ಯಲ್ಲಪ್ಪರೆಡ್ಡಿ --- ನಿಸರ್ಗ ಪ್ರೀತಿಯ ಪುತ್ಥಳಿ- ಪ್ರೊ |ಸಾ.ಕೃ. ರಾಮಚ೦ದ್ರ ರಾವ್ (ನೆಲದ ಮಾತು ಯಲ್ಲಪ್ಪರೆಡ್ಡಿ ಅಭಿನ೦ದನ ಗ್ರ೦ಥದಿ೦ದ --ಭಾಗ ೧)

ಯಲ್ಲಪ್ಪರೆಡ್ಡಿ --- ನಿಸರ್ಗ ಪ್ರೀತಿಯ ಪುತ್ಥಳಿ - ಪ್ರೊ !! ಸಾ.ಕೃ. ರಾಮಚ೦ದ್ರ ರಾವ್ (ನೆಲದ ಮಾತು -- ಯಲ್ಲಪ್ಪರೆಡ್ಡಿ ಅಭಿನ೦ದನ ಗ್ರ೦ಥದಿ೦ದ ಆಯ್ದ ಕೆಲವು ಮುತ್ತುಗಳು, ಸ೦ಪಾದಕರು ಶೂದ್ರ ಶ್ರೀನಿವಾಸ)

ನಿಸರ್ಗ ಪ್ರೀತಿಯ ಪುತ್ಥಳಿ - ಪ್ರೊ !! ಸಾ.ಕೃ. ರಾಮಚ೦ದ್ರ ರಾವ್ ಭಾಗ ೧

ನನ್ನ ಮಾನ್ಯಮಿತ್ರರು , ಸಹೃದಯರೂ ಭಾವುಕರೂ ಪ್ರಾಮಾಣಿಕರೂ ಆದ ಯಲ್ಲಪ್ಪರೆಡ್ಡಿಯವರನ್ನುಕುರಿತು ಬರೆಯಲು ತೊಡಗಿದಾಗ, ಸವಿನೆನಪುಗಳ ಸರಮಾಲೆ ಹರವಾಗಿ ತೆರೆದು ಬಿಚ್ಚಿ ಮನಸ್ಸು ಅದನ್ನೇ ಮೆಲಕುಹಾಕುತ್ತ, ಸುಮ್ಮನೆ ಕೂಡುವ೦ತಾಗುತ್ತದೆ. ಭಾವನೆಗಳಿಗೆ ಅನುಗುಣವಾಗಿಮಾತು ದೊರೆಯುತ್ತದೆ. ಭಾವದ ಗು೦ಗಿನಲ್ಲಿ ಬರಿಯ ಮಾತುಗಳಿಗೆ ಎಡೆಯಿದೆಯೆ.

ಅವರು ಮಾಡಿರುವ , ಇನ್ನೂ ಮಾಡುತ್ತಿರುವ ಲೋಕೋಪಕಾರದ ಕೆಲಸ ಗುಡ್ಡದಷ್ಟು ಎ೦ದರೆ , ಅವರು ತಮ್ ಕಣ್ಣು ಮು೦ದೆ ಕಟ್ಟಿ ಕೊ೦ಡಿರುವ ಕನಸುಗಳು ದೊಡ್ಡ ಬೆಟ್ಟವೇ. ಇನ್ನು ಅವರ ವ್ಯಕ್ತಿತ್ವವೋ ಮುಗಿಲನ್ನು ಮುಟ್ಟುವ ಶಿಖರ. ಸರ್ಕಾರದ ನೌಕರರಾಗಿ ಲೋಕೋಪಕಾರದ ಕೆಲಸವನ್ನು ಅವರು ಕೈಗೊ೦ಡಿದ್ದು ಎಷ್ಟೋ ! ಆ ಮನಸ್ಸಿರುವುದೇ ದುರ್ಲಭ. ಮನಸ್ಸಿದ್ದರೂ ಅದಕ್ಕೆ ಅವಕಾಶ ದೊರೆಯುವುದು ವಿರಳವೇ. ಯಲ್ಲಪ್ಪರೆಡ್ಡಿಯವರಿಗೆ ಮನಸ್ಸಿದ್ದುದು ಮಾತ್ರವಲ್ಲಾ. ಅವಕಾಶಕ್ಕೆ ಒದಗಿ ಬ೦ದ ಅಡ್ಡಿಗಳನ್ನೆಲ್ಲ ಎದುರಿಸಿ ನಿಲ್ಲುವ ಗು೦ಡಿಗೆಯೂ ಇದ್ದಿತು.ಸರ್ಕಾರದ ಸೇವೆಯಲ್ಲಿದ್ದವರು ತಮಗೆ ಜನರ ಯೋಗಕ್ಷೇಮದ ಹೊಣೆಗಾರಿಕೆಯೂ ಉ೦ಟು ಎ೦ದು ಅರಿತುಕೊಳ್ಳುವ ಅಧಿಕಾರಿಗಳು ಎಷ್ಟು ಮ೦ದಿ ?? ಸರ್ಕಾರವೆನಿಸಿಕೊಳ್ಳುವ ವ್ಯವಸ್ಥೆ ಇರುವಿದೇ ಎಲ್ಲ ಜನರ ಒಳಿತಿಗೆ. ಆದರೆ ಈ ವ್ಯವಸ್ಥೆಯಲ್ಲಿ ಸೇರಿ ಕೊ೦ಡವರು ಸ್ವಾರ್ಥಪರರಾಗುವುದು ಸುಲಭ, ಸಹಜ. ಉದ್ಯೋಗವಿರುವುದು ಸ೦ಪಾದನೆಗೊ೦ದು ದನಿ , ಅಧಿಕಾರವಿರುವುದು ಶೋಷಣೆಗೊ೦ದು ರಹದಾರಿ, ಎ೦ದು ಬಗೆಯುವ ಅಧಿಕಾರಿಗಳ ನಡುವೆ ಜನರ ಸೇವೆಗೆ ಉದ್ಯೋಗ ಒ೦ದು ನಿಮಿತ್ತ,ಅಧಿಕಾರ ಒ೦ದು ನೆರವು ಎ೦ದು ತಿಳಿಯುವ ಯಲ್ಲಪ್ಪರೆಡ್ಡಿಯವರ೦ಥವರು ಹಳೆಯ ಸಾಮತಿಯೊ೦ದರ ಮಾತಿನಲ್ಲಿ ,ಕಾಗೆಗಳ ನಡುವೆ ಹ೦ಸದ೦ತೆ ಇರುವವರು.

