ಹೀಗಿರಬೇಕಿತ್ತು

ಜಳಜಳನೆ ಹರಿವ ನೀರಿಗೆ ತಡೆ ಬೇಕಿರಲಿಲ್ಲ

ಗುರಿ ಕಡಲಾದರೂ
ಒಡಲಿಗೆ ತಂಪ ಕೊಡಬೇಕಿತ್ತು!

ಸ್ಪೂರ್ತಿ ನೀಡುವ ಪ್ರಕೃತಿಗೆ
ಬರ ಬೇಕಿರಲಿಲ್ಲ.
ಆಕಾಶ ಬರಿದಾಗಿದ್ದರೂ
ಇಳೆ ತುಂಬಾ ಹಸಿರಿರಬೇಕಿತ್ತು!

ಕನಸ ಮಾರುವ ಹುಡುಗಿಗೆ
ಅಳು ಬೇಕಿರಲಿಲ್ಲ.
ಕಣ್ತುಂಬಾ ಕತ್ತಲಿದ್ದರೂ
ಮನದ ತುಂಬಾ ಬೆಳಕಿರಬೇಕಿತ್ತು!

ಆಘಾತ ಕಂಡ ಮನಸಿಗೆ ಪದೇ ಪದೇ
ನೋವು ಬೇಕಿರಲಿಲ್ಲ.
ಸುಖವಿಲ್ಲದಿದ್ದರೂ
ನಿರಾಶೆಯ ತಡೆವ ಹೃದಯವಿರಬೇಕಿತ್ತು!

ಲವಲವಿಕೆಯ ಜೀವಕೆ
ಸತ್ಯ ಕಂಡಿರಲಿಲ್ಲ
ಸಾವು ಖಂಡಿತವಾದರೂ
ಬದುಕನ್ನು ಪ್ರೀತಿಸುವ ಕಲೆ ಗೊತ್ತಿರಬೇಕಿತ್ತು!