ಈ ಸುದಿನ, ಮಗನ ಜನುಮ ದಿನ

ಈ ಸುದಿನ, ಮಗನ ಜನುಮ ದಿನ

ಈ ವರ್ಷದ ಫೆಬ್ರವರಿ ೨೯ ಕ್ಯಾಲೆಂಡರಿನಲ್ಲಿ ಕಾಣುವ ಅಪರೂಪದ ಎಂಟ್ರಿ.  ೨೯ ದಿನಗಳ ಫೆಬ್ರವರಿಯಲ್ಲಿ ಹುಟ್ಟಿದವರಿಗೆ ವಿಶೇಷ ದಿನ. ಇವರುಗಳಿಗೆ ತಮ್ಮ ನಿಜವಾದ ಜನ್ಮ ದಿನಾಂಕ ದರ್ಶನ ಆಗೋದು ನಾಲ್ಕು ವರ್ಷಗಳಿಗೊಮ್ಮೆ. ಹಾಗಾಗಿ ಇದು ವಿಶೇಷ ಮಾಸ. ಈ ಸುದಿನ ನನ್ನ ಮಗನ ಜನುಮ ದಿನ. ನನ್ನ ಮಗ ಹುಟ್ಟಿದ್ದು ಫೆಬ್ರವರಿ ೨೯ ಕ್ಕೆ. ಈ ತಿಂಗಳಿನಲ್ಲಿ ಹುಟ್ಟಿದವರಿಗೆ leaper, leapling ಎಂದೂ ಕರೆಯುತ್ತಾರೆ. ಜನ್ಮ ದಿನ ಆಚರಿಸುವ ಬಗ್ಗೆ ನನಗೆ ಅಂಥಾ excitement ಇಲ್ಲ. ಆದರೆ ಮಗ ಮತ್ತು ಮನೆಯಾಕೆ ಬಯಸಿದ್ದರಿಂದ ಅವನ ಶಾಲೆಗೆ ಒಂದು ಕೇಕ್ ಮತ್ತು ಕೆಲ ಮಿತ್ರರನ್ನು ಊಟಕ್ಕೆಂದು ಮನೆಗೆ ಆಹ್ವಾನಿಸಿದ್ದೆ.

ಪ್ರತೀ ವರ್ಷ ಬರುವ ಹುಟ್ಟಿದ ಹಬ್ಬ ಅಷ್ಟೊಂದು ಮಜಾ ಕೊಡೋಲ್ಲ. ಅಪರೂಕ್ಕೆ ಬರುವ ಯಾವುದೇ ಸಂಗತಿಯಾದರೂ ಹರ್ಷ ತರುತ್ತದೆ, ಆಸಕ್ತಿ ಉಳಿಸಿ ಕೊಳ್ಳುತ್ತದೆ. ನಾಲ್ಕು ವರ್ಷಕ್ಕೆ ಒಮ್ಮೆ ನಡೆಯುವ ಅಮೆರಿಕೆಯ ಅಧ್ಯಕ್ಷೀಯ ಚುನಾವಣೆ, ನಾಲ್ಕು ವರ್ಷಗಳಿಗೊಮ್ಮೆ ನಡೆಯುವ ವಿಶ್ವ ಕಪ್ ಕ್ರಿಕೆಟ್ ಪಂದ್ಯಾವಳಿ... ಇವು ನಮ್ಮ ಆಸಕ್ತಿಯನ್ನು ಕೆರಳಿಸುತ್ತವೆ. ಮಗ ಎಂಟು ವರ್ಷದವನಾದರೂ ಅವನು ಆಚರಿಸಿದ್ದು ಎರಡನೇ ಜನ್ಮದಿನವನ್ನು. ಅಂದರೆ ಟೆಕ್ನಿಕಲ್ ಆಗಿ ಅವನು ಎರಡು ವರ್ಷದವ. ನನ್ನ ಮಗೆ ನೂರು ವರ್ಷದವನಾದರೆ ಅವನು ಆಚರಿಸುವುದು ೨೫ ನೆ ಜನ್ಮದಿನವನ್ನು. ಅಂದರೆ ಈ ಫೆಬ್ರವರಿ ೨೯ ಕ್ಕೆ ಹುಟ್ಟಿದವರು ಚಿರ ಜವ್ವನರು. ಅದಕ್ಕೆಂದೇ ಈ ವರ್ಷಕ್ಕೆ ಬ್ಯಾಚುಲರ್ ಇಯರ್ ಎಂದೂ ಕರೆಯುತ್ತಾರೆ.

೨೦೦೦ ನೆ ಇಸವಿ ಯಲ್ಲಿನ ಫೆಬ್ರವರಿ ತಿಂಗಳಿಗೆ ೨೯ ದಿನಗಳಿದ್ದವು. ಈ ವರ್ಷದಲ್ಲಿಯೇ ನನ್ನ ಮದುವೆ ಆಗಿದ್ದು. ಮಗ ಹುಟ್ಟಿದ್ದು ೨೦೦೪ ರಲ್ಲಿ, ಮತ್ತೊಮ್ಮೆ ಲೀಪ್ ಇಯರ್. ಮದುವೆ ಮತ್ತು ಮಗ ಹುಟ್ಟಿದ್ದು ಲೀಪ್ ಇಯರ್ ನಲ್ಲೆ. ಇದೂ ಒಂದು ಅಪರೂಪದ ವಿಶೇಷ ನನ್ನ ಪಾಲಿಗೆ.       

ಫೆಬ್ರವರಿ ೨೯ ಕ್ಕೆ ಮಕ್ಕಳು ಹುಟ್ಟುವ ಸಂಭವನೀಯತೆ ೧೪೬೧ ರಲ್ಲಿ ಒಂದು.

ಮುರಾರ್ಜಿ ದೇಸಾಯಿ ಯವರೂ ಹುಟ್ಟಿದ್ದು ಫೆಬ್ರವರಿ ೨೯ ಕ್ಕೆ.  

Rating
No votes yet

Comments