ಋಣಿ

ತನ್ನ ಒಡಲಲ್ಲಿ ಬಚ್ಚಿಟ್ಟುಕೊಂಡು ಸಲಹಿದ ಕಡಲಿಗೆ ಆ ಮುತ್ತು ಋಣಿ

ತನ್ನ ರಸವನ್ನೇ ಉಣಬಡಿಸಿದ ಹೂವಿಗೆ ಆ ದುಂಬಿ ಋಣಿ

ತನ್ನ ಮಡಿಲಲ್ಲಿ ಗೂಡಿಗೆ ಜಾಗ ಕೊಟ್ಟ ಮರಕ್ಕೆ ಆ ಹಕ್ಕಿ ಋಣಿ

ತಾನು ಸಲಹಿದ ಬಿಂದು ಮುತ್ತಾಯಿತೆಂಬ ಭಾವಕ್ಕೆ ಕಡಲು ಯಾರಿಗೆ ಋಣಿ

ತಾನು ಸಿಹಿ ಹಣ್ಣು ಆದೆನೆಂಬ ಸಾರ್ಥಕತೆಗೆ ಹೂವು ಯಾರಿಗೆ ಋಣಿ

ಒಂಟಿಯಾದ ಹೆಮ್ಮರಕ್ಕೆ ಹಾಡಿ ಮುದ ನೀಡಿದ ಹಕ್ಕಿಗೆ ಯಾರು ಋಣಿ

ನನ್ನೊಳಗೆ ನೀನಿರಿಸಿದ ಚೇತನಕ್ಕೆ ನಾನೂ....?

ಆ ಚೇತನಕ್ಕೆ ಮಾಧ್ಯಮವಾದ ನನಗೆ ಅದೋ.... ?

ನಮ್ಮಿಬ್ಬರ ಮಿಲನ ಮಾಡಿಸಿದ ನಿನಗೆ ನಾವೋ.....?

ನಿನ್ನನ್ನು ಆರೆಸಿ ಹೊರಟಿಹ ನಮಗೆ ನೀನೋ.....?