ಆ ದಿನಗಳನೆಂತು ಮರೆಯಲಿ ನಾನು 3

ಹೊಳೆಯ ದಡದಿ ಕಲ್ಲನಾಯ್ದುತಂದು

ರಾಶಿಹಾಕಿ ಸುತ್ತ ಗೆಳೆಯರೆಲ್ಲ ಕುಳಿತು

ಕಲ್ಲ ಮೇಲೆ ಚಿಮ್ಮಿ ಕೈನೆಲಕೆ ಬಡಿದು

ಕಲ್ಲು ನೆಲೆಕೆ ಬೀಳದಂತೆ ಆತು ಹಿಡದು

ಕಲ್ಲಿನಾಟವಾಡಿ ಕೇಕೆಹಾಕಿ ನಕ್ಕು ನಲಿದ

ಆ ದಿನಗಳನೆಂತು ಮರೆಯಲಿ ನಾನು

ಜಗಲಿಮೇಲೆ ಪಗಡೆಹಾಸ ಹಾಸಿ ಸುತ್ತ ಕುಳಿತು

ದಾಳಹಾಕಿ ಮನೆಯನೆಣಿಸಿ ಕಾಯಿನೆಡೆಸುತಿಟ್ಟು

ಸೋತೊಡೆ ಹಾಸಕೆದರಿ ಓಡಿ, ಗೆದ್ದೊಡೆ ಕುಣಿದು

ಸಂಭ್ರಮಿಸಿದ ಆ ದಿನಗಳನೆಂತು ಮರೆಯಲಿ ನಾನು

ಜಗಳಗಂಟಿ ಕಾಯನಾಯ್ದು ಕಿತ್ತುತಂದು

ಒಂದರಿಂದಿನ್ನೊಂಕೆ ಜಗಳಹಚ್ಚಿ ಕುಳಿತು

ಒಂದಕ್ಕೊಂದು ಆವೇಶದಿ ಕಾದುಮಡಿದು

ಒಂದೊಂದೆ ತಲೆಯಂತೆ ನೆಲಕೆ ಉರುಳೆ

ವಿಜಯೋತ್ಸವದಿಂ ನಾವು ಮೆರೆಯುತ್ತಿದ್ದ

ಆ ದಿನಗಳನೆಂತು ಮರೆಯಲಿ ನಾನು

ಗುಲಗಂಜಿ, ಗಜ್ಜುಗ, ಹುಣುಸೆಪಿಕ್ಕ, ಹಾಲವಾಣ ಬೀಜವನಾಯ್ದುತಂದು

ಕವಡೆಯ ಒಟ್ಟುಮಾಡಿ ಮನೆಯ ಮಕ್ಕಳೆಲ್ಲಕೂಡಿಅಜ್ಜಿಯೊಡನೆ ಸೇರಿ

ಅಟುಗುಳಿ, ಚೌಕಾಬಾರ, ಹುಲಿ ಕುರಿ, ಹಾವು ಏಣಿ, ಕವಡೆಯಾಟವಾಡಿ

ನಾವೇ ಗೆಲ್ಲ ಬೇಕೆಂಬ ಛಲದಿ ಆಡಿ, ಸೋಲಿಗೊಪ್ಪದೆ ಪ್ರತಿಯಾಟ ಹೂಡಿ

ಗೆಲ್ಲುವಗಳಿಪುವರೆಗೂ ಆಡುತ್ತಿದ್ದ ಆ ದಿನಗಳನೆಂತು ಮರೆಯಲಿ ನಾನು

ನಾನೆಂದಿಗೂ ಮರೆಯಲಾಗದ ಆ ದಿನ ಇಂದಿಲ್ಲವಲ್ಲ

ನಾ ಮರೆಯಲಾಗದಾ ದಿನ ಮತ್ತೊಮ್ಮೆ ಬರುವುದೇ?

ಬೇಗ ಬರಲಿ ಆ ಮಧುರ ಕ್ಷಣ

ನಾ ಮರೆಯಲಾಗದಾ ದಿನ.