ಇವಳೇನ ತುಂಗೆ ಇವಳೇನ?

ಇವಳೇನ ತುಂಗೆ ಇವಳೇನ?
ಇವಳೇನ ತುಂಗೆ ಇವಳೇನ?
ಕಾಳಸರ್ಪದ ಹಾಗೆ ಬುಸುಗುಟ್ಟಿ ಹುಂಕರಿಸಿ
ಮಧಗಜದ ಹಾಗೆ ಎಲ್ಲವನು ಕಾಲಲ್ಲಿ ಹೊಸಗಿ
ನೆಲವನ್ನು ನದಿಯನ್ನು ಒಂದುಗೂಡಿಸಿ ಬೆದರಿಸಿ
ಹರಿಯುತ್ತಿದ್ದ
ತುಂಗೆ ಇವಳೇನ?
 

ಇವಳೇನ ತುಂಗೆ ಇವಳೇನ?
ಗುರುವಿನ ಪಾದ ತೊಳೆಯೆ ತುಂಬಿ ಬಂದ ಭಕ್ತಿಯಂತೆ
ಜನರ ಪಾಪಶೇಷ ಕಳೆಯೆ ಹರಿದು ಬಂದ ಶಕ್ತಿಯಂತೆ
ಹಳೆಯದೆಲ್ಲ ಕೆಡವಿ ಹೊಸದು ಕಟ್ಟುವ ಪ್ರಸಕ್ತಿಯಂತೆ
ಹರಿಯುತ್ತಿದ್ದ
ತುಂಗೆ ಇವಳೇನ?

ಇವಳೇನ ತುಂಗೆ ಇವಳೇನ?
ರೋಷಾವೇಶದಿ ಅಬ್ಬರಿಸಿ ಹಸುಗರುವ ಎಳೆದೊಯ್ದ
ರಣಕಾಳಿಯ ರೂಪವ ಧರಿಸಿ ಆರ್ಭಟಿಸಿ ಮೆರೆಯುತಲಿ
ಎರಡು ಕೈಯನು ಚಾಚಿ ಎದೆಗೆ ಅಪ್ಪುತಲಿ
ನೂರಾರು ಜೀವವ ಸುಡುಗಾಡಿಗೆ
ಎಳೆದೋಯ್ದ
ತುಂಗೆ ಇವಳೇನ?....
 

 
ಇವಳೇನ ತುಂಗೆ ಇವಳೇನ?
ತೊಟ್ಟಲಲ್ಲಿ ಮಲಗಿದ ಹಸುಕಂದನ ಹಾಗೆ
ಅಮ್ಮನ ಹಿಂದೆ ಹೊರಟ ಪುಟ್ಟ ಕರುವಿನ ಹಾಗೆ
ಗೆಜ್ಜೆಯ ಹೆಜ್ಜೆಗಳನ್ನಿಡುತ್ತ ಪುಟ್ಟಗೌರಿಯ ಹಾಗೆ
ಹರಿಯುತಿಹ
ತುಂಗೆ ಇವಳೇನ?

(ಮೊನ್ನೆ ಶನಿವಾರ ೨೧/೫/೨೦೧೧ ರಂದು ಮಂತ್ರಾಲಯಕ್ಕೆ ಹೋಗಿದ್ದೆವು , ಹಸುಗೂಸಿನ ಹಾಗೆ ಹರಿಯುತ್ತಿರುವ ತುಂಗೆಯನ್ನು ಕಂಡಾಗ ಅನ್ನಿಸಿದ್ದು)