ಯಾರು ಯಾರಿಲ್ಲಿ?

ಫ್ಯಾಷನ್ ಶೋನಲ್ಲಿ

 ಹಾಕಲೇ ಇಲ್ಲವೆಂಬಂತೆ

ಬಟ್ಟೆ ತೊಟ್ಟು ಜಗಕ್ಕೆ ಮೈಯೊಡ್ಡುವ 

ಚರ್ಮ ಎಲುಬುಗಳ ಸುಂದರಿಯರು(?);

ದಾರಿಯ ಬದಿಯಲ್ಲಿ

ಬಟ್ಟೆಯೇ ನೋಡದ 

ರಸ್ತೆ ಅಗೆಯುವ ಕಾರ್ಮಿಕಳ 

ಆ ಸಣ್ಣ ಮಗು 

ನಗ್ನ ಯಾರಿಲ್ಲಿ??

ಹಾರ್ಲೆಕ್ಸ್, ಬೂಸ್ಟ್ ಕುಡಿದು

ಅನುದಿನ ಓದಿ ಕಲಿತು

ಪ್ರಥಮ ಪ್ರಶಸ್ತಿ ಗಿಟ್ಟಿಸಿದ 

ಬೋರ್ಡಿಂಗ್ ಶಾಲೆಯ ವಿದ್ಯಾರ್ಥಿ;

ಹೆತ್ತವರ ಮುಖವೇ ನೋಡದ

ಕ್ರೂರ ಜಗವನು ಮೆಟ್ಟಿ ನಿಂತು 

ದಿನ ದಿನ ಬದುಕುಳಿದ

ಆ ಬೂಟ್ ಪಾಲಿಷ್ ಹುಡುಗ

ಪ್ರತಿಭಾವಂತ ಯಾರಿಲ್ಲಿ??

ಕೋಟಿಗಳನ್ನು ನುಂಗಿ ಜೀರ್ಣಿಸಿ

 ಚಪ್ಪಲಿ ಹಾಕದೇ, ಮನೆ ಮನೆಗೆ ಹೋಗಿ

ಕೈಮುಗಿದು, ಕೃತಕವಾಗಿ ನಕ್ಕು

ಅಧಿಕಾರ ಗದ್ದುಗೆಗೇರಿದ ಮಂತ್ರಿ;

ಜನನಿಬಿಡ ದಾರಿಯಲ್ಲಿ

ಒಂದು ಹೊತ್ತಿನ ಬ್ರೆಡ್ದಿಗಾಗಿ

ಶಾಲು ಹರಡಿ ಮೌನವಾಗಿ ಕುಳಿತಿರುವ

ಆ ಅಂಗವಿಕಲ

ಭಿಕ್ಷುಕ ಯಾರಿಲ್ಲಿ??

ದೇವನ ಹೆಸರಿನಡಿಯಲ್ಲಿ

ತನ್ನ ಕಾಮದ ಗರಡಿಯಲ್ಲಿ

ಅಶ್ಲೀಲತೆ ಮೆರೆಯುವ ಸ್ವಾಮಿ;

ಅಲ್ಪ ಸಾಲ ತೀರಿಸಲಾಗದೆ

ಆತ್ಮಸಾಕ್ಷಿಯು ಬೆಂಬಿಡದೆ ಕಾಡಿ

ಆತ್ಮಹತ್ಯೆಗೆ ಶರಣಾದ

ಆ ಬಡ ರೈತ

ನಿಷ್ಠ ಯಾರಿಲ್ಲಿ??

ಸಹಸ್ರಾರು ಕೋಟಿ, ನೂರಾರು-

ಕಂಪೆನಿಗಳು, ವಶದಲಿದ್ದರೂ

ಉಳಿದುದೊಂದು ನನಗೇ ಬೇಕೆಂದು

ಕಚ್ಚಾಡುತ್ತಿರುವ ಸಹೋದರರು;

ದಿನವಿಡೀ ಬೆವರು ಸುರಿಸಿ

ದುಡಿದು ತಂದ ರೊಟ್ಟಿಯನ್ನು

ಸಮಪಾಲು ಹಂಚಿ, ಉಂಡು ಮಲಗುವ

ಆ ಜೋಪಡಿ ಕುಟುಂಬ

ಬಂಧು ಯಾರಿಲ್ಲಿ??

-ಶಫಿ