ನನ್ನೊಳಗಿನ ಬರಹಗಾರನಿಗೆ ವರುಷದ ಸ0ಭ್ರಮ‌

ಮೂವತ್ತು ವಸಂತಗಳು ಗರ್ಭದಲ್ಲಿದ್ದ

ನನ್ನೊಳಗಿನ ಬರಹಗಾರನಿಗೆ ಕಳೆದ

ವಸಂತವಷ್ಟೇ ಸಂಪದದ ಆಸ್ಪತ್ರೆಯಲ್ಲಿ

ಸುಖ ಪ್ರಸವವಾಯಿತು...

ಆಗಷ್ಟೇ ಹುಟ್ಟಿದ ಬರಹಗಾರನನ್ನು

ಎತ್ತಾಡಿ ಮುದ್ದಾಡಿ ಆಟವಾಡಿಸಿದ

ಎಲ್ಲ ಬಂಧು ಬಾಂಧವರಿಗೂ

ನನ್ನ ಅನಂತಾನಂತ ವಂದನೆಗಳು

ಗರ್ಭದಲ್ಲಿದ್ದು ಸಂಪದ ಆಸ್ಪತ್ರೆಯಲ್ಲಿದ್ದ

ಕಥೆ, ಕವನ ಲೇಖನ ಪ್ರವಾಸ ಹಾಸ್ಯ

ಮುಂತಾದ ಮಕ್ಕಳನ್ನೆಲ್ಲ ನೋಡುತ್ತಾ

ಮುದ್ದಿಸುತ್ತ ಸಂತೋಷ ಪಡುತ್ತಿದ್ದೆ...

ಆಚೆ ಬಂದು ಉಳಿದ ಮಕ್ಕಳಂತೆ

ನಾನೂ ಅವರಂತೆ ಆಡುತ್ತಾ

ಬೆಳೆಯುತ್ತ ವರುಷದ ಸಂಭ್ರಮಕ್ಕೆ

ಬಂದು ನಿಂತಿದ್ದೇನೆ...

ಆತ್ಮೀಯ ಸಂಪದಿಗರೇ,

ಕಳೆದ ವರುಷ ಅಂದರೆ ೨೦೧೦ ರ ಜೂನ್ ಸುಮಾರಿಗೆ ನನಗೆ ಸಂಪದದ ಬಗ್ಗೆ ತಿಳಿದಿದ್ದು. ಮೊದಲಿನಿಂದಲೂ ಕನ್ನಡ ಲೇಖನಗಳು, ಕಥೆ,ಹಾಸ್ಯ ಕವನಗಳು, ಹಾಗೂ ಪ್ರವಾಸ ಕಥನಗಳು ಓದುವ ಚಟ. ಅದರಲ್ಲೂ ಪ್ರವಾಸ ಕಥನ ಮತ್ತು ಹಾಸ್ಯ ಎಂದರೆ ವಿಶೇಷ ಆಸಕ್ತಿ. ಆದರೆ ಅಂತರ್ಜಾಲದಲ್ಲಿ ಕೂಡ ಕನ್ನಡದಲ್ಲಿ ಬರೆಯುತ್ತಾರೆ ಎಂದು ತಿಳಿದಿರಲಿಲ್ಲ. ಒಮ್ಮೆ ಹೀಗೆ ಕನ್ನಡ "Articles " ಎಂದು ಹುಡುಕುತ್ತಿದ್ದಾಗ ಕನ್ನಡ ಬ್ಲಾಗ್ ಪ್ರಪಂಚದ ಬಗ್ಗೆ ತಿಳಿಯಿತು. ಮೊದಮೊದಲು ವೈಯಕ್ತಿಕ ಬ್ಲಾಗ್ಗಳನ್ನ ಓದುತ್ತಿದ್ದೆ.  ಸರಿಸುಮಾರು ೨೦೦-೩೦೦ ಬ್ಲಾಗ್ ಗಳನ್ನು ಓದಿದ್ದೇನೆ. ಆನಂತರ ಓದಲು ಯಾವುದೇ ಬ್ಲಾಗ್ ಗಳು ಇಲ್ಲದಿದ್ದಾಗ ಇನ್ನೇನೋ ಹುಡುಕಲು ಹೋದಾಗ ಕಣ್ಣಿಗೆ ಬಿದ್ದದ್ದು ಸಂಪದ. ಕೋಮಲ್ ಕುಮಾರ್ ಅವರ ಗೌಡಪ್ಪನ ಸರಣಿಗಳನ್ನು ನಾನು ಮೊದಲು ಓದಿದ್ದು. ನಿಧಾನವಾಗಿ ಸಂಪದದ ವಿಶ್ವರೂಪ ಪರಿಚಯವಾಗತೊಡಗಿತು. ಅಷ್ಟು ದಿನ ಒಂದೊಂದು ವಿಷಯವನ್ನು ಒಂದೊಂದು ಬ್ಲಾಗ್ ನಲ್ಲಿ ನೋಡುತ್ತಿದ್ದ ನನಗೆ ಎಲ್ಲ ವಿಷಯಗಳು ಸಂಪದದಲ್ಲಿ ಕಾಣತೊಡಗಿತು. ಅಷ್ಟಾದರೂ ನನ್ನ ಪರಿಮಿತಿ ಓದುವುದಕಷ್ಟೇ ಸೀಮಿತವಾಗಿತ್ತು. ಎಂದಿಗೂ ನಾನು ಬರೆಯಬಲ್ಲೆ ಎಂದು ಅನಿಸಿರಲಿಲ್ಲ.

