ಕನ್ನಡಕೊಬ್ಬ ಕುಮಾರವ್ಯಾಸ
ಕವನ
ವ್ಯಾಸನ ಬಸಿರಿಂದಿಳಿದವನಲ್ಲ
ವೈಶಂಪಾಯನನೊಡನಾಡಿಲ್ಲ
ಆ ಸಮಕಾಲದೊಳಿದ್ದವನಲ್ಲ
ಆ ಸರಸತಿ ಸುತ ಕಥೆ ಪೇಳಿಲ್ಲ
ಆದರೂ ದ್ವಾಪರ ಕಣ್ಮುಂದೆ
ಕಾವ್ಯದ ಮೂಲಕವೆಳೆತಂದೆ
ಸಂಸ್ಕೃತಕೊಬ್ಬನೆ ವ್ಯಾಸ
ಕನ್ನಡಕೊಬ್ಬ ಕುಮಾರವ್ಯಾಸ
ಬರೆಯೆ ನಿನಗೆ ಗಣಪತಿ ಜೊತೆಗಿಲ್ಲ
ಸರಸ್ವತೀ ನದಿ ತಟ ದೊರಕಿಲ್ಲ
ಹರಿದ್ವರ್ಣರಂಜಿತ ವನವಿಲ್ಲ
ಸರಸೀರುಹಜನ ಸೂಚನೆಯಿಲ್ಲ
ಆದರೂ ರಚಿಸಿದೆ ಭಾರತ
ಕನ್ನಡದೊಳು ಕಾವ್ಯಾಮೃತ
ಸಂಸ್ಕೃತಕೊಬ್ಬನೆ ವ್ಯಾಸ
ಕನ್ನಡಕೊಬ್ಬ ಕುಮಾರವ್ಯಾಸ
ಶಬ್ದ ಪ್ರವಾಹಕೆ ಅಡೆತಡೆಯಿಲ್ಲ
ಅಬ್ಧಿಯತೆರೆಯೋಲ್ ಹೊರಬಂತಲ್ಲ
ಅಬ್ಬ!ಮೂಗಿನೋಳ್ ಬೆರಳಿಟ್ಟೆಲ್ಲಾ
ಕಬ್ಬಕೆ ಕವಿಗಳು ನಮಿಸಿದರಲ್ಲ
ಅದ್ಭುತ ಅದ್ಭುತ ಭಾರತ
ಓದಲೆಲ್ಲರಿದ ಸತತ
ಸಂಸ್ಕೃತಕೊಬ್ಬನೆ ವ್ಯಾಸ
ಕನ್ನಡಕೊಬ್ಬ ಕುಮಾರವ್ಯಾಸ
ಗದುಗಿನ ಮೂಲೆಯ ಗುಡಿಯಲಿ ಕುಳಿತು
ಹೃದಯದಿ ಹುದುಗಿದ ಕಾವ್ಯವ ಹೊಸೆದು
ಜಡಜೀವಿಗಳಿಗೆ ಚೇತನವೆರೆದು
ನೆಡೆದೆ ವೀರ ನಾರಯಣನ ನೆನೆದು
ವನಸುಮದಂತಹ ಜೀವನ
ತನುಮನವಾಯಿತು ಪಾವನ
ಸಂಸ್ಕೃತಕೊಬ್ಬನೆ ವ್ಯಾಸ
ಕನ್ನಡಕೊಬ್ಬ ಕುಮಾರವ್ಯಾಸ
Comments
ಉ: ಕನ್ನಡಕೊಬ್ಬ ಕುಮಾರವ್ಯಾಸ