ಹಾವು (ಡಿ.ಎಚ್.ಲಾರೆನ್ಸ್ ನ snake ಪದ್ಯದ ರೂಪಾಂತರ)
ಹಾವು
ಮಳ್ಳು ಹಿಡಿದ ಹಗಲ ಝಳದಲ್ಲಿ
ಹಾವೊಂದು ನೀರಿಗೆ ಇಳಿಯಿತು
ಕೆರೆಯಲ್ಲಿ ಈಜುತ್ತಿದ್ದ ನನ್ನ ಜೊತೆಗೆ. . . .
ಮನೆಯ ಮುಂದೇ ಇರುವ ಈ ಕೆರೆಗೆ
ಮೆಟ್ಟಿಲಿಳಿದು ಈಜಿಗೆ ಬಿದ್ದವನಿಗಡ್ಡಿಪಡಿಸಲಿಲ್ಲ
ಸರದಿ ಬರುವವರೆಗೂ ಕಾಯಬೇಕೆಂಬ ನಿಯಮ. . . .
ಸಣ್ಣಬಿರುಕಿಂದೆಲ್ಲಿಂದಲೋ ತೂರಿಬಂದು
ಹೊನ್ನಬಣ್ಣದ ಮೈಯನ್ನೆಳೆದುಕೊಂಡು
ಮೆಟ್ಟಿಲುಗಳುದ್ದಕ್ಕೂ ಉದ್ದುದ್ದ ಮಲಗಿದ್ದ ಹಾವು. . . .
ನನಗಿಂತಲೂ ಮೊದಲೇ ಬಂದು ಕಾದಿದ್ದು ಅದು
ಅದರೆಲ್ಲ ಆಟ ಕಳೆದು ನೀರುಗ್ಗುವುದು ನಿಲ್ಲುವವರೆಗೂ
ಸರದಿ ಬರುವವರೆಗೂ ಕಾಯಬೇಕಿದ್ದವನು ನಾನು. . . . .
ನೀರಡಿಕೆ ಹಿಂಗುವವರೆಗೂ ಕತ್ತೆತ್ತದ ಎತ್ತಿನ ಹಾಗೆ
ನೋಡಿಯೂ ನೋಡದ ಘನಸ್ತಿಕೆಯ ಮೆರವಣಿಗೆ
ಧಗೆಯಲ್ಲಿ ಥಳಥಳಿಸುತ್ತಿದ್ದ ಹಳದಿ ಬಣ್ಣ. . . . .
ಕೇರೆ ಕಚ್ಚುವುದಿಲ್ಲ, ವಿಷ ಇರುವುದೇ ಇಲ್ಲ
ಗೋಧಿ ಹಳದಿಗೆ ಮೈಯ ತುಂಬ ಬರೀ ಅದೇ,
ಕೋಲೋ ಕಲ್ಲನ್ನೋ ಎತ್ತಿ ಎಸೆದದನ್ನಿಲ್ಲವಾಗಿಸಬೇಕು. . . . .
ಸದ್ದುಗದ್ದಲವಿರದೆ ನಿಂತ ನೀರಲ್ಲೀಜಿ
ಮತ್ತೆ ಬಿಲಕ್ಕೆ ತೂರುವ ಸಂತೃಪ್ತ ಸಂತ
ಬಂಡೆದ್ದ ಹೆದರಿಕೆಗೆ ಅನಂತ ಮುಖವಾಡ. . . . .
ಭಯ ಎದೆಯೊಳಗಿಳಿದು, ನಿಗೂಢವಡಗಿದರೂ
ಸದ್ಯ ಗೆದ್ದ ಹುರುಪಲ್ಲಿ ಮತ್ತೆ ಮತ್ತೆ ಅದೇ
ಹಾವ ಕೊಲ್ಲುವ ಗರಿ ಹಿರಿದ ಬಯಕೆ. . . .
ಆದರೂ ತನ್ನ ಪಾಡಿಗೆ ತಾನು ಉದಾಸೀನದಲಿದ್ದಂತೆ
ಸೀಳುನಾಲಿಗೆಯ ಒಳಹೊರಗಾಡಿಸಿ, ಕತ್ತು
ತಿರುಗಿಸಿ ಮಣ್ಣಬಿಲದೊಳಕ್ಕಿಳಿದ ಸರ್ಪಮಾರ್ಗ. . . .
ಬಿರುಕೊಳಕ್ಕೆ ತಲೆ ತೂರಿದ್ದೆ ತಡ ಉಳಿದದ್ದನ್ನೆಲ್ಲ
ಎಳೆದುಕೊಂಡದ್ದದು ಅದೆಷ್ಟು ಬೇಗ?
ನಿಮಿಷದೊಳಗೇ ಎಲ್ಲ ಕಣ್ಣಮಾಯೆಯ ಚಿತ್ರ. . . . .
ನನ್ನಂಥವನನ್ನಂತೂ ಕ್ಯಾರೆ ಅನ್ನದ ಧಿಮಾಕು
ಪಾಪ ಅನ್ನಿಸುತ್ತಿದ್ದೆಲ್ಲವನೂ ಬಿಸುಟು
ಕೈಗೆ ಸಿಕ್ಕ ಕಲ್ಲನ್ನೆತ್ತಿ ಎಸೆದೆ. . . . .
ಪೆಟ್ಟು ತಗುಲದಿದ್ದರೂ, ಎಚ್ಚರದ ಶಬ್ದಕ್ಕೆ ಹೆದರಿ
ನಿಂತ ನಿಲುವಲ್ಲಲ್ಲೆಲ್ಲೋ ಅಂತರ್ಧಾನವಾದ ರೀತಿ
ಭಯದ ಜೊತೆಜೊತೆಗೇ ಅಸಹ್ಯದನುಭವ. . . .
ಹಾವೋ ಅದು ಗಡೀಪಾರಾಗಿದ್ದ ದೊರೆಯೋ
ಪಾತಾಳಕ್ಕಿಳಿದ ವೀರನಿಗೆ ಇನ್ನು ಪಟ್ಟ ಗಿಟ್ಟುವುದು ಖಾತ್ರಿ
ನಾನು ಈವರೆಗೆ ಕಂಡದ್ದು ಹಗಲುಗನಸೋ?. . . .
ಬದುಕ ಕಾಣಿಸಿದ ಈ ಅನುಭವದ ವರಕ್ಕೆ
ಅನುವಾಗದೇ ಸೋತ ನನ್ನ ಸಣ್ಣತನಕ್ಕೆ
ಪ್ರಾಯಶ್ಚಿತ್ತ ಅತ್ಯಗತ್ಯದ ಅನಿವಾರ್ಯ ತಾನೆ?. . . .
* * * * *
ಮೂಲ; ಡಿ.ಎಚ್.ಲಾರೆನ್ಸ್