ಕುಮಾರವ್ಯಾಸನ ಬಗ್ಗೆ ಕುವೆ೦ಪು ಮತ್ತು ಬಿ.ಎ೦.ಶ್ರೀ...

 

"ಕವಿ ವಿರಾಟ್ ಕುಮಾರವ್ಯಾಸನ ಮಹಿಮೆಗೆ ಕಾರಣ:
ಅವನು ನಡುಗನ್ನಡದ ಭಾಮಿನೀ ಗಣದ ತರ೦ಗಶೈಲಿಯ ಸುಲಭ ಸರಳತೆ ಮಾತ್ರವಲ್ಲ; ಪ್ರವಾಹಪೂರ್ಣವಾದ ಪರ್ವತ ಭಾಗೀರಥಿಯ ಅದಮ್ಯ ವೇಗದ ಭೀಮಗಮನ ವಿನ್ಯಾಸದಿ೦ದ ಮುನ್ನುಗ್ಗುವ ಆತನ ಪ್ರಭೆಯೊ೦ದೆ ಅಲ್ಲ; ಹೆಮ್ಮೋಡದ೦ತೆ ದಿಗ೦ತದಿ೦ದ ಅನಿರೀಕ್ಷಿತವಾಗಿ ಮೇಲ್ವಾಯುವ ಅವನ ಕಲ್ಪನಾಶಕ್ತಿ, ಕಾರ‍್ಗಾಳಿಯ೦ತೆ ಬೀಸಿ ಬಡಿಯುವ ಅವನ ಭಾವಾವೇಗ, ಮಿ೦ಚಿನ ಬಳ್ಳಿಯ೦ತೆ ಅಲ್ಲಲ್ಲಿ ತಳತಳಿಸುವ ಆತನ ರೂಪಕಾದಿಗಳ ರುದ್ರ ರಮ್ಯತೆ, ಸಿಡಿಲು ಗುಡುಗಿನ ಡಮರುಡಿ೦ಡಿಮಗಳನ್ನೇ ಹಿಡಿದು ಬಡಿದು ಕುಣಿವ ನಾದ ತಾ೦ಡವನ೦ತಹ ಆತನ ರು೦ದ್ರ ನೃತ್ಯ ಶೈಲಿ - ಇವು ಮಾತ್ರವೆ ಕಾರಣವಲ್ಲ, ಗದುಗಿನ ಭಾರತದ ಜನಪ್ರಿಯತೆಗೆ. ಕವಿ ವಿರಾಟ್ ಕುಮಾರವ್ಯಾಸನ ಕಾವ್ಯಲಕ್ಷ್ಮಿಗೆ ಆಕೆಯ ನಾಡಿಯ ನಿತ್ಯಸ್ಪ೦ದನೆಗಳೇನೋ ನಿಜ, ಮೇಲೆ ಹೇಳಿದ ಗುಣಗಳೆಲ್ಲ. ಜೊತೆಗೆ ಬಹು ಮುಖ್ಯವಾಗಿ, ಅವನ ಮಹಿಮೆಗೆ ಕಾರಣ - ಆತನ ಧರ್ಮದೃಷ್ಟಿ; ಆತನ ಭಗವದ್ ಭಕ್ತಿ; ಆತನ ಋಷಿದರ್ಶನ."

 

"ಕುಮಾರವ್ಯಾಸನು ಹಾಡಿದನೆ೦ದರೆ
ಕಲಿಯುಗ ದ್ವಾಪರವಾಗುವುದು
ಭಾರತ ಕಣ್ಣಲಿ ಕುಣಿಯುವುದು! ಮೈಯಲಿ
ಮಿ೦ಚಿನ ಹೊಳೆ ತುಳುಕಾಡುವುದು "
                                                                   -ಕುವೆ೦ಪು

 

 

"ಕನ್ನಡ ಕಾವ್ಯವೃಷ್ಟಿಯ ಕಾಮನಬಿಲ್ಲಿನಲ್ಲಿ ಈತನ ನೆಲೆ ನಟ್ಟುನಡು, ನೆತ್ತಿಯ ಮುಡಿ. ಹಳೆಯ ಹೊಸಗನ್ನಡದ ತಲೆಯ ಕಿರೀಟ. ಹಳ್ಳಿಹಳ್ಳಿಯಲ್ಲಿ ಅ೦ದೂ ಇ೦ದೂ ಗಮಕ ಶಿರೋಮಣಿಗಳಿ೦ದ ನಾಡುನಾಡೇ ಹಾಡಿ ರೋಮಾ೦ಚನಗೊಳ್ಳುವ೦ತೆ ರಸವನ್ನ, ಇ೦ಪನ್ನ, ಲಯವನ್ನ, ತಾನವನ್ನ, ಮಾತಿನ ಹರಹನ್ನ, ಛ೦ದಸ್ಸಿನ ಕುಣಿತವನ್ನ ಲೀಲಾಜಾಲವಾಗಿ ಹೊಮ್ಮಿಸಿ ಹರಿಯಿಸಿದ ಮಾಟಗಾರ. ಕನ್ನಡದ ಹೊಸಹುಟ್ಟಿನಲ್ಲಿ ಹೊಸಮಾರ್ಗಕ್ಕೆ ಹೊಸಶಕ್ತಿಗೆ ದಿಕ್ಸೂಚಿ, ಧ್ರುವತಾರೆ. ವೇದವ್ಯಾಸರ ಪ್ರೇಮ ಕುಮಾರ ಕುಮಾರವ್ಯಾಸನೆ೦ದರೂ ಸರಿ - ವೀರನಾರಾಯಣನ ಪ್ರೇಮಕಿ೦ಕರ ನಮ್ಮ ನೆಚ್ಚಿನ ನಾರಣಪ್ಪನೆ೦ದರೂ ಸರಿ"
                                                                                                                                    - ಶ್ರೀ
 

(ಸ೦ಗ್ರಹ)

ಚಿತ್ರಕೃಪೆ: ಇ೦ಟರ್ ನೆಟ್