"ಓ ನಿನ್ನೆ" ಎಲ್ಲಿ ಹೋದೆ ನೀನು?

ಸುಳ್ಳಲ್ಲ ಬಲು ದಿಟವು

ಹಸಿವು ಕಾಡುತಲಿತ್ತು

ಅಪ್ಪ-ಅಮ್ಮನಾ ಬಿಳಿಚಿದಾ ಮುಖದಲ್ಲಿ

ನೋವು ಮನೆ ಮಾಡಿತ್ತು||

ದಿನರಾತ್ರಿ ದುಡಿದರೂ

ಅರೆಹೊಟ್ಟೆ ಅರೆ ಬಟ್ಟೆ

ದುಡಿದುಡಿದು ದೇಹ

ಕೃಷವಾಗಿ ಬಿತ್ತು||

ವಾರಾನ್ನ ಬಿಕ್ಷಾನ್ನ ಊಟಮಾಡಿ

ಗೋಣಿ ಚೀಲವೆ ಸುಪ್ಪತ್ತಿಗೆಯಾಗಿ

ಅವರಿವರು ಕೊಟ್ಟ  ಹಳೆಬಟ್ಟೆ ಯುಟ್ಟು

ಓದು ಕಲಿತುದು ತುತ್ತು ಅನ್ನಕಾಗಿ||

ನೋವಿನಲು ನಲಿವಿತ್ತು

ಅನ್ನದಲಿ ರುಚಿ ಇತ್ತು

ಭಾವನೆಗೆ ಮನವು ಬಂಧಿಯಾಗಿತ್ತು

ನಾಳಿನ ನಿರೀಕ್ಷೆಯಲಿ ದಿನಗಳುರುಳಿತ್ತು||

"ಓ ನಿನ್ನೆ" ಎಲ್ಲಿ ಹೋದೆ ನೀನು?

ನಿನ್ನ ನೆನಪಿನಲಿ

ನಗುನಗುತಲೆ  ಕಳೆಯುವೆ

ಈ ದಿನವ ನಾನು||