ಗರ್ಭದಲ್ಲಿ ದಶಾವತಾರ
ಗರ್ಭದಲ್ಲಿ ದಶಾವತಾರ
ತಾಯಿ ಬ್ರಹ್ಮಾಂಡವು ಮಗುವು ಪಿಂಡಾಂಡವು,
ಪಿಂಡದಿಂದ ಬ್ರಹ್ಮ ಮಾಡೊ ಅಂಡ ವೇದವು.//ಪ//.
ವೇದರಕ್ಷೆಗಾಗಿ ಬಂದ ಮತ್ಸ್ಯಾವತಾರವು,
ಪ್ರಥಮಮಾಸ ಗರ್ಭದಲ್ಲಿ ಮೀನಾಕಾರವು.//೧//.
ದೇವರಮರಗೊಳಿಸಿದಂತ ಕೂರ್ಮಾವತಾರವು,
ಗರ್ಭದೆರಡು ತಿಂಗಳಲ್ಲಿ ಆಮೆರೂಪವು.//೨//.
ಅಸುರಾರಿ ಹರಿಯು ತಳೆದ ವರಾಹಾವತಾರವು,
ಮೂರುಮಾಸದುದ್ದಮುಖದ ಪುಟ್ಟ ಗರ್ಭವು.//೩//.
ಹಿರಣ್ಯಕಶಿಪುನಾಶಕಾಗಿ ಬಂದ ನಾರಸಿಂಹವು,
ನಾಲ್ಕುಮಾಸ ಗರ್ಭದಲ್ಲಿ ಸಿಂಹರೂಪವು.//೪//.
ಬಲಿಯ ತುಳಿದ ತ್ರಿವಿಕ್ರಮ ವಾಮನಾವತಾರವು,
ಐದುಮಾಸ ಬೆಳೆದ ಕುಬ್ಜ ವಿಷ್ಣು ರೂಪವು.//೫//.
ಧರೆಯ ದುಷ್ಟರನ್ನು ಕೊಂದ ಭಾರ್ಗವಾವತಾರವು,
ಆರುಮಾಸ ಗರ್ಭಶಿಶುವ ಕ್ಷಾತ್ರ ತೇಜವು.//೬//.
ಶ್ರೀ ರಾಮಚಂದ್ರನಾ ಸಪ್ತಮಾವತಾರವು,
ಶುದ್ದಮನದ ಮಾನವಾಕೃತಿಯ ಪೂರ್ಣವು.//೭//.
ಗೀತಾಮೃತವ ಕೊಟ್ಟ ಕೃಷ್ಣಾವತಾರವು,
ಶಿಶುವಿನಲ್ಲಿ ಬುದ್ಧಿಜ್ಞಾನಕರ್ಮಯೋಗವು.//೮//.
ರಾಗದ್ವೇಷ ನಾಶದಾ ಬುದ್ಧಾವತಾರವು,
ನವಮಾಸದ ಗರ್ಭದಲ್ಲಿ ಧ್ಯಾನಯೊಗವು.//೯//.
ಹರಿಯು ಕಲ್ಕಿಯಾಗಿ ಬರುವ ದಶಮಾವತಾರವು,
ಜನುಮ ತಳೆದ ಮಗುವಿನಾ ಮೂರ್ತಿ ರೂಪವು.//೧೦//.
ದೇವ ಬ್ರಹ್ಮಾಂಡವು ದೇಹ ಪಿಂಡಾಂಡವು,
ಅಂಡ ಪಿಂಡ ಬ್ರಹ್ಮಾಂಡದ ಪ್ರಣವನಾದವು.//ಪ//.
-:ಅಹೋರಾತ್ರ.