ಹಾಗೆಯೇ ಪ್ರತಿದಿನ ಸಂಪದ ಓದುವುದು ಒಂದು ರೀತಿಯ ಅಭ್ಯಾಸವಾಗಿ ಹೋಯಿತು. ಮೊದಮೊದಲು ಆದಿನದ ಬರಹಗಳನ್ನು ಓದುತ್ತಿರುವವನಿಗೆ ಹಳೆಯ ಬರಹಗಳನ್ನು ಓದಬಹುದೆಂದು ತಿಳಿದು ಅದನ್ನೂ ಓದತೊಡಗಿದೆ. ನನಗಿಷ್ಟವಾದ ಎಲ್ಲ ಬರಹಗಳನ್ನು ಓದಿ ಮುಗಿಸಿದೆ. ಕಥೆ, ಕವನ, ಹಾಸ್ಯ, ಚರ್ಚೆ, ರಾಜಕೀಯ, ಆಧ್ಯಾತ್ಮ, ಪ್ರವಾಸ, ಚಿತ್ರಗಳು, ಎಲ್ಲವನ್ನೂ ಒಳಗೊಂಡ ಮಾಯಾಪುಸ್ತಕದಂತೆ ಕಂಡಿತು ಸಂಪದ. ಅವಾಗವಾಗ "ಪ್ರಕಟಿಸಿ" ಎಂದು ಸಂಪದದಲ್ಲಿ ನೋಡಿದಾಗಲೆಲ್ಲ ನನಗೂ ಬರೆಯಬೇಕು ಎಂದೆನಿಸಿದರೂ ಅದಕ್ಕೆ ಸರಿಯಾದ ಸಮಯ ಕೂಡಿ ಬಂದಿರಲಿಲ್ಲ. ಅದೂ ಅಲ್ಲದೆ ಗಣಕ ಯಂತ್ರದಲ್ಲಿ ಕನ್ನಡ  ಹೇಗೆ ಬಳಸುವುದು ಎಂದು ತಿಳಿದಿರಲಿಲ್ಲ. ಒಂದೆರೆಡು ಹಳೆಯ ಲೇಖನಗಳಲ್ಲಿ ಅಂತರ್ಜಾಲದಲ್ಲಿ ಕನ್ನಡದಲ್ಲಿ ಬರೆಯಲು ಯಾವ ತಂತ್ರಾಂಶ ಉಪಯೋಗಿಸಬೇಕು ಎಂಬ ಮಾಹಿತಿ ಇತ್ತು. ಅದನ್ನು ಬಳಸಿ ಮೊದಲಿಗೆ ಕನ್ನಡದಲ್ಲಿ ಬರೆಯಲು ಕಲಿತೆ. ಅಂತೂ  ಕೊನೆಗೂ ಆ ದಿನ ಬಂದೆ ಬಿಟ್ಟಿತು. ಸೆಪ್ಟೆಂಬರ್ ೧೬ ೨೦೧೦ ಮೊದಲ ಬಾರಿ ಸಂಪದದಲ್ಲಿ ನನ್ನದೇ ಒಂದು ಖಾತೆ ತೆರೆದು "ಪಾದಾರ್ಪಣೆ" ಬರಹದೊಂದಿಗೆ ಸಂಪದಕ್ಕೆ ಕಾಲಿಟ್ಟೆ. ಮೊದಮೊದಲು ಮಿಂಚಂಚೆಯಲ್ಲಿ ಬಂದ ಬರಹಗಳನ್ನು ಕನ್ನಡಕ್ಕೆ ಅನುವಾದಿಸಿ ಪ್ರಕಟಿಸುತ್ತಿದ್ದೆ. ಆದರೆ ಅದರಲ್ಲಿ ಸ್ವಂತಿಕೆ ಇರಲಿಲ್ಲ. ಆ ನಂತರ ಸ್ವಂತವಾಗಿ ಬರೆಯಲು ಕಲಿತೆ. ಪ್ರಸ್ತುತ ವಿಷಯಗಳ ಬಗ್ಗೆ ಬರೆದೆ. ಅಲ್ಲಿಯವರೆಗೂ ಕವನಗಳನ್ನು ಬರೀ ಓದುತ್ತಿದ್ದ ನನಗೆ ನಾನೂ ಕವನ ಬರೆಯಬಲ್ಲೆ ಎಂಬ ಅರಿವು ಸಹ ಇರಲಿಲ್ಲ. ಸಂಪದಿಗರ ಪ್ರೋತ್ಸಾಹದಿಂದ ಕಥೆ, ಕವನ ಗಳನ್ನು ಬರೆಯಲು ಕಲಿತೆ.

