ಸೂರ್ಯೋದಯ

ನೋಡದೊ  ಮೂಡಣ

ದೆಸೆಯಲಿ ಮೂಡಿತು

ಬೆಳ್ಳಿಯ ಚುಕ್ಕಿಯು ನಸುನಗುತ

ದಿನಕರನುದಯದ

ವಾರ್ತೆಯ ಸಾರುತ

ಮುಂದಡಿಯಿಡುವುದು ರಾಜಿಸುತ      [೧]

ಬ್ರಧ್ನನ ಬರವನು

ಕಾಣುತ ನಾಚುವ

ಪ್ರಾಗ್ ದಿಗ್ವನಿತೆಯ ಮುಖಕಮಲ

ಲೋಹಿತ ವರ್ಣವ

ತಾಳಲು ಗೇಹದಿ

ನಿದ್ದೆಯ ಬಿಟ್ಟಿತು ಜನಜಾಲ            [೨]

ಖಗಗಳ ಚಿಲಿಪಿಲಿ

ದನಿಯದು ಗಿಡಮರ

ಪೊದೆಗಳ ಮಧ್ಯದಿ ಕೇಳಿಸಿತು

ವೇದವಿದರ ಮನೆ

ಯಲಿ ಶಂಖಧ್ವನಿ

ದಿನಕರನುದಯವ  ಘೋಷಿಸಿತು       [೩]

ಹೊಂಗದಿರನು ಬೀ

ರುತ ನಗುನಗುತಲಿ

ಸೂರ್ಯನು ಮೆಲ್ಲನೆ ಮೂಡಿದನು

ಎಲೆಗಳ ಮೇಲಿನ

ದುಃಖದ ಮಂಜಿನ

ದೂರವ ಮಾಡುತ ಪೊರೆಯುವನು     [೪]

ಹೂಗಳು ಅರಳಲು

ದುಂಬಿಯು ಹಾರಲು

ಪ್ರಕೃತಿಯು ಜಡತೆಯ ನೀಗಿಹುದು

ಸೂರ್ಯನ ಬಿಂಬವು

ಕಾರ್ಯಪ್ರಜ್ಞೆಯ

ಲೋಕದ ಜನರಿಗೆ ಸಾರುವುದು         [೫]