ತಲೆ ತೆಗೆವ ಕೆಲಸ!

  ಅಣೋರಣೀಯ, ಮಹತೋ ಮಹೀಯ ಅವ
  ಜಗವನ್ನು ಸೃಷ್ಟಿಸಿದ ಆ ದೇವರು.
  ಅಣುವಿಂದ ಬಾಂಬ್ ಮಾಡಿ ಮಹತ್ಸಾಧನೆಯೆಂದು
  ಬಿಂಬಿಸುತ್ತಿದ್ದಾರೆ ಹುಲುಮಾನವರು!

  ಅಣುಗಳೊಳಗಿಂದೊಂದು ಮಹಾಸ್ಫೋಟವಗೈದು
  ಕೆಲವು ವಿಪರೀತಜ್ಞ ವಿಜ್ಞಾನಿಗಳು
  ವಿಶ್ವಸೃಷ್ಟಿಯ ಬಗೆಯ ಅರಿಯಲಿದ್ದಾರಂತೆ
  ಜಗಕಪಾಯವನೊಡ್ಡಿ ಆ ಭ್ರಮೆಯೊಳು!

  ಅಣುಶಕ್ತಿಯಿಂದ ವಿದ್ಯುತ್ತನ್ನು ಪಡೆವಂಥ
  ಕೈಗಾರಿಕೆಗೆ ತುತ್ತಾಯ್ತು ಕೈಗಾ.
  ಅಲ್ಲಿಂದು ಕುಡಿವ ನೀರೊಳಗೆ ವಿಕಿರಣ ಬಾಧೆ!
  ಭದ್ರತೆಯ ಗ್ಯಾರಂಟಿ ಇಲ್ಲ ಈಗ!

  ಅಣುಬಾಂಬು, ಅಣು ವಿದ್ಯುತ್, ಬಿಗ್ ಬ್ಯಾಂಗು, ಕೈಗಾ...
  ಕೊನೆಗಿವೆಲ್ಲವು ನಮ್ಮ ಕೈಗಾ? ಕಾಲಿಗಾ?
  ಅಥವಾ......ತಲೆಗಾ?!