ಪಾಲು ಪಟ್ಟಿ

ಪಾಲು ಪಟ್ಟಿ

ಬಾಳಬಟ್ಟೆಯ ಅರ್ಧ ಸವೆಸುತ
ಇತ್ತ ನಿಂತು ಹಿಂದೆ ನೋಡಲು
ಕೆಲವು ಮಸುಕು ಕೆಲವು ಸ್ವಷ್ಟ
ಬಾಳ ಬಣ್ಣದ ದೃಶ್ಯಗಳು

ಸಾಧನೆಯೋ ಬಹು ದೊಡ್ಡ ಶೂನ್ಯವು
ಬಾಳ ಚಕ್ರದ ಉರುಳಲಿ
ನಾನು ಪಥಿಕನು ನನ್ನದಿಲ್ಲೇನು ಇಲ್ಲವು
ಎನುವ ಯೋಚನೆ ನನ್ನ ಅರಿವಲಿ

ಸಾಧಿಸಲು ಉಳಿದ ಸಮಯ ಸ್ವಲ್ಪ
ಬೋಧಿಸಲು ಕಲಿತುದಿಲ್ಲಿ ಅಲ್ಪ
ನೀಡಿದುದು ನೆನಪೆ ಇಲ್ಲ ಬದುಕೆ ಬರಿ ಬೊಗಳೆಯಲ್ಲ
ಬಿಚ್ಚಿ ನೋಡಲು ಬರಿ ಹರುಕು ಬಟ್ಟೆಯ ಜೀವನ

ದೈವ ಒಲಿಯಲು ಮನದಿ ಭಕ್ತಿಯಿಲ್ಲ
ಶಾಸ್ತ್ರ ಕಲಿಯಲು ನಿಜದ ಶ್ರದ್ದೆಯಿಲ್ಲ
ತಿಳಿವು ಹೇಳಲು ಗುರುವಿನ ದಯೆಯು ಇಲ್ಲ
ಏನು ಸಾಧಿಪೆ ಜಗದಲಿ ಹೇಗುಳಿವೆ ಪ್ರಿಯರ ಮನಗಳಲಿ

ಚಿಂತಿಪ ಮನವ ಸಂತೈಸಿದವಾರು?
ಬದುಕೆ ನಿನ್ನ ಸಾಧನೆಯಲ್ಲವೇನು,ಎಂದವರಾರು?
ದೈವ ನೀಡಿದ ಬದುಕು ನಿನ್ನದು ವಂಶ ನೀಡಿದ ದೇಹ ನಿನ್ನದು
ಋಣವು ತೀರಿದರದುವೆ ಸಾಧನೆ ಉಳಿದನೆಲ್ಲವ ಹಂಚಿಬಿಡು

ಅಸ್ಥಿ ನೀರಿನ ಪಾಲಿಗಾಯ್ತು ಬೂದಿ ಮಣ್ಣಿನ ಪಾಲಿಗಾಯ್ತು
ಇರುವ ಮನೆಯೋ ಮಡದಿ ಮಗಳ ಪಾಲಿಗಾಯ್ತು
ಹರಕು ಮುರುಕು ಬರಹಗಳೆಲ್ಲವು ಸಂಪದದ ಪಾಲಿಗಾಯ್ತು
ಜಗದ ಎಲ್ಲರ ಪ್ರೀತಿಯಷ್ಟೆ ನನ್ನ ಪಾಲಿಗೆ ಉಳಿಯಿತು