ಚಿ.ರಾ .........ಮತ್ತು ಚಿ.ಸೌ...............

ಹಿಂದಿನ ಋಷಿ ಮುನಿಗಳು ಶಾಪ ಕೊಟ್ಟ ಕಥೆಗಳು ನಮಗೆಲ್ಲ ಗೊತ್ತೇ ಇವೆ. ಶಾಪ ಕೊಡುವುದರಲ್ಲೇ ಆಗ್ರ ಪಂಕ್ತಿಯಲ್ಲಿದ್ದವರು  ದುರ್ವಾಸ ಮತ್ತು ವಿಶ್ವಾಮಿತ್ರರು. ಇಬ್ಬರಿಗೂ ಭಯಂಕರ ಕೋಪ ಮತ್ತು ಭಲೇ ego ಪಾರ್ಟಿಗಳು.

ಗೌತಮರ ಶಾಪದಿಂದ ಅಹಲ್ಯೆ ಕಲ್ಲಾದಳು, ಶಾಪ ವಿಮೋಚನೆಯ ನಂತರ ಬದುಕಿನಲ್ಲಿ ಜಿಗುಪ್ಸೆ ಬಂದು ಸ್ವಯಂ ಪ್ರೇರಣೆಯಿಂದ ಮತ್ತೆ ಕಲ್ಲಾದಳು ಎಂಬುದನ್ನು ಮೊನ್ನೆಯಷ್ಟೆ ಓದಿದ್ದೇವೆ.

ನಮ್ಮ ಹಿರಿಯರು ಹೇಳುತ್ತಿದ್ದನ್ನು ಸ್ವಲ್ಪ ನೆನಪಿಸಿಕೊಳ್ಳೋಣ , ಕೆಟ್ಟದ್ದನ್ನು ನುಡಿಯಬೇಡ ಆಸ್ತು ದೇವತೆಗಳು ಆಕಾಶ ಮಾರ್ಗದಲ್ಲಿ ಆಸ್ತು ಎಂದು ಓಡಾಡುತ್ತಿರುತ್ತಾರೆ , ನೀನು ಹೇಳಿದ್ದಕ್ಕೆ ಅವರು ಆಸ್ತು ಅಂದರೆ ಆಮೇಲೆ ಅದೆಲ್ಲ ನಿಜವಾಗುತ್ತದೆ, ಹೌದೆ ??

ಒಂದ್ನಿಮ್ಷ ಬೇರೆ ತರ ಯೋಚನೆ ಮಾಡೋಣ ಈ ಎಲ್ಲಾ ಅದ್ಭುತವಾದ ಪವರ್ ಅಥವಾ ಶಕ್ತಿಗಳು ನಮ್ಮ ಕಲಿಯುಗದ ಜನರಿಗೆ ಸಿಕ್ಕಿದ್ದರೆ ಎನಾಗಬಹುದಿತ್ತು, ನಮ್ಮ ಮಕ್ಕಳೆಲ್ಲರೂ ಕತ್ತೆ , ನಾಯಿ , ಕುದುರೆ , ಜಿರಳೆ  ಅಂತ ಬೈಯ್ಯುತ್ತಿರುತ್ತಾರೆ ಇವೆಲ್ಲಕ್ಕೂ ಆಸ್ತು ದೇವತೆಗಳು ಆಸ್ತು ಅಂದ್ಬಿಟ್ರೆ ಏನ್ರೀ ಗತಿ.

ಎಲ್ಲೋ ಓದಿದ ನೆನಪು ಮನುಷ್ಯ ಜನ್ಮವನ್ನು ಬೇಡಬಾರದು, ಮನುಜ ಜನ್ಮವೆಂಬುದು ಸೃಷ್ಟಿಯೊಳಗೆ ಅತೀ ಕೀಲು ಜನ್ಮ, ಎಷ್ಟು ಸತ್ಯವೋ ಗೊತ್ತಿಲ್ಲ ಆದರು ನಮ್ಮ ಹಿರಿಯರು ಆಶೀರ್ವಾದ ಮಾಡುವಾಗ ಈಗಲೂ ದೀರ್ಘ ಸುಮಂಗಲಿಭವ - ಎಷ್ಟು ವರ್ಷ ಸುಮಂಗಲಿಯಾಗಿರಬೇಕು, ಗಂಡ ಮತ್ತು ಆಕೆಯ ಮಧ್ಯೆ ವಯಸ್ಸಿನ ಅಂತರ ಸ್ವಲ್ಪ ಜಾಸ್ತಿ ಇದ್ದರೆ ಆ ಯಪ್ಪನ ಗತಿ ಅಷ್ಟೇ !

