ಹಾರುವ ನೌಕೆ
ಹಾರುವ ನೌಕೆ
ಜಗತ್ತಿನ ಅತ್ಯಂತ ವೇಗದ ನೌಕೆ ಹೈಡ್ರೋಪ್ಟಿಯರ್.ಇದು ಗಂಟೆಗೆ ನೂರು ಕಿಲೋಮೀಟರಿನಷ್ಟು ವೇಗವಾಗಿ ನೀರಿನ ಮೇಲೆ ಸಾಗಬಲ್ಲುದು.ನಿಜವಾಗಿ ಹೇಳಬೇಕಾದರೆ,ಇದು ನೀರಿನ ಮೇಲ್ಮೈಗಿಂತ ತುಸು ಎತ್ತರದಲ್ಲಿ "ಹಾರು"ತ್ತದೆ.ಫ್ರೆಂಚ್ ನಾವಿಕ ಅಲನ್ ಥೆಬಾಲ್ಟ್ ಇದರ ತಯಾರಿಯ ಹಿಂದಿರುವ ವ್ಯಕ್ತಿ.ಮುಂದೆ ಇಡೀ ಜಗತ್ತನ್ನು ಈ ನೌಕೆಯಲ್ಲಿ ನಲುವತ್ತು ದಿನಗಳೊಳಗೆ ಸುತ್ತುವುದು ಈತನ ಕನಸು.ನೀರಿನೊಳಗೆ ಅಡಗಿರುವ ರೆಕ್ಕೆಗಳಂತಹ ರಚನೆಗಳು ನೌಕೆಯನ್ನು ಎತ್ತಿ ಹಿಡಿದು "ಹಾರಲು" ನೆರವಾಗುತ್ತದೆ.ನೌಕೆಯು ಹದಿನೆಂಟು ಮೀಟರ್ ಅಗಲ ಮತ್ತು ಇಪ್ಪತ್ತನಾಲ್ಕು ಮೀಟರ್ ಉದ್ದವಿದೆ.ನೀರಿನ ಸ್ಪರ್ಶ ಕಡಿಮೆಯಾಗುವ ಮೂಲಕ ನೀರಿನ ಸೆಳೆತ ಕಡಿಮೆಯಾಗುವುದು ಈ ನೌಕೆಯ ವೇಗಕ್ಕೆ ಕಾರಣವಾಗುತ್ತದೆ.ಕಳೆದವರ್ಷ ನೌಕೆಯನ್ನು ನಿರ್ಮಿಸಲಾಗಿತ್ತಾದರೂ ಗಂಟೆಗೆ ನೂರಹನ್ನೊಂದು ಕಿಲೋಮೀಟರ್ ಸಾಗುವ ಯತ್ನದಲ್ಲಿ ನೌಕೆ ಮುಳುಗಿತ್ತು.ನಂತರ ಪ್ರತಿಗಂಟೆಗೆ ನೂರು ಕಿಲೋಮೀಟರ್ ವೇಗದಲ್ಲಿ ಐನೂರು ಮೀಟರ್ ದೂರ ಸಾಗಿ,ಅತಿ ವೇಗದ ನೌಕೆ ಎಂದೆನಿಸಿಕೊಂಡಿತ್ತು.ಮೂವತ್ತು ಮೀಟರ್ ಉದ್ದಗಲದ ಮ್ಯಾಕ್ಸಿ ಹೈಡ್ರ‍ಾಪ್ಟಿಯರನ್ನು ನಿರ್ಮಿಸಿ,ಹತ್ತು ನಾವಿಕರ ಜತೆ ನೌಕೆಯ ವಿಶ್ವಯಾನಕ್ಕೆ ತಯಾರಾಗುವತ್ತ ಅಲೆನ್‌ನ ದೃಷ್ಟಿ ನೆಟ್ಟಿದೆ.ಮೂರುವರ್ಷಗಳಲ್ಲಿ ನೌಕೆ ಸಿದ್ಧವಾಗಬಹುದೆಂದು ಆತನ ಅಂದಾಜು.ಹಾಗೆಯೇ ಮುಂದಿನ ವರ್ಷದಲ್ಲಿ, ಶಾಂತಸಾಗರವನ್ನು ಮೂರುದಿವಸಗಳೊಳಗೆ ದಾಟುವುದೀತನ ಇನ್ನೊಂದು ಯೋಜನೆ.
