ದೇವರಿದ್ದಾನೆ ಅನ್ನೋದಕ್ಕೆ ಏನು ಸಾಕ್ಷಿ ಅಂದರೆ .....

ಕಾಣದ ದೇವರು ಊರಿಗೆ ನೂರು, ಕಾಣುವ ತಾಯೇ ಪರಮಗುರು -ಒಂದು ಹಾಡು

ಕೆಟ್ಟ ಮಗನು ಇರಬಹುದು , ಕೆಟ್ಟ ತಾಯಿ ಇರುವದಿಲ್ಲ -ಶಂಕರಾಚಾರ್ಯರು

ದೇವರಿದ್ದಾನೆ ಅನ್ನೋದಕ್ಕೆ ಏನು ಸಾಕ್ಷಿ ಅಂದರೆ ತಾಯಿ, ತಾಯಿ ಅನ್ನೋ ಪದ ಇದೆ ನೋಡಿ ಲೋಕದಲ್ಲಿ ದೇವರ ಪ್ರತಿರೂಪವೇ ಅದು . ಮಗ ಚಂಡಾಲನೇ ಆಗಿರಬಹುದು, ಗುರು ಶಂಕರಾಚಾರ್ಯನೇ ಆಗಿರಬಹುದು. ಏನಾಗತ್ತೆ ಅನ್ನೋ ಯೋಚನೆಯೇ ಇಲ್ಲದೇ ಸಾಗೋದೊಂದೇ ಕೆಲಸ ತಾಯಿಗೆ, ತನ್ನದು ಅಂದುಕೊಂಡು. ಈ ಮಮತೆ ಈ ವಾತ್ಸಲ್ಯ ಎಲ್ಲ ದೇವರೊಬ್ಬನಿಗೇ ಮಾತ್ರ ಸಾಧ್ಯ - ಮಾಸ್ತಿ ವೆಂಕಟೇಶ ಅಯ್ಯಂಗಾರರು.

ಬಾಯಿ ಇರಬೇಕು , ಇಲ್ಲವೆ ತಾಯಿ ಇರಬೇಕು. - ಒಂದು ಗಾದೆಮಾತು.  

ಎಲ್ಲ ತಾಯಂದಿರು ಮೊದಲು ವಿಚಾರಿಸೋದು ಮಕ್ಕಳು ಊಟ ಮಾಡಿದರೇ, ಮಕ್ಕಳು ಯಾವದೇ ವಯಸ್ಸಿನವರಿರಲಿ.  ರಾಮಯಣದಲ್ಲಿ  ಶ್ರೀ ರಾಮನು ಪಟ್ಟಾಭಿಷೇಕದ ವಿಷಯ ತಿಳಿಸಿ ಆಶೀರ್ವಾದ ಪಡೆಯಲು ತಾಯಿ ಕೌಸಲ್ಯೆ ಬಳಿ ಬಂದಾಗ ಅವಳು ಕೇಳಿದ್ದು ' ಮಗನೇ, ಏನಾದರೂ ತಿಂದಿದ್ದೀಯೋ, ಇಲ್ಲವೋ?'.

ಹೆಚ್ಚೇನು ? ಇಂಥ ಒಬ್ಬ ತಾಯಿ ನಮಗೂ ಇದ್ದಳು , ಯಾವಾಗಲೂ ಮನೆ, ಗಂಡ, ಮಕ್ಕಳ ಹಿತ ನೋಡಿದವಳು,  ಬಡವ ಬಲ್ಲಿದರೆನ್ನದೆ ಎಲ್ಲರೊಡನೆ ಅಂತಃಕರುಣದಿಂದ ನಡೆದುಕೊಂಡವಳು, ಸದಾ ಸರಿಯಾದ ತೀರ್ಮಾನ ತೆಗೆದುಕೊಂಡು ನಡೆದವಳು, ಸದಾ ತೃಪ್ತಳು, ತನಗಾಗಿ  ಏನನೂ ಬೇಡದವಳು , ಯಾವಾಗಲೂ  ಒಳ್ಳೆಯದನ್ನೇ ಬಯಸಿದವಳು, ಒಳ್ಳೆಯದನ್ನೇ ಎದುರುನೋಡಿದವಳು, ನಮಗೊಂದು ಮಾತ ಹೇಳದೆ , ಆದರೂ ಏನೂ ಬಾಕಿ ಇರಿಸದಂತೆ ಎಲ್ಲವನ್ನು ಮಾಡಿ ಹೋದಳು ,  ಈಗ  ಆ ಮಾತಿಗೆ ಒಂದು ತಿಂಗಳು .  ಎಲ್ಲರ ಬಾಯಲ್ಲಿ ಅವಳ ಸಾವು ಪುಣ್ಯದ ಸಾವು .   ಇದ್ದರೆ ಹೀಗಿರಬೇಕು , ಹೋದರೆ ಹೀಗೆ ಹೋಗಬೇಕು  ಎನ್ನಿಸಿಕೊಂಡಳು.

  ದೇಹ ಜೀರ್ಣವಾದಾಗ ಆತ್ಮವು  ಅದನ್ನು ಬಿಟ್ಟು   ಇನ್ನೊಂದು ದೇಹವನ್ನರಸಿ ತೆರಳುವುದಂತೆ.  ಒಂದು ಒಳ್ಳೆಯ  ಆತ್ಮವು   ದೇಹವನ್ನು ಧರಿಸಿ ನಮ್ಮೆಲ್ಲರ ನಡುವೆ ಇತ್ತೇನೋ ? ಬಾಳಿನುದ್ದಕ್ಕೂ ಅವಳು ಇನ್ನು ನೆನಪು ಮಾತ್ರ.

ಜೀವ ಕೋಗಿಲೆ ಇಂಚರ
ಅದಕೆ ದೇಹವೆಂಬುದೇ ಪಂಜರ
ಇಂಚರ ಕೇಳಲು ಪಂಜರ ಅಗತ್ಯ
ಪಂಜರ ಮುರಿದರೆ ಇಂಚರ ಅಗೋಚರ