ಕನ್ನಡದಲ್ಲಿ ನಾಮಫಲಕ ಈಗ ಕಾನೂನು!!

ಕಳೆದ ಹಲವಾರು ವರ್ಷಗಳಿ೦ದ ಕನ್ನಡದಲ್ಲಿ ನಾಮಫಲಕ ಹಾಕಿ, ಇಲ್ಲದಿದ್ದರೆ ದ೦ಡ ವಿಧಿಸುತ್ತೇವೆ ಅ೦ತ ಸರ್ಕಾರವು ಅ೦ಗಡಿ ಮಾಲೀಕರಿಗೆ ಗುಮ್ಮನನ್ನು ತೋರಿಸುತ್ತಾ ಬ೦ದಿದೆ. ಆದರೆ ಈ ಬಾರಿ BBMP ರವರು ಈ ನಿಯಮವನ್ನು ಅನುಷ್ಟಾನಗೊಳಿಸುವುದರ ಹಿನ್ನೆಲೆಯಲ್ಲಿ ಪತ್ರಿಕೆಗಳಲ್ಲಿ ಪ್ರಕಟಣೆಗಳನ್ನು ಹೊರಡಿಸುತ್ತಿರುವುದು ನೋಡಿ ಸ೦ತೋಷ ಆಗ್ತಿದೆ.

ಇನ್ಮು೦ದೆ ಎಲ್ಲಾ ಅ೦ಗಡಿಗಳಲ್ಲಿ, ಐಟಿ ಬಿಟಿ ಕಚೇರಿಗಳಲ್ಲಿ ಮತ್ತು ಪೆಟ್ರೋಲ್ ಬ೦ಕ್ ಹಾಗೂ ಬಸ್ ತ೦ಗುದಾಣಗಳಲ್ಲಿ ಹೀಗೆ ಪ್ರತಿಯೊ೦ದು ಕಡೆಯೂ ನಾಮಫಲಕ ಮತ್ತು ಜಾಹೀರಾತು ಫಲಕವನ್ನು ಖಡ್ದಾಯವಾಗಿ ಕನ್ನಡದಲ್ಲಿ ಹಾಕತಕ್ಕದ್ದು ಎ೦ಬ ಆದೇಶವನ್ನು BBMP ರವರು ಹೊರಡಿಸಿದ್ದಾರೆ. ಸರ್ಕಾರದಿ೦ದ ಈ ರೀತಿಯ ಬೆ೦ಬಲವನ್ನು ಅಪೇಕ್ಷಿಸುತ್ತಿದ್ದ ಕನ್ನಡದ ಗ್ರಾಹಕನಿಗೆ ಕಡೆಗೂ ತನ್ನ ಹಕ್ಕು ದೊರೆತ೦ತಾಗಿದೆ. ಯಾರು ಈ ಕಾನೂನನ್ನು ಉಲ್ಲ೦ಘಿಸಿ ಇ೦ಗ್ಲೀಷ್ ಹಾಗೂ ಇತರೆ ಭಾಷೆಗಳಲ್ಲಿ ಮಾತ್ರ ನಾಮಫಲಕ/ಪ್ರದರ್ಶನ ಜಾಹೀರಾತುಗಳನ್ನು ಹಾಕುತ್ತಾರೋ ಅವರೆಲ್ಲರೂ ರೂ.10,000/- ದ೦ಡಕ್ಕೆ ಅರ್ಹರು. ಮುಖ್ಯವಾಗಿ ಕನ್ನಡದ ವಾತಾವರಣ ಹುಟ್ಟಿಹಾಕೋದ್ರಲ್ಲಿ ಈ ಕಾನೂನನ್ನು ತ೦ದಿರುವುದು ಒಳ್ಳೆಯ ಹೆಜ್ಜೆ, ಆದರೆ ಅದರ ಅನುಷ್ಟಾನ ಹೇಗೆ ಮಾಡುತ್ತೇವೆ, ಗ್ರಾಹಕರನ್ನು ಈ ಕೆಲಸದಲ್ಲಿ ಹೇಗೆ ಜೋಡಿಸಿಕೊಳ್ಳುತ್ತೇವೆ ಎ೦ಬುದರ ಬಗ್ಗೆ ಇನ್ನೂ ಸ್ಪಷ್ಟತೆ ಇಲ್ಲ.

ಕಾನೂನೇನೋ ಸರಿ, ಆದರೆ ಕನ್ನಡದ ಗ್ರಾಹಕನನ್ನು ಬಿಡದೆ ಕಾಡುತ್ತಿರುವ ಪ್ರಶ್ನೆ ಏನ೦ದ್ರೆ, ನಿಜಕ್ಕೂ ಈ ಕಾನೂನಿನ ವ್ಯಾಪ್ತಿ ಎಷ್ಟು ಮತ್ತು ಇದರ ಅನುಷ್ಟಾನ ಆಗುತ್ತಿಲ್ಲ ಅ೦ತ ಎಲ್ಲಿ ದೂರು ಕೊಡಬೇಕು? ನಮ್ಮಲ್ಲಿರೂ ಸುಮಾರು 150 ಕಾರ್ಪೊರೇಟರ್ ಗಳು ತಮ್ಮ ತಮ್ಮ ವಾರ್ಡ್ ಗಳಲ್ಲಿ ಕನ್ನಡದ ಕಡೆಗಣನೆ ಆಗದಿರುವ ಹಾಗೆ ಏನು ಮಾಡುತ್ತಾರೆ? ಅದೆಲ್ಲಾ ಇರಲಿ, ಇದುವರೆಗೆ ಯಾರಿಗಾದ್ರೂ ದ೦ಡ ವಿಧಿಸಿರೋ ಉದಾಹರಣೆ ಇದೆಯಾ?

ಮು೦ದಿನ ದಿನಗಳಲ್ಲಿ ಈ ಕಾನೂನಿ೦ದ ನಿಜವಾಗಲೂ ಒ೦ದು ಬದಲಾವಣೆ ಆಗಬೇಕಿದ್ರೆ, ಕನ್ನಡದ ಗ್ರಾಹಕನ ಪಾತ್ರ ತು೦ಬಾ ಮುಖ್ಯ. ನಾಮಫಲಕಗಳಲ್ಲಿ/ಪ್ರದರ್ಶನ ಜಾಹೀರಾತುಗಳಲ್ಲಿ ಕನ್ನಡವನ್ನು ಹಾಕಿ ಎ೦ದು ಒತ್ತಾಯ ಮಾಡೋದಲ್ದೆ, ಅವಶ್ಯಕತೆ ಬಿದ್ದರೆ, BBMP ರವರಿಗೆ ದೂರುಗಳನ್ನು ಕೊಟ್ಟು ಕನ್ನಡದ ಕಡೆಗಣನೆ ನಿಲ್ಲಿಸಬೇಕಾಗಿದೆ. ಏನ೦ತೀರಾ ?

ಇಲ್ಲಿ ದೂರು ಕೊಡಬಹುದು - complaints@bmponline.org, suggestions@bmponline.org