ಕೆಂಪು ಮೋಡಗಳು

ಕೆಂಪು ಮೋಡಗಳು

ಸ್ತಬ್ದವಾಗಿ ಕಾಲು ಬುಡದಲ್ಲಿ ಬಿದ್ದಿದ್ದ

ಹಾದಿಯ ತುಂಭಾ ಹಾಹಾಕಾರವೆದ್ದಿದೆ.

ನಿತ್ಯ ಹೋಮದ ಹಾಗೆ ನಾನಾ ಪ್ರಕಾರದ

ಹೋಮಗಳಿಗೆ ಅಜ್ಯಗಳು ಯಥೇಚ್ಛವಾಗಿ ಸಿಗುತ್ತಿವೆ.

ಕಲಕಿದ ನಿಶ್ಯಬ್ದಕ್ಕಿತ್ತ ರಣ ಕಹಳೆಯ ಉದ್ದೀಪನೆಯ ಮಾತುಗಳು

ಫಲ ಕೊಡುವ ಅನ್ನದ ಬಟ್ಟಲನ್ನು ಕಸಿದು ಚೆಲ್ಲಾಡುತ್ತಿವೆ.

ಮೈ ಬೆವರಿನಲ್ಲೂ ಅಡರಿಕೊಂಡ ಈರ್ಷ್ಯೆ ಒಸರಿಕೊಂಡಾಗ

ಸಂಧಿ ಕಾದು ಸಿಕ್ಕಿದವರನ್ನು ಕಾದು ಇರಿಯುತ್ತಲಿದೆ.

ಎಲ್ಲಿಯೆಂದು ತಿಳಿಯದ ಹಾಗೆ ವಿಷದ ಬೆಂಕಿ ಬಿದ್ದಿದೆ

ತಾಯಂದಿರ ಶಾಪಗಳು ಮುಗಿಲು ಮುಟ್ಟುತ್ತಿದೆ.

ನೀಲಿ ಮೋಡಗಳ ಸಾಲಿನಲ್ಲಿ

ಕೆಂಪು ಮೋಡಗಳು ವಿರಾಜಮಾನವಾಗಿವೆ.

********

ಪ್ರೀತಿಯ ಕುಸುಮಗಳು

ಅವಳ ಕಣ್ಣುಗಳಲ್ಲಿ

ದಿನದಿಂದ ದಿನಕ್ಕೆ

ಪ್ರೀತಿಯ ಕುಸುಮಗಳು

ದಟ್ಟವಾಗಿ ಅರಳುತ್ತಿವೆ.

ಅವನ ಸ್ವಪ್ನದಂತಹ ದಿನಗಳು

ಸಾಕಾರಗೊಳ್ಳುತ್ತಿದೆ ಅವಳೆದೆಯ ಕನಸಿನಲ್ಲಿ

ಅವನು ಈ ಮಳೆಯ ನಡುವೆಯೂ

ತಂತಿಯೊಂದನ್ನು ಹಿತವಾಗಿ ಮೀಟುತ್ತಿದ್ದಾನೆ.

ಅಲ್ಲಿ ಅವನ ರಾಗಕ್ಕೆ

ಕಾಲಮಾನವೇ ತಿಳಿಯದಾಗಿದೆ.

ಈಗಲಾದರೂ ನನ್ನ ನೆಲದಲ್ಲಿ

ಶಾಂತಿ ಸ್ಥಿರಗೊಳ್ಳಬಹುದು.