" ವಸಂತದ ನಿರೀಕ್ಷೆ "

ರಕ್ತದ ಕಣ ಕಣಗಳನು
ಥರ ಥರಗುಟ್ಟಿಸುವ
ಶಿಶಿರದ ಮೈಕೊರೆವ ಚಳಿ

ಎಲೆಯುದುರಿಸಿ ನಿಂತ
ತರುಲತೆ ಸಮೂಹ
ಮರಗಳ ಸುತ್ತೆಲ್ಲ ಹಬ್ಬಿ
ಹರಡಿದ 'ದರಗುಗಳ ರಾಶಿ'
ಹೊತ್ತಿ ಉರಯಲು ಸಾಕು
ಒಂದು 'ಕಿಡಿ ಸಂಪರ್ಕ'

ಬಿರು ಬಿಸಿಲು ಕಂಗೆಟ್ಟ ಹಕ್ಕಿ
ಹಾಡುತಿದೆ 'ವಿಷಾದ ಗೀತೆ'
ಬಳಲಿ ಬೆಂಟಾಗಿ ಬಸವಳಿದ
ಪಶು ಪಕ್ಷಿ ಗಣ
ಎದೆಯಾಳದಲಿ
'ಸಂತಸದ ಚಿಲುಮೆ'
ವಸಂತನಾಗಮನದ ನಿರೀಕ್ಷೆಯಲ್ಲಿ

ಸೊಕ್ಕಿದ ಕಾಮದ
ಉಲ್ಲಾಸದ ಮಾರ
ಬೀಸುವ ಮಂದಾನಿಲದಿ
ತೇಲಿ ಬರುತಿಹ
ರತಿಯ ಬೆರಗು  ಕೇಳಿ
ಬರುತಿಹ 'ನಲ್ಮಾತುಗಳು'
ಆಕೆಯ ಬೆಡಗು ಬಿನ್ನಾಣಕ್ಕೆ
ಮರುಳಾದ
ಸುಕುಮಾರ 'ಮಾರ'

ಮನದ ಪರದೆಯ ಮೇಲ್ಸುಳಿವ
ಕಳೆದ ವಸಂತದಲಿ ಕಳೆದ
ಸುಂದರ 'ಮಿಲನದ ಕ್ಷಣಗಳು'
ದೀರ್ಘ ಕಾಲದ ವಿರಹ
ಕಳೆದದ್ದೆ ಆ ಗತ
'ಮಧುರ ನೆನಪುಗಳಲಿ'

ಪ್ರಣಯಿಗಳ ಸಲ್ಲಾಪ
ಕಳೆದ ಒಂದೊಂದು ಕ್ಷಣ
ಆಡಿದೊಂದೊಂದು ಮಾತು
ಯಾವುದೂ ವ್ಯರ್ಥವಲ್ಲ
ಪ್ರೇಮ ಸಂಬಂಧಗಳಲ್ಲಿ
ರತಿಯ ಹೊಳೆವ ಕಣ್ಣುಗಳು
ಭಾವವರಸಿ ಕನಸಲಿ ತನ್ಮಯ
ಮದನಿಕೆಯ ಕನವರಿಕೆ
ಗಾಳಿಯಲಿ 'ತೊನೆವ ನಾಗರ'

ಯಕ್ಷಿಣಿಯ ಆಗಮನಕೆ
ಕಾದು ಹೈರಾಣವಾಗಿಹ ಯಕ್ಷ
ವಿರಹಿಣಿಯ ಹೃದಯದಲಿ
ಅದೆಷ್ಟು ಭಾವಗಳು?
ಶಬ್ದಗಳ ರೂಪದಲಿ
ಹೊರ ಬರಲು ಕಾದಿವೆ
ನಲ್ನುಡಿಯ ಕೇಳಿಕೆಗೆ
'ಕಿವಿಗಳ ಕಾತರ'

ವಿರಹಿಣಿಗೆ ದುಗುಡಗಳಿವೆ
ಕಲಹಗಳಿವೆ ಆಕ್ಷೇಪಗಳಿವೆ
ಮೌನ ಸಂಧಾನಗಳಿವೆ
ಎಷ್ಟೆಲ್ಲ ವಿಷಯಗಳಿವೆ
ವಸಂತದಲಿ ವಿನಿಮಯಕೆ

ಬರಲಿರುವ ವಸಂತದಲಿ
ಯಕ್ಷ ಯಕ್ಷಿಣಿಯರು
ಎದುರು ಬದುರಲಿ ಕೂತು
ಮನ ಬಿಚ್ಚಿ
ರಾಗ ದ್ವೇಷಾಸೂಯೆಗಳ
ಹಂಚಿ ಕೊಳಲಿದ್ದಾರೆ

ಅಮರ ಪ್ರೇಮದ ಬಂಧ
ಗಟ್ಟಿ ಗೊಳಿಸಲಿದ್ದಾರೆ
ವಸಂತದಲಿ ವಿಹರಿಸಿ
ವಿರಹಕೆ ವಿದಾಯ ಹೇಳಿ
ಮತ್ತೆ ವ್ಯಾಪಿಸಲಿಹರು
ಮುಂಬರುವ ವಸಂತಗಳಲ್ಲಿ
ಜಗದ ತುಂಬ ಹೃದಯ ತುಂಬಿ

            *