---------------------------------------------------------------------
ಚೀನಾಕ್ಕೆ ಗೂಗಲ್ ಗುಡ್‌ಬೈ
ಚೀನಾದಲ್ಲಿನ್ನು ಗೂಗಲ್ ಶೋಧ ಸೇವೆ ಲಭ್ಯವಿರದು.ಚೀನಾದಲ್ಲಿ ಜಾರಿಯಲ್ಲಿರುವ ಬಿಗಿ ಸೆನ್ಸಾರ್‌ಶಿಪ್ ನೀತಿಯನ್ನು ವಿರೋಧಿಸಿ,ಗೂಗಲ್ ಚೀನಾದಿಂದ ಹೊರ ನಡೆಯುವ ತನ್ನ ನಿರ್ಧಾರವನ್ನು ಪ್ರಕಟಿಸಿದರೂ,ಅದಕ್ಕೆ ಇತರ ಕಂಪೆನಿಗಳ ಗಣನೀಯ ಬೆಂಬಲವೇನೂ ಸಿಕ್ಕಿಲ್ಲ.ಚೀನಾದ ನಾಗರಿಕರು ಶೋಧ ಸೇವೆ ಪಡೆದಾಗ ಬರುವ ಫಲಿತಾಂಶವನ್ನು ಜಾಲಾಡಿಸಿ,ಅದರಲ್ಲಿ ಚೀನಾದ ಸೆನ್ಸಾರ್‌ಶಿಪ್ ನೀತಿಗೆ ವಿರೋಧವಾದ ಅಂತರ್ಜಾಲ ತಾಣಗಳಿದ್ದರೆ,ಅವನ್ನು ಬಿಟ್ಟು ಉಳಿದವನಷ್ಟೇ ತೋರಿಸಬೇಕಿತ್ತು.ಅದನ್ನು ಗೂಗಲ್ ವಿರೋಧಿಸಿ,ಚೀನಾದಿಂದ ಹೊರನಡೆಯುವ ನಿರ್ಧಾರಕ್ಕೆ ಬಂತು.ಹಾಗೆಂದು ಚೀನೀಯರು ಗೂಗಲ್‌ಗೆ ಬೆಂಬಲವೇನೂ ವ್ಯಕ್ತಪಡಿಸುತ್ತಿಲ್ಲ.ಸರಕಾರದ ನಿಯಮಗಳನ್ನು ಪಾಲಿಸದ ಗೂಗಲ್ ಸೇವೆ ಇನ್ನು ಲಭ್ಯವಿಲ್ಲವಾದರೂ,ತಮಗೇನೂ ಬಾಧೆಯಾಗದು ಎಂದು ಅಲ್ಲಿನ ಜನರಲ್ಲಿ ಶೇಕಡಾ ತೊಂಭತ್ತು ಭಾಗ ಜನರ ಅಭಿಪ್ರಾಯವಾಗಿದೆ.ಚೀನೀಯರ ಯೋಚನಾಲಹರಿಯ ಮೇಲೆ ನಿಯಂತ್ರಣ ಸಾಧಿಸಲು ಅಲ್ಲಿನ ಸರಕಾರ ಸಫಲವಾಗಿರುವುದು ಸ್ಪಷ್ಟ.
----------------------------------------------------------------------
ಬಿಸಿಸುದ್ದಿ ಏನು?
ಟ್ವಿಟರ್ ತಾಣದಲ್ಲಿ ಜನರು ತಾಜಾ ಸುದ್ದಿಗಳನ್ನು ಚರ್ಚಿಸುವುದು ಸಾಮಾನ್ಯ.ಹಾಗಾಗಿ ಬಿಸಿಸುದ್ದಿಯನ್ನು ತಿಳಿಯಬೇಕಿದ್ದರೆ,ಟ್ವಿಟರಿನಲ್ಲಿ ಚರ್ಚಿತವಾಗುತ್ತಿರುವ ವಿಷಯಗಳ್ಯಾವುವು ಎಂದು ಅರಿಯುವುದು ಜಾಣತನ.ಬಿಂಗ್ ಎನ್ನುವ ಮೈಕ್ರೋಸಾಫ್ಟ್ ಕಂಪೆನಿಯ ಶೋಧ ಸೇವೆಯಲ್ಲಿ ಸದ್ಯ ಟ್ವಿಟರ್‌ನಲ್ಲಿ ಚಾಲ್ತಿಯಲ್ಲಿರುವ ಪದಪುಂಜಗಳನ್ನು ಪಟ್ಟಿ ಮಾಡುವ ಸೌಲಭ್ಯವಿದೆ.