ಬನ್ನಿರಿ ಗೆಳೆಯರೆ

ಬನ್ನಿರಿ ಗೆಳೆಯರೆ

ಬನ್ನಿರಿ ಗೆಳೆಯರೆ ಒಲುಮೆಯ ಹಂಚುತ    
ಧನ್ಯತೆ ಪಡೆಯೋಣ  ||
ತನ್ನಿರಿ ಗೆಲುಮೆಯ ಮೆಲುನಗೆ ಮಿಂಚುತ
ಮಾನ್ಯತೆ ಗಳಿಸೋಣ ||ಪ||

ಹಕ್ಕಿಗಳಂತೆಯೆ ಹಾರುತ ಲೋಕದ 
ನೋಟವ ಸವಿಯೋಣ ||
ಹೆಕ್ಕುವ ಒಳ್ಳೆಯ ಸಂಗತಿಗಳನದ
ಪಾಠವ ಕಲಿಯೋಣ ||
ನೋಟವ ಸವಿಯೋಣ |
ಪಾಠವ ಕಲಿಯೋಣ ||೧||

ಹೂವಿನ ಮಕರಂಧವ ಸವಿಸವಿಯುತ
ಜೇನಾಗಿಸೊ ಕಲೆಯು ||
ನಾವರಿತರೆ ಬಲು ಸೊಗಸೆನಿಸುವುದದ
ತಾನೀವನೆ ಗುರುವು ||
ಜೇನಾಗಿಸೊ ಕಲೆಯು |
ತಾನೀವನೆ ಗುರುವು ||೨||

ಹೆಮ್ಮರವಾಲದ ನೆರಳಲಿ ನೆಗೆಯುತ
ನಲಿನಲಿದಾಡೋಣ ||
ನಮ್ಮೆಲ್ಲರ ಬದುಕಾಬಗೆ ತಂಪಿನ
ನೆಲ ನೆರಳಾಗೋಣ ||
ನಲಿನಲಿದಾಡೋಣ |
ನೆಲ ನೆರಳಾಗೋಣ ||೩||

ಹರಿಯುವ ನದಿ ನೀರಿನ ಸನಿಹದಲಿಹ 
ಹುಲ್ಲಲಿ ನಡೆಯೋಣ ||
ಝರಿ ತೊರೆ ಹಳ್ಳದ ಕೊಡುಗೆ ನಿರಂತರ
ಮೇಲ್ಮೆಗೆ ನಮಿಸೋಣ ||
ಹುಲ್ಲಲಿ ನಡೆಯೋಣ |
ಮೇಲ್ಮೆಗೆ ನಮಿಸೋಣ ||4||

                                                           - ಸದಾನಂದ