ಮಗೂ, ಅಂದು ನಾ ದಾರಿ ಬಿಡುವೆ!

"ನಿನ್ನ ಮೋಹದಿ ನನ್ನ ಬಂಧಿಸಿ
ಈ ಕತ್ತಲಲಿ ಕೂರಿಸದಿರು
ಅಪ್ಪಾ ಬೆಳಕಿಗೆ ಮೈಯೊಡ್ಡುವೆ ದಾರಿಬಿಡು"

"ಸುಳ್ಳಲ್ಲ ಮಗು ನಿನ್ನ ಮಾತು
ಅಪ್ಪಂದಿರ ಆಂತರಿಕ ಆತಂಕ
ಇಂದಿನ ಮಗುವಿಗೆ ಹೇಗೆ ಅರಿವಾಗಬೇಕು

ಮಗೂ ಸ್ವಾತಂತ್ರ್ಯ ಬೇಕು
ಸ್ವತಂತ್ರರಿಗೂ ಬೇಲಿ ಬೇಕು
ಸ್ವಾತಂತ್ರ್ಯದ ಪರಿಧಿಯಲಿ ನಿನ್ನಪ್ಪನಿರಬೇಕು

ಎಲ್ಲವನೂ ಹರಿದೊಗೆದು
ಒದ್ದು ನಡೆದರೆ ಮುಂದೆ
ಸಮಾಜದ ಮುಂದೆ ಬತ್ತಲಾಗಿ ನಿಲಬೇಕು

ನಿನ್ನ ಅರಿವಿನ ಮಟ್ಟ
ನೀನರಿತದ್ದೇ ಅಲ್ಲ ಈ ಅಪ್ಪನೂ
ಅರಿಯಬೇಕು ಅರಿತಂದು ನಿನಗೀತ ದಾರಿ ಬಿಡಬೇಕು"
****************
ಆತ್ರಾಡಿ ಸುರೇಶ ಹೆಗ್ಡೆ