ಹೆದ್ದಾರಿ ಡಿವಿಜನ್‍ನಲ್ಲಿ ಸಾವು - ಇನ್ನೊಂದು ಮರೆಯಲಾಗದ ಕತೆ
ಇತ್ತೀಚೆಗೆ 'ಮಯೂರ' ಮಾಸ ಪತ್ರಿಕೆ ಬಲು ವಿಶಿಷ್ಟವಾಗಿ , ಪ್ರತಿಯೊಂದು ಸಂಚಿಕೆಯೂ ಸಂಗ್ರಾಹ್ಯ ಸಂಚಿಕೆಯಾಗಿ ಬರುತ್ತಿದೆ. ಕನ್ನಡವಷ್ಟೇ ಅಲ್ಲದೆ ದೇಶ ವಿದೇಶಗಳ ಸಾಹಿತ್ಯವನ್ನೂ ಪರಿಚಯಿಸುತ್ತಿದೆ. ಇವತ್ತು 'ಮಯೂರ' ಮಾಡುತ್ತಿರುವ ಕೆಲಸವನ್ನು ಪ್ರಾರಂಭದ ಅನೇಕ ವರ್ಷಗಳ ಕಾಲ ೭೦ರ ದಶಕದಲ್ಲಿ 'ತುಷಾರ' ಮಾಡುತ್ತಿತ್ತು . ಅಂದು ಓದಿದ ಒಂದು ಕತೆ ಇಂದಿಗೂ ನನ್ನ ನೆನಪಲ್ಲಿ ಹಸಿರಾಗಿದೆ.
ಈ ಕತೆಯ ಲೇಖಕರು ಶ್ರೀ ನಾ. ಡಿಸೋಜ ಅವರು . ಕಥಾನಾಯಕ ಒಂದು ಸರಕಾರೀ ಕಛೇರಿಯಲ್ಲಿ ಕೆಲಸ ಮಾಡುತ್ತಿದ್ದಾನೆ. ಸರಕಾರೀ ಕಚೇರಿಯೆಂದ ಮೇಲೆ ಹೇಳಲೇಬೇಕಿಲ್ಲ ; ಭ್ರಷ್ಟಾಚಾರ , ಇತರೆಲ್ಲ ಅವ್ಯವಹಾರ ರಾಜಾರೋಷವಾಗಿ ನಡೆಯುತ್ತಿದೆ . ನಮ್ಮ ಕಥಾನಾಯಕ ತಲೆ ಕೆಡಿಸಿಕೊಳ್ಳದೆ ನಿರ್ಲಿಪ್ತನಾಗಿ ತಣ್ಣಗೆ ತನ್ನಷ್ಟಕ್ಕೆ ಕೆಲಸಮಾಡಿಕೊಂಡು ಹೋಗುತ್ತಿದ್ದಾನೆ. ಅಲ್ಲಿ ಒಬ್ಬ ಹೊಸಬ ಪ್ಯೂನ್ ಎಂದು ಸೇರಿಕೊಂಡಿದ್ದಾನೆ. ಬಿಸಿರಕ್ತ ; ಸುತ್ತ ನಡೆಯುತ್ತಿರುವದನ್ನು ಸಹಿಸಿಕೊಳ್ಳಲಾಗುತ್ತಿಲ್ಲ; ನಾಯಕನನ್ನು ಹಚ್ಚಿಕೊಂಡಿರುವ ಆತ ಆಗಾಗ ಅವನ ಹತ್ತಿರ ಮಾತಾಡುತಿರುತ್ತಾನೆ. ಹೀಗೆ ಒಂದು ದಿನ ಉದ್ವಿಗ್ನನಾಗಿರುವ ಆತ ' ಇದನ್ನೆಲ್ಲ ಹೇಗೆ ಸಹಿಸಿಕೊಳ್ಳುವದು ಸಾರ್? ಇದೇನು ಆಫೀಸಾ , ಕುಲಗೆಟ್ಟು ಹೋಗಿದೆ ' ಎಂದರೆ ನಾಯಕ ತಣ್ಣಗೆ ಮುಗುಳ್ನಗುತ್ತಾನೆ. ' ನಿಮ್ಮ ಸರ್ವೀಸು ಎಷ್ಟು ಸಾರ್? ಎಂಬ ಪ್ರಶ್ನೆಗೆ ' ಇವತ್ತಿಗೆ ಸರಿಯಾಗಿ ಹತ್ತು ವರ್ಷ ಆಗುತ್ತದೆ' ಎಂಬ ಉತ್ತರ ಪಡೆದು ' ಅವತ್ತಿನಿಂದ ಇದನ್ನೆಲ್ಲ ನೋಡ್ತಲೇ ಬಂದಿದ್ದೀರಾ ? ' ಎಂದು ಕೇಳುತ್ತಾನೆ.
