ಸೆಕೆ ಸೆಕೆ ತಾಳೆನು ಈ ಸೆಕೆಯಾ..

ಬೇಸಿಗೆ ರಜಾ ಬಂತೆಂದರೆ ನಾಸ್ಟಾ, ಊಟ, ನಿದ್ರೆಗೆ ಮಾತ್ರ ಮನೆಯಲ್ಲಿ ಅಟೆಂಡೆನ್ಸ್ ಕೊಟ್ಟು, ಉಳಿದಂತೆ ಆಟದ ಮೈದಾನದಲ್ಲೇ ನನ್ನ ಮತ್ತು ಗೆಳೆಯರ ವಾಸ್ತವ್ಯ--ಅಂದ ಕಾಲತ್ತಿಲ್ಲ್ :)
ಸಂಜೆ ಸುತ್ತುಮುತ್ತಲಿನ ಗೇರು,ಮಾವು, ನೇರಳೆ, ನಾಣಿಲೆ ಮರಗಳಿಗೆ ಧಾಳಿ ಮಾಡಿ, ಹೊಟ್ಟೆ ತುಂಬಿಸಿ, ಸಮೀಪದ ಲೈಬ್ರೇರಿಗೆ ನುಗ್ಗಿ, ಅಲ್ಲಿನ ಬಾಗಿಲು ಮುಚ್ಚುವವರೆಗೆ ಕಾರ್ಟೂನ್ ಇತ್ಯಾದಿ ಪುಸ್ತಕ ಓದಿ, ನಂತರ ಮನೆಗೆ ಹಿಂತಿರುಗುತ್ತಿದ್ದೆವು.
ಅದೇ ದಕ್ಷಿಣ ಕನ್ನಡದ ಮಂಗಳೂರಿಗೆ ಈಗ್ಗೆ ಒಂದು ಹದಿನೈದು ದಿನ ಮೊದಲು ಹೋಗಿದ್ದೆ.....ಸಮಾರಂಭವೊಂದಕ್ಕೆ. ಪರಿಚಿತರನ್ನು ಹುಡುಕಿ ಮಾತನಾಡಿಸುವ ಮೊದಲು ಮೇಲೆ ನೋಡುತ್ತಿದ್ದೆ. ನಾನು ಮಾತ್ರವಲ್ಲ- ಪ್ರತಿಯೊಬ್ಬರೂ! ಎಲ್ಲಿ fan ಇದೆಯೋ, ಅದರಡಿಯಲ್ಲೇ ಎಲ್ಲಾ ಒಟ್ಟಾಗಿ ಮಾತುಕತೆ. ಮಾತುಕತೆಯ ಪ್ರಾರಂಭ ಅಥವಾ ಕೊನೆಗೆ "ಸೆಕೆ" ವಿಷಯ ಬಂದೇ ಬರುವುದು. Fan ಅಡಿಯಲ್ಲಿ ಬೆವರಿಕೊಂಡೇ ಬಿಸಿ ಬಿಸಿ ಊಟ ಮುಗಿಸಿ ಹೊರಟು ಬಂದೆ. ಕಾವಲಿಯಿಂದ ಬೆಂಕಿಗೆ ಬಿದ್ದ ಹಾಗೇ ಆಯಿತು. ಪುಣ್ಯಾತ್ಮರು, ಒಂದೇ ಒಂದು ಮರನೂ ರಸ್ತೆಯಲ್ಲಿ ಉಳಿಯಲು ಬಿಟ್ಟಿಲ್ಲ. ಬೇರೆ ಸುತ್ತಾಟ, ನೆಂಟರ ಮನೆಗೆ ಹೋಗುವುದು, ಎಲ್ಲಾ ಕ್ಯಾನ್ಸಲ್ ಮಾಡಿ, ರಿಕ್ಷಾ ಹತ್ತಿ, ಜ್ಯೋತಿ ಟಾಕೀಸ್ ಬಸ್ ಸ್ಟಾಪ್‌ಗೆ ಬಂದೆ. ಒದ್ದೆ ಕರ್ಚೀಪನ್ನು ಹಿಂಡಿ ಹಿಂಡಿ ಮುಖ ಒರೆಸುತ್ತಿದ್ದಾಗ, ಬೆಂಗಳೂರಿಗೆ ಹೋಗುವ ವೊಲ್ವೋ ಬಸ್ ಬರುತ್ತಿರುವುದು ಕಾಣಿಸಿತು. ಸುತ್ತಮುತ್ತ ಯಾರು ಇಲ್ಲದಿರುತ್ತಿದ್ದರೆ ಖುಷಿಯಲ್ಲಿ ಡ್ಯಾನ್ಸ್ ಮಾಡುತ್ತಿದ್ದೆ..  ಬಸ್ ಹತ್ತಿ (ಬಸ್ಸಲ್ಲಿ ೧೦-೧೨ ಮಂದಿ ಇದ್ದರು ಅಷ್ಟೆ) ಅಕ್ಕಪಕ್ಕದ ಸೀಟಿನ ಎಸಿಯನ್ನೆಲ್ಲಾ ನನ್ನ ಕಡೆಗೆ ತಿರುಗಿಸಿ, ಕಂಡಕ್ಟರ್ ಕೊಟ್ಟ ಮಿನರಲ್ ವಾಟರ್ ಗಟಗಟ ಕುಡಿದು, ಕಾಲು ನೀಡಿ, ಹಾಯಾಗಿ ಮಲಗಿದೆ. ಎಚ್ಚರವಾದಾಗ ಬೆಂಗಳೂರಲ್ಲಿದ್ದೆ- ಇಲ್ಲಿನ ಹವೆ ಹಾಯೆನಿಸಿತು.:) ಇನ್ನು ಮುಂದೆ ಎಪ್ರಿಲ್ ಮೇ ತಿಂಗಳಲ್ಲಿ ಮಂಗಳೂರು ಕಡೆ ಹೋಗಲೇ ಬಾರದು ಅಂತ ತೀರ್ಮಾನಿಸಿದೆ.
