ಜಲಿಯನ್ ವಾಲಾಬಾಗ್ ಹತ್ಯಾಕಾಂಡ

ಅಲ್ಲಿ ನೆರೆದಿದ್ದ ಜನರಲ್ಲಿ ಗಂಡಸರು, ಹೆಂಗಸರು, ವೃದ್ಧರು, ಪುಟ್ಟ ಪುಟ್ಟ ಮಕ್ಕಳು, ಹಸುಗೂಸುಗಳು ಎಲ್ಲರೂ ಇದ್ದರು. ಗುಂಡಿನ ಸುರಿಮಳೆ ಶುರುವಾಗುತ್ತಲೇ ತಮ್ಮ ತಮ್ಮ ಪ್ರಾಣ ರಕ್ಷಿಸಿಕೊಳ್ಳಲು ದಿಕ್ಕಾಪಾಲಾಗಿ ಓದಲು ಶುರು ಮಾಡಿದರು. ಕೆಲವರು ಬಾವಿಯಲ್ಲಿ ಹಾರಿದರೆ, ಮತ್ತೂ ಕೆಲವರು ಅಲ್ಲಿದ್ದ ಪೊದೆಗಳಲ್ಲಿ ಅವಿತು ಕುಳಿತರು. ಕೆಲವೇ ಕೆಲವು ನಿಮಿಷಗಳಲ್ಲಿ ನಡೆದ ಗುಂಡಿನ ದಾಳಿಯಲ್ಲಿ ೧೬೫೦ ಸುತ್ತು ಗುಂಡಿನ ದಾಳಿ ನಡೆಸಿದ್ದ ಡಯರ್ ಅಂದು ಹೆಮ್ಮೆಯಿಂದ ಹೇಳಿಕೊಂಡದ್ದು ಹೀಗೆ " ಒಂದೇ ಒಂದು ಗುಂಡು ಸಹ ವ್ಯರ್ಥವಾಗಲಿಲ್ಲ". ಪಂಜಾಬಿನ ವಿಚಾರಣೆ ಸಮಿತಿಯ ಅಧ್ಯಕ್ಷ ನ್ಯಾಯಮೂರ್ತಿ ರಾಂಕಿನ್ ಡಯರ್ ಗೆ, ಗಾಯಗೊಂಡವರ ಚಿಕಿತ್ಸೆಗೆ ಏನು ಏರ್ಪಾಟು ಮಾಡಲಾಗಿತ್ತು? ಎಂದು ಪ್ರಶ್ನಿಸಿದಕ್ಕಾಗಿ ಡಯರ್ ನೀಡಿದ ಉತ್ತರ "ಅದು ನನ್ನ ಕೆಲಸವಲ್ಲ, ಆಸ್ಪತ್ರೆಗಳನ್ನೇನು ಮುಚ್ಚಿರಲಿಲ್ಲವಲ್ಲ, ಬೇಕಾಗಿದ್ದರೆ ಅಲ್ಲಿಗೆ ಹೋಗಬೇಕಾಗಿತ್ತು ಎಂದು ಹೇಳಿದ್ದ

ಅಷ್ಟೇ ಅಲ್ಲದೆ ಹಂಟರ್ ಆಯೋಗದ ಮುಂದೆ ಡಯರ್ ತನ್ನ ಪ್ರತಾಪವನ್ನು ಹೀಗೆ ಕೊಚ್ಚಿಕೊಂಡಿದ್ದಾನೆ. ನಾನು ಅಲ್ಲಿಗೆ ಹೋಗುವ ಮೊದಲೇ ನಿರ್ಧರಿಸಿದ್ದೆ. ಅಲ್ಲಿ ನೆರೆದಿರುವ ಎಲ್ಲರನ್ನೂ ಅವಸಾನಕ್ಕೀಡು ಮಾಡಬೇಕೆಂದು. ಜಲಿಯನ ವಾಲಾಬಾಗ್ ಒಳಗೆ ವಾಹನವನ್ನು ತೆಗೆದುಕೊಂಡು ಹೋಗಲು ಸಾಧ್ಯವಿರಲಿಲ್ಲ. ಹಾಗಾಗಿ ಸಾಕಷ್ಟು ಗುಂಡುಗಳಿರಲಿಲ್ಲ . ಇನ್ನೂ ಹೆಚ್ಚು ಗುಂಡುಗಳಿದ್ದಿದ್ದರೆ ಇನ್ನಷ್ಟು ಮಂದಿಯ ಪ್ರಾಣ ತೆಗೆಯಬಹುದಾಗಿತ್ತು. ಈ ಹತ್ಯಾಕಾಂಡದ ನಂತರ ಇಂಗ್ಲೆಂಡ್ ಗೆ ಮರಳಿದ ಡಯರ್ ಗೆ ಅಲ್ಲಿನ ನಾಗರೀಕರು ಅವನನ್ನು ಸನ್ಮಾನಿಸಲು ಸಭೆಯೊಂದನ್ನು ಏರ್ಪಡಿಸಿದ್ದರು. ಅಷ್ಟೇ ಅಲ್ಲದೆ ಸ್ವಲ್ಪ ಹಣವನ್ನು ಸಂಗ್ರಹಿಸಿ ಅವನಿಗೆ ಕೊಟ್ಟಿದ್ದರು. ಎಂಥಹ ಅಮಾನವೀಯತೆ ಮೆರೆದಿದ್ದರು ಅಲ್ಲಿನ ಜನ.

ಇದಾಗಿ ವಾರದ ನಂತರ ಅಂದರೆ ಏಪ್ರಿಲ್ ೧೯ ರಂದು ಜಲಿಯನ್ ವಾಲಾಬಾಗ್ ಗೆ ಭೇಟಿ ಕೊಟ್ಟು ಅಲ್ಲಿನ ದೃಶ್ಯವನ್ನು ನೋಡಿ ದುಃಖ ತಡೆಯಲಾಗದೆ ಕಣ್ಣೀರಿಟ್ಟು, ಅಲ್ಲಿ ರಕ್ತದಲ್ಲಿ ಕಲೆತು ಹೋಗಿದ್ದ ಮಣ್ಣನ್ನು ಕಣ್ಣಿಗೆ ಒತ್ತಿಕೊಂಡು ಒಂದು ಡಬ್ಬದಲ್ಲಿ ಶೇಕರಿಸಿಕೊಂಡು ಆ ಮಾರಣಹೋಮಕ್ಕೆ ಕಾರಣರಾದ ಬ್ರಿಟಿಷರನ್ನು ಸದೆಬಡಿಯಲು ನಿರ್ಧರಿಸಿದ ಹನ್ನೆರಡು ವರ್ಷದ ಬಾಲಕನೆ ವೀರ ಕ್ರಾಂತಿಕಾರಿ ಭಗತ್ ಸಿಂಗ್.

ಇಂದಿಗೆ ಬ್ರಿಟಿಷರ ದಾಳಿಗೆ ತುತ್ತಾದ ಭಾರತೀಯರ ಮಾರಣಹೋಮಕ್ಕೆ ೯೨ ವರ್ಷಗಳು ಸಂದಿವೆ. ಈ ಸಂದರ್ಭದಲ್ಲಿ ಅವರ ಆತ್ಮಗಳಿಗೆ ಶಾಂತಿ ಸಿಗಲೆಂದು ಆ ಭಗವಂತನಲ್ಲಿ ಪ್ರಾರ್ಥಿಸೋಣ.

ಮಾಹಿತಿ : ಸಂಗ್ರಹ 

ಚಿತ್ರ ಕೃಪೆ : ಅಂತರ್ಜಾಲ