ಹೊನ್ನೇಮರಡಲ್ಲಿ ಶರಾವತಿ

ಹೊನ್ನೇಮರಡಲ್ಲಿ  ಶರಾವತಿ   

ಈ ಕಟ್ಟೆಗಂಜಿ ಒತ್ತರಿಸಿಕೊಂಡು
ನಿಂತಿರುವ ಗಂಗೆಯಿವಳು
ಈ ನಾಡಿಗೆಲ್ಲ ಬಲು ಬೆಳಕ ತೋರಿ
ನಡೆಸಿರುವ ತಾಯಿಯಿವಳು ||

ಇವಳಾಚೆಯೀಚೆ ತುಸುಕೆಂಪು ಪಟ್ಟಿ
ಅದರಾಚೆ ಹಸಿರ ಸೊಭಗು
ಅ ಅಂಬುತೀರ್ಥದಿಂದಬುಧಿವರೆಗೆ
ನಡೆದಾರಿ ನಗುತಲಿಹುದು ||

ವನವಾಸದಲ್ಲಿ ಮೈಥಿಲಿಯ ದಾಹ
ತಣಿಸಲ್ಕೆ ರಾಮಚಂದ್ರ
ಈ ನದಿಯ ಹರಿಸಿ ಲಕ್ಷ್ಮಣನ ಕಳಿಸಿ
ದಾರಿಯನು ತೋರಿಸಿದ್ದ ||

ಕಾರದವಿಯಲ್ಲಿ ದಾರಿಗನು ತೆರಳೆ
ಕೋಪಿಸಲು ಜೋಗದಲ್ಲಿ
ಜಲಪಾತವಾಗಿ ಮುಂದಿಳುಕಿನಲ್ಲಿ
ಸಾಗಿದಳು ಚೆಲುವಿನಲ್ಲಿ ||

ಈ ಮಲೆಯ ಮಗಳು ಬಲು ಬಳುಕಿನವಳು
ಭೋರ್ಗರೆವ ಸಿಟ್ಟಿನವಳು
ತಾ ಧುಮುಕಿ ಧುಮುಕಿ ಆ ಶಕ್ತಿಯಿಂದ
ಬಲು ಬೆಳಕ ನೀದುತಿಹಳು ||

ಈ ಕಟ್ಟೆ ಹಿಂದೆ ನಿಂತಿರುವಳಲ್ಲ
ತನ್ನೊಕ್ಕಲುಗಳ ನುಂಗಿ
ಆ ದುಃ ಖದಲ್ಲಿ  ನಿಶ್ಶಬ್ಧಳಾಗಿ
ಹೀಗಿರುವ ಪರಿಯ ನೋಡಿ ||

                                                                                   - ಸದಾನಂದ