ಕಾಣೆಯಾಗಿದೆ!

ಸ್ನೇಹಿತ ದೇಶಪಾಂಡೆ ಮರಾಠಿಯಲ್ಲಿ ಬರೆದ
ಕವನವೇ ಸ್ಫೂರ್ತಿ

ದುಡಿದರೂ ಬೆವರು ಸುರಿಯಲು ಬಿಡದ ಹವಾ ನಿಯಂತ್ರಕ
ಚಿಂತನೆಯ ಬರೆಯಲು ಸಹಾಯಕಿ, ಪಾಲಿಸಲು ಆಜ್ಞಾಧಾರಕ
ಒಂದರ ಮೇಲೊಂದು ಮೀಟಿಂಗು ಈಟಿಂಗು
ಬೈಗಿನಿಂದ ಸಂಜೆವರೆಗೆ ಸಡಗರವೋ ಸಡಗರ
ಕಾಣೆಯಾಗಿದೆ ಅಂದಿನ ಲಂಗೋಟಿಯ ಹಂದರ

ತಿಂಗಳ ಕೊನೆಗೆ ಕೈತುಂಬುವ ಹಣ, ಹೆಚ್ಚಿನ ಉಳಿತಾಯ
ವಾರದ ವಾರಕ್ಕೂ ಜಗ ಜಗಿಸುವ ಷಾಪ್ಪಿಂಗು
ಕುಟುಂಬ ಮಿತ್ರರೊಂದಿಗೆ ಮೋಜು ವಿಲಾಸ
ನೀರಿನಂತೆ ಹರಿವ ಕಾಸೇ ನನ್ನರಸ
ಕಾಣೆಯಾಗಿದೆ ಅಮ್ಮನ ಸೀರೆಯ ಮಮತೆ

ಮೋಜು ಮಾಡಲು ಹಾಡುಗಳ ಡಿಸ್ಕು, ಐಪಾಡು
ಮರೆಯಾಗಿದೆ ಆಟ ಕಲಿಸಿದ ಹಿತ್ತಲ ಕಾಡು
ಸೈಕಲ್ಲಿನ ಮರೆ ಮಾಚಲು ಬಂದ ವೇಗದ ಕಾರು
ಮನದೊತ್ತಡವ ಮಾಯಾವಾಗಿಸುವ ನೊರೆಯ ಬುರುಬುರು
ಸುತ್ತ ಮುತ್ತಲೂ ಕಾಣುವುದು ಕಾಂಕ್ರೀಟಿನ ಕಾಡು
ಮರೆತು ಹೋಗಿರುವ ಮಾಡಿನ ಗುಬ್ಬಚ್ಚಿ ಗೂಡು

ಮನೆಯ ರೊಟ್ಟಿಯ ಮಾಯವಾಗಿಸಿಹ ಹೊಟೆಲ್ ತಿನಿಸು
ಮತ್ತೆ ಕಾಣುವೆನೇ ಆ ತಿರುಕನ ಕನಸು
ಮಾವಿನ ತೋಪನು ಮರೆಯಾಗಿಸಿಹ ಪಿಕ್ನಿಕ್ ರಿಸಾರ್ಟು
ಸಣ್ಣ ಪುಟ್ಟ ಕಲಹಕೆ ಹತ್ತುವರು ಕೋರ್ಟು
ಕಾಗುಣಿತವ ಮರೆಯಾಗಿಸಿದ ಪರದೇಶೀ ಮಾತು
ಕಾಣೆಯಾಗಿದೆ ರುಚಿ ರುಚಿಯಾದ ಕೈ ತುತ್ತು

ಕಾಣೆಯಾಗಿರುವುದ ಹುಡುಕಲು ಬರುವಿರಾ
ನನ್ನೊಂದಿಗೆ ನೀವೂ ಕೈ ಜೋಡಿಸುವಿರಾ?