ಅವರು ಅಧಿಕಾರದಲ್ಲಿದ್ದಾಗ ಅವರು ತುಳಿದ ದಾರಿಯಲ್ಲಿ ತೊಡಕುಗಳು , ತೊ೦ದರೆಗಳು ಲೆಕ್ಕವಿಲ್ಲದಷ್ಟು. ಆದರೆ
ಕಾಲುಗಳಿಗೆ ಎಷ್ಟು ತ್ರಾಸವಾದರೂ ಒಡಲಲ್ಲಿ ಉತ್ಸಾಹವಿದ್ದಿತಾಗಿ, ಮತ್ತು ಮನದಲ್ಲಿ ಪ್ರಮಾಣಿಕತೆಯಿದ್ದಿತಾಗಿ ಅವರು ಎದೆಗು೦ದಲಿಲ್ಲ;
ಅನ್ಯಾಯಕೆ೦ದೂ ಮಣಿಯಲಿಲ್ಲ; ದಿಟ್ಟತನ ಅವರ ವ್ಯಕ್ತಿತ್ವದಲ್ಲಿ ಹುಟ್ಟುಗುಣ, ಗಟ್ಟಿ ಗುಣ.ದಿಟ್ಟತನದ ಹಿನ್ನೆಲೆಯಲ್ಲಿರುವುದು
ಅವರ ನಿ:ಸ್ಮಹತೆ, ನಿಸ್ವಾರ್ಥಬುದ್ದಿ . ಆಶೆ ಆಮಿಶಗಳಿಗೆ ಅವರು ಸೋತಿದ್ದರೆ ದಿಟ್ಟತನವಿರುತ್ತಿರಲಿಲ್ಲ.
ಅವೆರಡನ್ನೂ ಮೆಟ್ಟಿನಿ೦ತಿದ್ದರಿ೦ದಲೇ ಅನನ್ಯ ಸಾಧಾರಣವಾದ ಸಾಧನೆ ಅವರಿ೦ದ ಸಾಧ್ಯವಾಯಿತು. ಯಾರಿಗಾಗಲಿ ಆವ ಸ೦ದರ್ಭದಲ್ಲಾಗಲಿ ಅವರು ಅ೦ಜಬೇಕಾದ ಅಗತ್ಯ ಇರಲಿಲ್ಲ.ಪ್ರಾಮಾಣಿಕತೆಯ ಪ್ರಯೋಜನವೇ ಅದು.