ಏನು ಮಾಡಲಿ? ಕಳೆದ ವಾರ ಪುನಃ ಒಂದು ಪಂಕ್ಷನ್‌ಗೆ ಊರಿಗೆ ಹೋಗಲೇ ಬೇಕಾಗಿ ಬಂತು. ಈ ಸಲ ನಾನು ಪೂರ್ತಿ ತಯಾರಿಯೊಂದಿಗೇ ಹೋಗಿದ್ದೆ. ಬಿಳಿ ಪಂಚೆ ಉಟ್ಟುಕೊಂಡು, ಮೈಮೇಲೆ ಒದ್ದೆ ಮಾಡಿದ ಖಾವಿ ಬಟ್ಟೆ ಹೊದೆದುಕೊಂಡು, ಕಪ್ಪು ಕೊಡೆಯಡಿಯಲ್ಲಿ ಬರುತ್ತಿದ್ದುದನ್ನು ಕಂಡ "ಸೂರ್ಯ" ಥಂಡಾ! "ಏನ್ರೀ ಗಣೇಶರೆ? ಹೊಸ ಅವತಾರ?" ಎಂದು ಪರಿಚಿತರು ಹಾಸ್ಯ ಮಾಡಿದರು. ಮಾಡಲಿ ಬಿಡಿ. ಈ ಅವತಾರದಿಂದಾಗಿ ಬೇಗನೇ ಬೆಂಗಳೂರಿಗೆ ಹಿಂದಿರುಗುವ ಯೋಚನೆ ಬಿಟ್ಟು ಸುತ್ತಾಡಲು ಆಯಿತು.
 ನಾನು ಬಾಲ್ಯದಲ್ಲಿ ೫-೬ ಬಾರಿ ಹತ್ತಿಳಿದಿರುವ "ಜಮಲಾಬಾದ್ ಕೋಟೆ"ಯನ್ನು ನನ್ನ ಮನೆಯವರಿಗೆ ( ಜತೆಗೆ ಸಂಪದ ಮಿತ್ರರಿಗೂ) ತೋರಿಸಬೇಕೆಂದಿದ್ದೆ. ಮಂಗಳೂರಿಂದ ಧರ್ಮಸ್ಥಳಕ್ಕೆ ಹೋಗುವ ದಾರಿಯಲ್ಲಿ, ಬೆಳ್ತಂಗಡಿ ಸೇತುವೆ ದಾಟಿದ ನಂತರ,  ಎಡಕ್ಕೆ ಎರಡು ಕಿ.ಮೀ. ಹೋದರೆ ಸಿಗುವುದು. ಈ ಗಡಾಯಿ ಕಲ್ಲು(ಜಮಲಾಬಾದ್ ಕೋಟೆ) ನೋಡಲು ಎರಡು ಕಣ್ಣು ಸಾಲದು. ಸುಂದರ್ ಅತೀ ಸುಂದರ್. ನಾನಂತೂ ಹತ್ತಲು ಆಗಲೇ ರೆಡಿಯಾಗಿದ್ದೆ. ಜತೆಯಲ್ಲಿದ್ದವರು ಈ ಬಿಸಿಲಿಗೆ ಬೇಡ, ಮುಂದಿನ ಅಕ್ಟೋಬರ್ ರಜೆಯಲ್ಲಿ ಖಂಡಿತಾ ಹೋಗೋಣ ಎಂದು ಭರವಸೆ ನೀಡಿದ್ದರಿಂದ ಹಿಂದೆ ಬಂದೆ.
ಧರ್ಮಸ್ಥಳ, ಮಂಗಳೂರು ಕಡೆ ಹೋದರೆ ಗಡಾಯಿಕಲ್ಲು ಮರೆಯದಿರಿ.

http://kanaja.in/%E0%B2%86%E0%B2%95%E0%B2%B0%E0%B3%8D%E0%B2%B7%E0%B2%95-%E0%B2%9A%E0%B2%BE%E0%B2%B0%E0%B2%A3-%E0%B2%A4%E0%B2%BE%E0%B2%A3-%E0%B2%8F%E0%B2%95-%E0%B2%B6%E0%B2%BF%E0%B2%B2%E0%B2%BE-%E0%B2%AA%E0%B2%B0/

http://mangalorehistory.blogspot.in/2012/05/blog-post_14.html