ನನ್ನ ಬಾಲ್ಯ ಹಾಗೂ ರಾಘವೇಂದ್ರ ಸ್ವಾಮಿಗಳ ಪವಾಡ

ನಾನು ಹುಟ್ಟಿದ್ದು ಕೋಲಾರ ಜಿಲ್ಲೆಯ ಮುಳಬಾಗಿಲು ತಾಲೂಕಿನ ಮಾರಂಡಹಳ್ಳಿ ಎಂಬ ಗ್ರಾಮದಲ್ಲಿ. ಆಗೆಲ್ಲ ಹೆರಿಗೆಗಳು ಮನೆಗಳಲ್ಲಿ ಇದ್ದ ಹಿರಿಯ ಮಹಿಳೆಯರೇ ಮಾಡುತ್ತಿದ್ದರು. ಹಾಗೆಯೇ ನನ್ನ ತಾಯಿಯ ಹೆರಿಗೆಯೂ ನಮ್ಮ  ಹಳ್ಳಿ ಮನೆಯ ಅಡಿಗೆಮನೆಯಲ್ಲಿ ವಾರದ ರಜಾ ದಿನವಾದ ಭಾನುವಾರ ಆಯಿತು. ನಮ್ಮ ತಾಯಿಯ ಗರ್ಭದಲ್ಲಿ ಜನಿಸಿದ ಮೊದಲ ಮಗು ನಾನು. ಗಂಡು ಮಗು ಹುಟ್ಟಿತು ಎನ್ನುವ ಸಂತೋಷ ಹೆಚ್ಚು ಕಾಲ ಉಳಿಯಲಿಲ್ಲ. ಏಕೆಂದರೆ ಹುಟ್ಟುತ್ತಲೇ ನನ್ನ ಕಾಲಿನ ಪಾದಗಳೆರಡೂ ಒಳಗೆ ತಿರುಚಿಕೊಂಡಿದ್ದವು. ಮೊದಲ ಮಗುವಾಗಿ ಹುಟ್ಟಿದ ನನಗೆ ಈ ರೀತಿ ಆಗಿರುವುದು ಕಂಡು ನನ್ನ ತಂದೆ ತಾಯಿ ಬಹಳಷ್ಟು ನೊಂದುಕೊಂಡರು. ಆದರೆ ಏನೂ ಮಾಡಲೂ ಆಗುವುದಿಲ್ಲವಲ್ಲ. ಆಗ ಮುಳಬಾಗಿಲಿನಲ್ಲಿ ಸುಸಜ್ಜಿತ ಆಸ್ಪತ್ರೆಗಳಿರಲಿಲ್ಲ. ಇದ್ದ ಆಸ್ಪತ್ರೆಯೊಂದರಲ್ಲಿ ತೋರಿಸಿದಕ್ಕೆ ಅವರೂ ಸಹ ಇದನ್ನು ಏನೂ ಮಾಡಲು ಸಾಧ್ಯವಿಲ್ಲ ಎಂದುಬಿಟ್ಟರು. ಹಾಗೆಯೇ ಎರಡು ಮೂರು ತಿಂಗಳು ಕಳೆದವು.