ಅದನ್ನು ಪಡೆಯಲು http://www.bing.com/twitter ಪುಟಕ್ಕೆ ಹೋದರೆ ಸರಿ.ಹಾಗೆಯೇ ಜನರು ಟೈಪಿಸುವ ಪದವನ್ನು ಹೊಂದಿದ ಪುಟಗಳನ್ನಷ್ಟೇ ನೀಡುವ ಬದಲಿಗೆ,ಆತನ ಉದ್ದೇಶವನ್ನು ಊಹಿಸಿ,ಆತನಿಗೆ ನೆರವಾಗಬಲ್ಲ ಪುಟಗಳನ್ನು ಪಟ್ಟಿ ಮಾಡಿ,ಸ್ಮಾರ್ಟ್ ಶೋಧ ಫಲಿತಾಂಶ ನೀಡಲೂ ಬಿಂಗ್ ಪ್ರಯತ್ನಿಸುತ್ತಿದೆ.ಉದಾಹರಣೆಗೆ "ಗಾಸಿಪ್ ಗರ್ಲ್" ಎನ್ನುವ ಪದಪುಂಜವನ್ನು ವ್ಯಕ್ತಿ ನೀಡಿದ್ದರೆ,ಆತ ಟಿವಿ ಧಾರಾವಾಹಿ ಅಥವಾ ಚಲನಚಿತ್ರದ ಬಗ್ಗೆ ಶೋಧಿಸುತ್ತಿದ್ದಾನೆ,ಆತನಿಗೆ ಅದರ ತಾರಾಗಣ,ವಿಡಿಯೋಕ್ಲಿಪ್ ಇತ್ಯಾದಿಗಳ ಬಗ್ಗೆ ಆಸಕ್ತಿ ಇರಬಹುದು ಎಂದು ಪರಿಗಣಿಸಿ,ಶೋಧ ಫಲಿತಾಂಶವನ್ನು ಪ್ರದರ್ಶಿಸಲಾಗುತ್ತದೆ.
-----------------------------------------------------------------------------
ಕಾರಿನ ಗಾಜಿಗೆ ಪ್ರತಿಫಲಿಸುವ ಪದರ ಲೇಪನ ಬೇಕೇ?
ನಮ್ಮಲ್ಲಿ ವಾಹನದ ಗಾಜುಗಳಿಗೆ ಪ್ರತಿಫಲಿಸುವ ಲೇಪನ ನೀಡುವುದಕ್ಕೆ ಪೋಲಿಸರ ವಿರೋಧವಿದೆ.ಕಾರಣ,ವಾಹನದೊಳಗಿರುವವರು ಗೋಚರಿಸದೆ,ಭದ್ರತಾ ಸಮಸ್ಯೆಗಳಾಗಬಹುದು ಎನ್ನುವುದು.ಆದರೆ ಕ್ಯಾಲಿಫೋರ್ನಿಯಾದಲ್ಲಿ ಅಂತಹ ಪದರವನ್ನು ಲೇಪಿಸುವುದನ್ನು ಕಡ್ಡಾಯ ಮಾಡುವ ಪ್ರಸ್ತಾವ ಇದೆ.ಇಂತಹ ಪ್ರತಿಫಲಿಸುವ ಪದರ,ಸೂರ್ಯನ ಕಿರಣಗಳನ್ನು ಪ್ರತಿಫಲಿಸುವ ಕಾರಣ,ವಾಹನ ಬಿಸಿಯಾಗುವುದು ಕಡಿಮೆಯಾಗುತ್ತದೆ.ವಾತಾನುಕೂಲಿ ವ್ಯವಸ್ಥೆಯ ಮೇಲಿನ ಒತ್ತಡ ಕಡಿಮೆಯಾಗಿ,ವಾಹನ ಬಳಸುವ ಇಂಧನದ ಪ್ರಮಾಣ ಕಡಿಮೆಯಾಗುತ್ತದೆ ಎನ್ನುವುದು ಲೆಕ್ಕಾಚಾರ.ಆದರೆ ಇಂತಹ ಲೇಪನ ಸೆಲ್‌ಪೋನ್ ಸಂಕೇತಗಳ ಸ್ವೀಕಾರಕ್ಕೂ ಅಡ್ಡಿಯಾಗಬಹುದು ಎನ್ನುವ ಕಾರಣ,ಸದ್ಯಕ್ಕೆ ಲೇಪನ ಕಡ್ಡಾಯ ಮಾಡುವುದನ್ನು ಮುಂದೂಡಲಾಗಿದೆ.