ಸಂಪದ ವೇದಿಕೆಯಿಂದ ನನ್ನೊಳಗಿನ ಬರಹಗಾರ ಆಚೆ ಬಂದಿದ್ದಷ್ಟೇ ಅಲ್ಲದೆ ಸಹೃದಯಿ ಸಂಪದಿಗ ಮಿತ್ರರನ್ನು ಪರಿಚಯಿಸಿಕೊಟ್ಟಿತು. ಸಂಪದ ಸಮ್ಮಿಲನದಲ್ಲಿ ಹಲವು ಸಂಪದಿಗರ ಮುಖತಃ ಭೇಟಿ ಸಹ ಸಾಧ್ಯವಾಯಿತು. ಅದೇ ಕೊಂಡಿಯಿಂದ "ವಾಕ್ಪಥ" ಎಂಬ ವೇದಿಕೆಗೆ ದಾರಿ ಮಾಡಿಕೊಟ್ಟಿತು.

ಇಷ್ಟೆಲ್ಲಾ ಸಾಧ್ಯವಾದದ್ದು ಈ "ಸಂಪದ" ದಿಂದ. ಇಂದು ನಾನು ಸಂಪದಕ್ಕೆ ಕಾಲಿಟ್ಟು ಒಂದು ವರ್ಷ. ಈ ಸಂದರ್ಭದಲ್ಲಿ ಸಂಪದದ ಸೃಷ್ಟಿಕರ್ತ ಹರಿಪ್ರಸಾದ್ ನಾಡಿಗರಿಗೆ ನನ್ನ ವಂದನೆಗಳು. ಅದೇ ರೀತಿ ಸಂಪದ ನಿರ್ವಹಣೆ ತಂಡದವರಿಗೂ ವಂದನೆಗಳು. ಹಾಗೆಯೇ ಒಂದು ವರ್ಷದಿಂದ ನನ್ನ ಬರಹಗಳನ್ನು ಓದಿ ಮೆಚ್ಚಿಕೊಂಡು ನನ್ನ ತಪ್ಪುಗಳನ್ನು ತಿದ್ದಿ, ಪ್ರೋತ್ಸಾಹಿಸಿ , ಉತ್ತೇಜಿಸುತ್ತಿರುವ ಎಲ್ಲ ಸಹೃದಯಿ ಸಂಪದಿಗರಿಗೆ ನನ್ನ ಅನಂತಾನಂತ ವಂದನೆಗಳು