ಆಗ ನಮ್ಮ ನಾಯಕ ' ಇಲ್ಲ ; ನಾನು ಸರ್ವೀಸಿಗೆ ಸೇರಿದ ದಿನಾನೆ ...' ಎಂದು ಏನನ್ನೋ ಹೇಳ ಹೊರಟು ಎದೆನೋವು ಬಂದು ಹೃದಯಸ್ತಂಭನವಾಗಿ ಸತ್ತು ಹೋಗುತ್ತಾನೆ.
ನಂತರ ಆಫೀಸು ಯಥಾಪ್ರಕಾರ ನಡೆಯುತ್ತದೆ . ಆಫೀಸಿನಲ್ಲಿ ನಾಯಕ ಮರಣ ಹೊಂದಿರುವದರಿಂದ ಕಚೇರಿಯವರು ಅವನ ಸಂಸಾರಕ್ಕೆ ಅನುಕೂಲಮಾಡಲು ಪತ್ರವ್ಯವಹಾರ ಮಾಡುತ್ತಾರೆ. ಅವರ ಕೈಗೆ ಪೋಸ್ಟ್‍ಮಾರ್ಟಂ ರಿಪೋರ್‍ಟ್ ಬಂದಾಗ ಅದರಲ್ಲಿ ಮರನದ ತಾರೀಕು ತಪ್ಪಾಗಿರುವದನ್ನು ಗಮನಿಸುತ್ತಾರೆ ಅದು ಹತ್ತು ವರುಷದ ಹಿಂದಿನ ತಾರೀಖು. ಅದು ಅವನು ಕೆಲ್ಸಕ್ಕೆ ಸೇರಿದ ತಾರೀಖು. ' ಈ ಡಾಕ್ಟರು ಅದು ಹೇಗೆ ಬೇಜವಾಬ್ದಾರಿಯಿಂದ ಕೆಲಸ ಮಾಡ್ತಾರೋ ' ಎಂದು ಪೋಸ್ಟ್ಮಾರ್ಟಮ್ ಮಾಡಿದ ಸರಕಾರೀ ಡಾಕ್ಟರ್ ರನ್ನು ಸಂಪರ್ಕಿಸಿದಾಗ ಅವರು ಹೇಳ್ತಾರೆ- ' ಇಲ್ಲ ; ಅವನು ಸತ್ತ ತಾರೀಖು ಸರಿಯಾಗೇ ಇದೆ . ವೈದ್ಯಕೀಯವಾಗಿ ಅವನು ಸತ್ತು ಹತ್ತು ವರ್ಷಗಳೇ ಆಗಿದ್ದವು. ' ಎಂದು ತಾರೀಕು ಬದಲಾಯಿಸಲು ನಿರಾಕರಿಸುತ್ತಾರೆ. ' ಅದು ಹ್ಯಾಗ್ರೀ ಸಧ್ಯ ? ಸತ್ತ ಮನುಷ್ಯ ಹತ್ತು ವರ್ಷ ಕಾಲ ಮಾಮೂಲಿನಂತೆ ಇದ್ದು ಕಚೇರಿಗೆ ಬರಲು ಸಾಧ್ಯವೇ?' ಎಂಬ ಮಾತಿಗೆ 'ಹೌದು ನನಗೂ ಅದನ್ನು ನಂಬಲಿಕ್ಕೆ ಆಗುವದಿಲ್ಲ; ಇದು ನಿಜವಾಗಿಯೂ ಒಂದು ಪವಾಡವೇ ಸರಿ' ಎಂದು ಉತ್ತರಿಸುತ್ತಾರೆ! .
ಎಲ್ಲರಿಗೂ ಅದೇ ಆಶ್ಚರ್ಯ . ಸತ್ತು ಹೋದ ಮನುಷ್ಯ ಮಾಮೂಲಿನಂತೆ ಇದ್ದು ಕಚೇರಿಗೆ ಬಂದು ಕೆಲಸ ಮಾಡಿಕೊಂಡಿರಲು ಸಾಧ್ಯವೇ ಎಂದು ಅನೇಕ ದಿನಗಳಾದರೂ ಆಶ್ಚರ್ಯಪಡುತ್ತಲೇ ಇರುತ್ತಾರೆ. ಆದರೆ ಹೊಸದಾಗಿ ಸೇರಿದ್ದ ಪ್ಯೂನನಿಗೆ ಮಾತ್ರ ದಿನಗಳು ಕಳೆದಂತೆ ಅದು ಹೇಗೆ ಸಾಧ್ಯವೆಂದು ಅರ್ಥವಾಗುತ್ತ ಹೋಗುತ್ತದೆ.