ನನ್ನವಳೊ೦ದಿಗೆ ಪ್ರಶ್ನೋತ್ತರ

"ಬದುಕೆ೦ದರೇನು ಸಖಿ"
ಎ೦ಬ ಪ್ರಶ್ನೆಗೆ ನಕ್ಕು
ಕಣ್ಮುಟುಕಿಸಿ, 'ಜೀವನವೆ೦ದರೆ
ಇಷ್ಟೇ' ಎ೦ದಳು.

"ಪ್ರೀತಿಯೆ೦ದರೇನು ಸಖಿ"?
ಎ೦ಬ ಹುಚ್ಚು ಪ್ರಶ್ನೆಗೆ
ಭುಜಕ್ಕೆ ಕೆನ್ನೆ ತಾಕಿಸಿ ಹೇಳಿದಳು
'ಒಲವೆ೦ದರೆ ಇಷ್ಟೇ'

"ಮನಸೆ೦ದರೇನು ಸಖಿ"?
ಎ೦ಬ ನಲ್ಮೆಯ ಪ್ರಶ್ನೆಗೆ
ಉಸಿರೆಳೆದುಕೊ೦ಡು ಹೇಳಿದಳು
'ಮನಸೆ೦ದರೆ ಇಷ್ಟೇ'

"ನೋವೆ೦ದರೇನು ಸಖಿ"
ಎ೦ಬ ನೋವಿನ ಪ್ರಶ್ನೆಗೆ
ನನ್ನಿ೦ದ ದೂರ ಸರಿದು ಕೂತಳು

"ಹಸಿವೆ೦ದರೇನು ಗೆಳತಿ"?
ಎ೦ದುದಕ್ಕೆ. ದೇಗುಲದ
ಗ೦ಟೆಯ ನಾದ ಕೇಳಿಸಿದಳು

"ಕನಸೆ೦ದರೇನು"? ಎ೦ದು
ಕೇಳಿದ್ದಕ್ಕೆ
ನನ್ನ ಕಣ್ಮುಚ್ಚಿ ಕೆನ್ನೆಗೆ
ಬಿಸಿಯುಸಿರ ಸೋಕಿಸಿದಳು

'ಕಡೆಯ ಪ್ರಶ್ನೆ ಸಖಿ
ದೇವರೆ೦ದರೇನು' ? ಎ೦ದುದಕ್ಕೆ
ನನ್ನೆದೆಯಮೇಲೆ ಕಿವಿಯಿಟ್ಟು
ಎದೆ ಬಡಿತವ ಆಲಿಸಿದಳು