ಮಳೆಗಾಲ ಬಂದಾಗ

ಪತ್ತನಾಜೆ ಕಳೆಯೆ ಮುಗಿಲು

ನಭವನೆಲ್ಲ ಕವಿಯಿತು

ಗುಡುಗುಡೆಂದು ಗುಡುಗು ಮೊರೆಯೆ

ನವಿಲು ಭರದಿ ಕುಣಿಯಿತು          [೧]

ನಿನ್ನ ಗರ್ವವೆಲ್ಲ ನನ್ನ

ಅಂದ ನೋಡಿ ಮರೆಯೆಯಾ

ಎಂದು ಮಿಂಚು ನೀಡಿತಾಗ

ತನ್ನ ದೀರ್ಘ ಜಿಹ್ವೆಯ               [೨]

ನಿನ್ನ ಅಂದವೇನು ಮಿಂಚೆ

ಕ್ಷಣವೆ ತಾನೆ ಇರುವುದು

ನನ್ನ ಬಲವ ನೋಡು ಎಂದು

ಸಿಡಿಲು ಸಿಡಿದು ಬಿದ್ದುದು            [೩]

ನಿಮ್ಮ ಬಲವು ಉಗ್ರವಾಗಿ

ಜಗಕೆ ಕಷ್ಟ ಕೊಡುವುದು

ನನ್ನ ಬರವು ಎಲ್ಲ ಜನಕೆ

ಬಹಳ ಹರುಷ ತರುವುದು           [೪]

ಎಂದು ಮಳೆಯು ಹೇಳಿ ಜಗದಿ

ಹನಿಗಳನ್ನು ಸುರಿಸಿತು

ಕೆರೆ ನದಿ ತೊರೆಗಳೆಲ್ಲ

ಉಕ್ಕಿಯುಕ್ಕಿ ಹರಿಯಿತು              [೫]