ಇನ್ನು ಹುಡುಗರಿಗೆ ದೀರ್ಘಯುಷ್ಮಾನ್ಭವ ಏನ್ರೀ ಈ ಆಶೀರ್ವಾದಗಳು, ಇನ್ನು ಸ್ವಲ್ಪ ಗೊಂದಲ ಉಂಟುಮಾಡುವವು ಇಲ್ಲಿವೆ ನೋಡಿ ಲಗ್ನಪತ್ರಿಕೆಯಲ್ಲಿ ಚಿ.ರಾ ..........ಮತ್ತು ಚಿ. ಸೌ ............. ಅಂದರೆ ಇಬ್ಬರು ಚಿರಂಜೀವಿಗಳು ಇವ ರಾಜಶೇಖರ ಮತ್ತು ಅವಳು ಸೌಭಾಗ್ಯವತಿ, ಅಂದರೆ ಇವಳು ಸಾಯುವವರೆಗೂ ಅವನು ಸಾಯುವ ಆಗಿಲ್ಲ , ಏನೇ ಬಂದರು ಸಹಿಸಿಕೊಳ್ಳಬೇಕು, ಸೌಭಾಗ್ಯವತಿ ಅನ್ನೋ ಆಶೀರ್ವಾದ ಫಲಿಸಿ ಅವಳೇ ಮೊದಲು ಮರಣ ಹೊಂದಿದರೆ ಆಕೆಗೆ ಮಾಡಿದ ಚಿರಂಜೀವಿ ಅನ್ನೋ ಆಶೀರ್ವಾದ ಸುಳ್ಳೇ. ಆದರು ಈ ಚಿರಂಜೀವಿಯಾಗುವುದು ಬೇಕೇ .

ಗಂಧರ್ವರಿಗೆ ನೂರಾರು ವರ್ಷಗಳಿಂದ ಯೌವನದಲ್ಲೇ ಇದ್ದು ಬೋರ್ ಆಗಿಲ್ವೆ , ಇವರ ಮೊಮ್ಮಕ್ಕಳು ಮದುವೆಯಾದರು ಇವರು ಯೌವನದಲ್ಲೇ ಇದ್ದರೆ ಹಾಸ್ಯಸ್ಪದವಲ್ಲವೇ, ಇವರು ನಿಸರ್ಗದತ್ತವಾಗಿ ನಡೆಯುವ ಬದುಕಿನ ಏರಿಳಿತಗಳ ಅನುಭವಗಳನ್ನು ಕಳೆದುಕೊಂಡರೆ.

" ಪರಂಪರೆ ಬಿಟ್ಟದ್ದು , ಅಂಧಶ್ರದ್ದೆ ಇಟ್ಟದ್ದು"

ಅಂದರೆ ಇವೆಲ್ಲ ಸುಳ್ಳೇ ?, ಇವೆಲ್ಲ ಕಥೆಗಳು ನಮ್ಮ ಪೂರ್ವಿಕರು ನಮಗೆ ಹೇಳಿದವಲ್ಲವೇ ಮತ್ತು ಅವರು ಬಿಟ್ಟು ಹೋದ ಪರಂಪರೆಯಲ್ಲವೇ.

"ಸತ್ಯವೇ ನಮ್ಮ ತಾಯಿ ತಂದೆ, ಸತ್ಯವೇ ನಮ್ಮ ಬಂಧುಬಳಗ" ಅನ್ನೋ ಕಾಲದಲ್ಲಿ ಬದುಕಿದ ನಮ್ಮ ಹಿರಿಯರು ನಮಗೆ ಸುಳ್ಳು ಹೇಳಿದರೆ.

ಗೊಂದಲವೋ ಗೊಂದಲ ???

ಏನೇ ಆಗಲಿ ನಿಮ್ಮೆಲ್ಲರಿಗೂ ನಂದು ಒಂದು ಆಶೀರ್ವಾದ ....

ಎಲ್ಲಾ ಗಂಡಸರಿಗೆ - ಚಿರಂಜೀವಿ ರಾಜಶೇಖರನಿಗೆ ದೀರ್ಘಯುಷ್ಮಾನ್ಭವ

ಎಲ್ಲಾ ಹೆಂಗಸರಿಗೆ - ಚಿರಂಜೀವಿ ಸೌಭಾಗ್ಯವತಿಗೆ  ದೀರ್ಘಯುಷ್ಮಾನ್ಭವ