯ ಅವಧಿಯಲ್ಲಿ ಯೇಮಿತ್ರಸಮಾಜದ ಸ್ಥಾಪನೆಗಾಗಿ ದುಡಿದರು, ಕ್ಷಾಮನಿವಾರಕ ಸಂಘದ ಕಾರ್ಯದರ್ಶಿಯಾಗಿ ಕೆಲಸ ಮಾಡಿದರು, ಧಾರವಾಡ ನಗರಸಭೆಯ ಸದಸ್ಯರಾಗಿ ಸೇವೆ ಸಲ್ಲಿಸಿದರು.

ನಿವೃತ್ತಿಯ ನಂತರ ತಮ್ಮನ್ನು ಸಂಪೂರ್ಣವಾಗಿ  ಸಮಾಜಸೇವೆಗೇ ಒಪ್ಪಿಸಿಕೊಂಡರು. 1908ರಲ್ಲಿ   ಬಾಂಬೆ   ಲೆಜಿಸ್ಲೇಟಿವ್ ಕೌನ್ಸಿಲ್ಲಿಗೆ ಆರಿಸಿ  ಬಂದರು. ಮೂರು ಚುನಾವಣೆಗಳಲ್ಲಿ ಗೆದ್ದು  ಆರು ವರ್ಷ ಈ ಸಭೆಯ ಸದಸ್ಯರಾಗಿದ್ದರು. ಅಲ್ಲಿ ಅವರು ಮಾಡಿದ ಅತ್ಯಂತ ಮಹತ್ವದ ಕೆಲಸವೆಂದರೆ ಧಾರವಾಡದಲ್ಲಿ ಕರ್ನಾಟಕ ಕಾಲೇಜಿನ ಪ್ರತಿಪಾದನೆ. ಕಾಲೇಜು ಸ್ಥಾಪನೆಗೆ  ಕರ್ನಾಟಕದಜನತೆ ಎರಡು ಲಕ್ಷ ರೂಪಾಯಿಗಳನ್ನು ನಿರ್ದಿಷ್ಟ ತಾರೀಕಿನ ಒಳಗೆ ಕೊಡಬೇಕೆಂಬ ಕರಾರನ್ನು ಸರಕಾರವು ಹಾಕಿತ್ತು. ರಾಯರು ಮತ್ತು ರಾವ್ ಬಹದ್ದೂರ ಅರಟಾಳವರು ಈ ಕರಾರನ್ನು ಪೂರೈಸಿದರು. 1917ರ ಜೂನ್ ನಲ್ಲಿ ಕಾಲೇಜಿನ ಸ್ಥಾಪನೆಯೊಂದಿಗೆ ಕರ್ನಾಟಕದ ಬಹು ದಿನಗಳ ಕನಸು ನನಸಾಯಿತು. ಹುಬ್ಬಳ್ಳಿ ಕಾರವಾರ ರೈಲುಮಾರ್ಗಕ್ಕಾಗಿ ಯೂ   ಪ್ರಯತ್ನಿಸಿದರು. ಸಾಹಿತ್ಯದಲ್ಲಿ ಅವರಿಗೆ ವಿಶೇಷ ಆಸಕ್ತಿಯಿತ್ತು. ಕೆಲವು ಅನುವಾದಗಳನ್ನೂ ಮಾಡಿದರು. ಕರ್ನಾಟಕ  ವಿದ್ಯಾವರ್ಧಕ ಸಂಘವನ್ನು ಕಟ್ಟುವಲ್ಲಿ   ಅವರು ಮಹತ್ವದ ಪಾತ್ರ ವಹಿಸಿದರು. ಕರ್ನಾಟಕದ ಏಕೀಕರಣದ ಬಗ್ಗೆ ಕಳಕಳಿಯನ್ನು ಹೊಂದಿದ್ದರು. ಬಳ್ಳಾರಿ ಸಾಹಿತ್ಯ ಸಮ್ಮೇಳನಕ್ಕೆ ಅಧ್ಯಕ್ಷರನ್ನಾಗಿ ಅವರನ್ನು ಆರಿಸಲಾಗಿತ್ತು.

 ಈ  ಮೇಲಿನ ಭಾಗವನ್ನು ಡ್ಯಾಶರ್  ಬಳಸಿ ಬರೆದದ್ದು !  ಕೀ ಬೋರ್ಡ್ ಬಳಸದೇ  ಮೌಸ್  ಮೇಲೆ ಕೆಳಗೆ ಸರಿಸುತ್ತಿರುವಂತೆ  ಎದುರು ಬರುವ  ಅಕ್ಷರಗಳನ್ನು  ಆಯ್ದುಕೊಳ್ಳುತ್ತ  ಹೋದೆ. ನಾವು ಆಗಾಗ ಬಳಸುವ ಶಬ್ದಗಳು  ತಾನೇ ತಾನಾಗಿ ಅಕ್ಷರಗಳ ಗುಂಪಾಗಿ ಕಾಣಿಸಿಕೊಳ್ಳುತ್ತ ಹೋಗುತ್ತವೆ. ಸೆಲ್ಫ್ -ಲರ್ನಿಂಗ್  ತಂತ್ರಾಂಶ ಇದು . ಅನುಸ್ವಾರ ಕ್ಕೆ  ಅಕ್ಷರ ಕಾಣದೆ '೦' ಅಂಕೆಯನ್ನು  ಬಳಸಿ ಆಮೇಲೆ ಎಲ್ಲೆಡೆ-ಬದಲವಣೆ (ಗ್ಲೋಬಲ್ ಚೇಂಜ್ ) ಮಾಡಿಕೊಂಡು  ಸಾಗುತ್ತಿರುವೆ . ನೀವೂ  ಡ್ಯಾಶರ್  ಬಳಸಿ ನೋಡಿ .