ನಾನು ಓದಿದ ಆರ್. ಕೆ. ಲಕ್ಷ್ಮಣ್ ಅವರ ಆತ್ಮಕಥೆ 'Tunnel Of Time '

ಖ್ಯಾತ ವ್ಯಂಗ್ಯಚಿತ್ರಕಾರ ಆರ್. ಕೆ. ಲಕ್ಷ್ಮಣ್   ಅವರ ಆತ್ಮಕಥೆ  'Tunnel  Of Time '  ಇತ್ತೀಚಿಗೆ   ಓದಿದೆ .  ಅವರು ಆರ್.  ಕೆ. ನಾರಾಯಣ್  ಅವರ  ತಮ್ಮ  . ಮೈಸೂರಿನಲ್ಲಿ ಹುಟ್ಟಿ ಬೆಳೆದು ವ್ಯಂಗ್ಯಚಿತ್ರಕಾರನಾಗಿ  ಅಂತರರಾಷ್ಟ್ರೀಯ ಮಟ್ಟದಲ್ಲಿ ಹೆಸರು ಗಳಿಸಿದವರು.  ಬರಹದ ಶೈಲಿ  ತುಂಬಾ ಸರಳವಾಗಿದ್ದು  ಓದಿಸಿಕೊಂಡು  ಹೋಗುತ್ತದೆ .   ಬರಿ ಚಿತ್ರಕಲೆಯನ್ನು ಸಾಧಿಸಿದರೆ ಅಲ್ಲ . ಸುತ್ತಲಿನ ಬೆಳವಣಿಗೆಗಳ  ಬಗೆಗೆ ಆಸಕ್ತಿ , ತಿಳುವಳಿಕೆ, ಹಾಸ್ಯಮಯ ವಿಡಂಬನಾತ್ಮಕ ಒಳನೋಟವೂ ಬೇಕು . ತಮ್ಮ ಸುದೀರ್ಘ ಕಾಲದ ಅನುಭವವನ್ನು , ತುರ್ತು ಪರಿಸ್ಥಿತಿಯ ಕಾಲದ ವಾತಾವರಣವನ್ನು , ದೇಶವಿದೇಶಗಳ  ಹೆಸರಾಂತ ಜನರೊಂದಿಗಿನ     ಭೇಟಿಯನ್ನು   ಸುಲಲಿತವಾಗಿ ತಿಳಿಸಿದ್ದಾರೆ .    ತಮ್ಮ ಸಾಧನೆಯ  ಕ್ರೆಡಿಟ್ ಅನ್ನು  ಭಾರತದ ರಾಜಕಾರಣಿಗಳು , ಅಧಿಕಾರಶಾಹಿಗಳು  ಮುಂತಾದವರಿಗೂ  ಕೊಡುತ್ತಾರೆ !! .  ಹಿಂದಿನ ಕಾಲದಲ್ಲಿ  ರಾಜಕೀಯ ಘಟನೆಗಳಿಗೂ ,   ಹಗರಣಗಳಿಗೂ  ಒಂದು ಬಗೆಯ ಘನತೆ ,  ರಾಜಕಾರಣಿಗಳಿಗೆ ಸಂಕೋಚ ಇತ್ತು .  ಈಗೀಗ ದಿನವೂ ಅವೇ ಬಗೆಯ ಹಗರಣಗಳೇ ,  ಜನರಿಗೂ ಅಭ್ಯಾಸ ಆಗಿಬಿಟ್ಟಿದೆ , ವ್ಯಂಗ್ಯ ವಿಡಂಬನೆಗೆ ಅವಕಾಶವೇ ಇಲ್ಲ ಎನ್ನುತ್ತಾರೆ !      Mr. Common Man ( ಶ್ರೀಸಾಮಾನ್ಯ ) ನ ಕಲ್ಪನೆಯು ಸಾಕಾರವಾದ ಬಗೆಯನ್ನು ಇಲ್ಲಿ ಓದಬಹುದು . 

 ರಾಜೀವ್ ಗಾಂಧಿ ಕಾಲದ ಒಂದು ಘಟನೆ  ನಿಮ್ಮೊಂದಿಗೆ ಹಂಚಿಕೊಳ್ಳಬೇಕು ಅನ್ನಿಸಿತು.    ರಾಜೀವ್  ಸಾಮಾನ್ಯವಾಗಿ ಯಾವುದೇ ಪ್ರಶ್ನೆಗೂ '  ಐ   ವಿಲ್ ಲುಕ್ ಇನ್ ಟು ದಿ ಮ್ಯಾಟರ್  '  ಅನ್ನುತ್ತಿದ್ದರಂತೆ .    ಒಂದು ಸಲ    ಲಕ್ಷ್ಮಣ್  ರಾಜೀವ್ ಅವರನ್ನು ಭೇಟಿಯಾಗುವ ಪ್ರಸಂಗ ಬಂದು ಆಗ ರಾಜೀವ್ ' ನೀವು ನನ್ನನ್ನು  ಸ್ವಲ್ಪ ದಪ್ಪ ಚಿತ್ರಿಸುತ್ತಿದ್ದಿರಿ ' ಅಂತ  ಆಕ್ಷೇಪಿಸಿದರಂತೆ .  ಆಗ    ಲಕ್ಷ್ಮಣ್  '  ಐ   ವಿಲ್ ಲುಕ್ ಇನ್ ಟು ದಿ ಮ್ಯಾಟರ್  '  ಅಂದು ಬಿಟ್ಟರಂತೆ !  ಸುತ್ತಲಿದ್ದ ಜನ  ಕಿಸಕ್ಕೆಂದು ನಕ್ಕುಬಿಟ್ಟರು !!

ಅವರ ಅಣ್ಣ   ಆರ್.  ಕೆ. ನಾರಾಯಣ್  ಅವರು ಮೈಸೂರಲ್ಲಿ ಹುಟ್ಟಿ ಬೆಳೆದರೂ  ಅವರ  ಕತೆ ಕಾದಂಬರಿಗಳಲ್ಲಿ  ಎಲ್ಲೂ  ಕನ್ನಡ  ಕಾಣುವುದಿಲ್ಲ .  ಅವರ ಬರಹದಲ್ಲಿ ತಮಿಳು ಪಂಚಾಂಗ , ತಮಿಳು ಸಿನಿಮ , ತಮಿಳು  magazine  ಗಳೇ  ಕಂಡು ಬಂದಿವೆ ನನಗೆ .  ಆರ್. ಕೆ. ಲಕ್ಷ್ಮಣ್   ರ ಆತ್ಮಚರಿತ್ರೆಯಲ್ಲಿ  ಅನೇಕ ಸಲ ಕನ್ನಡ ಪ್ರಾಸಂಗಿಕವಾಗಿ ಬಂದಿದೆ .

ಈ  ಪುಸ್ತಕ   ಪೆಂಗ್ವಿನ್  ಬೆಳಕಿಗೆ ತಂದಿರುವುದು .      ಸಿಕ್ಕರೆ  ಓದಿ.

( ಅವರು ಕೆಲವು ಕಾದಂಬರಿಗಳನ್ನೂ  ಬರೆದಿದ್ದಾರಂತೆ  , ಸಿಕ್ಕರೆ  ಖಂಡಿತ ಓದುವೆ. )