-----------------------------------------------------------------------------
ಸಂಶೋಧನೆಯಿಂದ ಧನಲಾಭ
ಕಂಪೆನಿಗಳು ಮತ್ತು ಸಂಸ್ಥೆಗಳು ಸಂಶೋಧನೆಗೆ ಖರ್ಚು ಮಾಡುವ ಹಣದ ಶೇಕಡಾ ಇನ್ನೂರರಷ್ಟಕ್ಕೆ ಕರವಿನಾಯಿತಿ ನೀಡುವ ಪ್ರಸ್ತಾವ ಸರಕಾರದ ಮುಂದಿದೆ.ತಂಬಾಕು,ಮದಿರೆ ಅಂತಹ ಆಯ್ದ ಕೆಲವು ಕಂಪೆನಿಗಳನ್ನು ಹೊರತು ಪಡಿಸಿ,ಉಳಿದೆಲ್ಲಾ ಕ್ಷೇತ್ರದ ಸಂಶೋಧನೆಗಾಗಿ ಮಾಡಿದ ಖರ್ಚಿಗೆ ಈ ಕರವಿನಾಯಿತಿ ಅನ್ವಯವಾಗಲಿದೆ.ಹಿಂದೆಯೂ ಕರವಿನಾಯಿತಿ ಸೌಲಭ್ಯ ಲಭ್ಯವಿದ್ದರೂ ಅದು ಕಂಪ್ಯೂಟರ್,ಬಯೋಟೆಕ್ನಾಲಜಿ,ವೈದ್ಯಕೀಯ ಮುಂತಾದ ಆಯ್ದ ಕೆಲವು ಕ್ಷೇತ್ರಗಳಿಗೆ ಮಾತ್ರಾ ಅನ್ವಯವಾಗಿತ್ತು.ಕರವಿನಾಯಿತಿ ಸೌಲಭ್ಯ ಸಿಗಲು,ಸಂಸ್ಥೆ ಅಥವಾ ಕಂಪೆನಿಯಲ್ಲಿ ಸಂಶೋಧನಾ ಚಟುವಟಿಕೆ ಅಗತ್ಯವಾದ ಮೂಲಸೌಕರ್ಯ ಲಭ್ಯವಿದ್ದು,ವೈಜ್ಞಾನಿಕ ಮತ್ತು ಕೈಗಾರಿಕಾ ಸಂಶೋಧನಾ ಇಲಾಖೆಯಿಂದ ಪ್ರಮಾಣಪತ್ರ ಪಡೆಯಬೇಕು.ಭಾರತದಲ್ಲಿ ಸಂಶೋಧನಾ ಚಟುವಟಿಕೆಗಳನ್ನು ಕೈಗೊಳ್ಳಲು ಪ್ರೋತ್ಸಾಹ ನೀಡುವ ಉದ್ದೇಶದ ಈ ನಿರ್ಧಾರ ಸ್ವಾಗತಾರ್ಹವಾದರೂ,ಕರವಿನಾಯಿತಿಗಾಗಿ ಸಂಶೋಧನಾ ಚಟುವಟಿಕೆಗಳ ಹೆಸರಿನಲ್ಲಿ ಸೌಲಭ್ಯದ ದುರುಪಯೋಗುವ ಸಾಧ್ಯತೆಯೂ ಇದೆ.
----------------------------------------------------------
ಇಲೆಕ್ಟ್ರಾನಿಕ್ ಅಂಡರ್‌ಪ್ಯಾಂಟ್
ಆಸ್ಟ್ರೇಲಿಯನ್ ಕಂಪೆನಿಯೊಂದು ಜಗತ್ತಿನಲ್ಲೇ ಮೊದಲ ಇಲೆಕ್ಟ್ರಾನಿಕ್ ಅಂಡರ್‌ಪ್ಯಾಂಟ್ ಅನ್ನು ತಯಾರಿಸಿದೆ.ಮೂತ್ರ ಅಥವ ಮಲವಿಸರ್ಜನೆ ನಿಯಂತ್ರಣವಿಲ್ಲದವರಿಗೆ ನೆರವು ನೀಡಲು ಈ ಪ್ಯಾಂಟ್ ಸಹಾಯಕ.ಇದನ್ನು ಧರಿಸಿದ ವ್ಯಕ್ತಿ ಮೂತ್ರ-ಮಲ ವಿಸರ್ಜಿಸಿದರೆ,ಇಲೆಕ್ಟ್ರಾನಿಕ್ ವ್ಯವಸ್ಥೆ ಇದನ್ನು ಪತ್ತೆ ಹಚ್ಚಿ,ಎಸ್ ಎಂ ಎಸ್ ಕಳುಹಿಸುತ್ತದೆ.ಎಸ್ ಎಂ ಎಸ್ ಸಂದೇಶ,ವ್ಯಕ್ತಿಯ ಜವಾಬ್ದಾರಿ ತೆಗೆದುಕೊಂಡವರಿಗೆ ರವಾನೆಯಾಗುವಂತೆ ಮಾಡಬಹುದು.ಆಗಾಗ ಬಂದು ಪರೀಕ್ಷಿಸಬೇಕಾದ ಅಗತ್ಯವನ್ನಿದು ಇಲ್ಲವಾಗಿಸುತ್ತದೆ.ನ್ಯೂಸೌತ್‌ವೇಲ್ಸಿನ ವೃದ್ಧಾಶ್ರಮವೊಂದರಲ್ಲಿ ಇದನ್ನು ಪರೀಕ್ಷಿಸಲಾಗುತ್ತಿದೆ.