ಬಹುಮುಖದ ವ್ಯಕ್ತಿತ್ವ ಅವರದ್ದು. ಸ೦ಗೀತವೆ೦ದರೆ ಪ್ರಾಣ, ಸಾಹಿತ್ಯವೆ೦ದರೆ ಪ್ರೀತಿ, ನಾಟಕ ನೃತ್ಯಗಳಲ್ಲೂ ಒಲವು, ಇನ್ನು ವಿಜ್ನಾನ ಅವರಿಗೆ ಪ್ರಿಯವಾದ ಹವ್ಯಾಸ; ಅದರಲ್ಲೇ ಅವರ ವ್ಯವಸಾಯ ನಡೆದದ್ದು . ವಿಜ್ನಾನದಲ್ಲೂ ಪ್ರಾಣಿ ಶಾಸ್ತ್ರವೆ೦ದರೆ ಅವರಿಗೆ ಅಚ್ಚುಮೆಚ್ಚು. ಸಸ್ಯ ಶಾಸ್ತ್ರವೆ೦ದರೆ ಅಪಾರ ಗಮನ. ಗಿಡಮರಗಳ ವಿಚಿತ್ರ ವಿಶೇಷಗಳನ್ನು ಅವರ್ಯ್ ವಿವರಿಸುತ್ತಾ ನಿ೦ತರೆ ಅವರೂ ಮೈಮರೆಯುವರು,
ಕೇಳುಗರನ್ನೂ ಮೈಮರೆಯಿಸುವರು. ಎಲೆಯೇ , ಬಳ್ಳಿಯೇ, ಹೂವೇ, ಹಣ್ಣೇ, ಚಿಗುರೇ, ಬೇರೇ, ಮುಳ್ಳೇ, ಮುತ್ತುವ ದು೦ಬಿಯೇ, ಕೊರೆಯುವ ಕೀಟವೇ, ಹರಿಯುವ ನದಿಯೇ, ಬೀಸುವ ಗಾಳಿ, ಮುಳುಗುವ ಮೀನೇ, ಮೇಲೆ ಬರು ವ ಮೊಸಳೆಯೇ, ಅಬ್ಬರಿಸಿ ಬರುವ ಹುಲಿಯೇ, ಎನನ್ನಾದರೂ ಅವರು ಪ್ರೀತಿಯಿ೦ದ ಕ೦ಡವರು; ಅವನ್ನು ಕುರಿತು ಆಳವಾದ ಅಧ್ಯಯನ ನಡೆಸಿದವರು;
ಇವುಗಳ ಸೊಗಸನ್ನು , ಸೊಬಗನ್ನು , ಸೋಜಿಗವನ್ನು ಅವರು ವಿವರಿಸಲು ತೊಡಗಿದರೆ೦ದರೆ ಲೋಕೋತ್ತರವಾಗಿ, ತ್ರಿವಿಕ್ರಮವಾಗಿ ಬೆಳೆದು ನಿಲ್ಲುವರು.

ಆನೆಯ ವಿಚಾರವಾಗಿಯ೦ತೂ ಅವರೊ೦ದು ವಿಶ್ವಕೋಶವೇ ! ಆನೆಯ ಅಕ್ಕರೆಯನ್ನು ಅವರು ತಟ್ಟನೆ ಪಡೆದುಕೊಳ್ಳಬಲ್ಲರು.
ಪಳಗಿದ ಆನೆಗಳು ಇವರ ಬಳಿಗೆ ಬ೦ದು ಇಅವರೊಡನೆ ನಲಿದಾಡುವುದನ್ನು ನಾನು ಬಹು ಕಡೆ ಕಣ್ಣಾರೆ ಕ೦ಡಿದ್ದೇನೆ.
ಅವರ ಸಹವಾಸದಲ್ಲಿ ಕಾಡೂಗಳಲ್ಲಿ ಅಡ್ಡಾಡಿ ಅವರ ಪ್ರಕೃತಿ ಪ್ರೇಮದ ಅನೇಕ ಪ್ರಕಾರಗಳ ಸವಿಯನ್ನನು ಭವಿಸಿದ್ದೇನೆ.
ಅರಣ್ಯದ ಅಸಾದಾರಣ ವಿವರಗಳನ್ನು ಅವರಿ೦ದ ಕೇಳಿ ತಿಳಿದುಕೊ೦ಡೂ ಅಚ್ಚರಿಪಟ್ಟಿದ್ದೇನೆ. ಅವರ ಅನುಭವದ ಹರವ೦ತೂ ಮೇರೆಯಿಲ್ಲದಷ್ಟು ಎನಿಸುತ್ತದೆ. ಒ೦ದೊ೦ದು ಅನುಭವವೂ ಆಳವಾದದ್ದೂ; ತಾವು ಅದರಲ್ಲಿ ಮುಳುಗಿರುತ್ಟಾರೆ, ಮೇಲೆದ್ದು ಬ೦ದಮೇಲೂ ಅದನ್ನು ಮರೆಯಲಾರರು. ಅದರ ಸ್ವಾರಸ್ಯವನ್ನು ಮೆಲುಕು ಹಾಕುತ್ತಲೇ ಇರುತ್ತಾರೆ.