-----------------------------------------------------------------
ಟೈಮ್ಸ್ ಅಂತರ್ಜಾಲ ಜಾಲಾಟ ಉಚಿತವಲ್ಲ!
ಜೂನ್ ನಂತರ ಟೈಮ್ಸ್ ಮತ್ತು ಸಂಡೇ ಟೈಮ್ಸ್ ಪತ್ರಿಕೆಗಳು ತಮ್ಮ ಅಂತರ್ಜಾಲ ಪತ್ರಿಕೆಯ ಜಾಲಾಟಕ್ಕೆ ದಿನವಹಿ ಒಂದು ಪೌಂಡ್ ಅಥವಾ ವಾರಕ್ಕೆ ಎರಡು ಪೌಂಡ್ ದರ ವಿಧಿಸಲು ನಿರ್ಧರಿಸಿದೆ.ರೂಪರ್ಟ್ ಮುರ್ಡೋಕ್‌ನ ಈ ಪತ್ರಿಕೆಯು ಇಂತಹ ನಿರ್ಧಾರ ಕೈಗೊಂಡ ಪತ್ರಿಕೆಗಳಲ್ಲಿ ಪ್ರಥಮವಾಗಿದೆ.ಆನ್‌ಲೈನ್ ಪತ್ರಿಕೆಯ ಜನಪ್ರಿಯತೆ ಹೆಚ್ಚಿ,ಮುದ್ರಿತ ಪತ್ರಿಕೆಯ ಪ್ರಸಾರದಲ್ಲಿ ಇಳಿಕೆ,ಜಾಹೀರಾತು ಆದಾಯದಲ್ಲಿ ಕಡಿತ ಕಾರಣಗಳಿಂದ ನಷ್ಟದಲ್ಲಿರುವ ಪತ್ರಿಕೋದ್ಯಮ ಕ್ಷೇತ್ರಕ್ಕೆ ಆರ್ಥಿಕ ಶಕ್ತಿ ನೀಡಲು ಈ ಕ್ರಮ ಅನಿವಾರ್ಯವಾಗಿತ್ತು ಎಂದು ಪತ್ರಿಕೆಯ ಮಾಲಕರಾದ ನ್ಯೂಸ್ ಇಂಟರ್ನ್ಯಾಶನಲ್ ಪ್ರಕಟಿಸಿದೆ.ಈ ವ್ಯವಹಾರ ಮಾದರಿ ಜನಪ್ರಿಯವಾದರೆ,ಉಳಿದ ಪ್ರಕಾಶನ ಸಂಸ್ಥೆಗಳೂ ಇದೇ ಹಾದಿ ತುಳಿಯಬಹುದು.
---------------------------------------------------------
ಬಿಬಿಎಂಪಿ ತಾಣ
ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯ ಚುನಾವಣಾ ಪ್ರಕ್ರಿಯೆ ಜಾರಿಯಲ್ಲಿದೆ.ಈ ಹೊತ್ತಿಗೆ ಮತದಾನವೂ ಮುಗಿದಿರುತ್ತದೆ.ಚುನಾವಣೆ,ಅಭ್ಯರ್ಥಿಗಳ ವಿವರಗಳು,ವಾರ್ಡುಗಳು,ಚುನಾವಣೆಯಲ್ಲಿ ಚರ್ಚಿತವಾಗಿರುವ ವಿಷಯಗಳ ಬಗ್ಗೆ ಅಂತರ್ಜಾಲ ತಾಣ ಲಭ್ಯವಿದೆ.ಅದನ್ನು http://bbmpelections.in ವಿಳಾಸದಲ್ಲಿ ನೋಡಬಹುದಾಗಿದೆ.ಮತ ಎಣಿಕೆಗಳ ವಿವರಗಳೂ ಲಭ್ಯವಾಗುವ ನಿರೀಕ್ಷೆಯಿದೆ.