ಪ್ಯಾರ್ ಗೆ ಆಗ್ಬುಟ್ಟೈತೆ (ಕಥೆ) ಭಾಗ ೩

ಹೋಗ್ತೀನೋ ಹೋಗ್ತೀನಿ ನಿನಗೆ ಹುಚ್ಚು ಹಿಡಿದಿದೆ ಅನಿಸತ್ತೆ. ಆ ಹುಚ್ಚನ್ನು ನಾನು ಬಿಡಿಸುತ್ತೇನೆ, ಮೊದಲು ನೀನು ಎದ್ದು ರೆಡಿಯಾಗು ನಿನ್ನ ಬಳಿ ಒಂದು ಮುಖ್ಯವಾದ ವಿಷಯ ಮಾತನಾಡುವುದಿದೆ ಹೊಲದ ಕಡೆ ಹೋಗೋಣ ಎಂದು ಹೊರಡಲು ಅನುವಾದಳು. ತಕ್ಷಣ ನಾನು ಇಲ್ಲ ಮೃದುಲ ನಾನು ಎಲ್ಲೂ ಬರಲ್ಲ ನನಗೆ ಮೂಡ್ ಇಲ್ಲ ಎಂದೆ. 

ಅವಳು ಏನೂ ಮಾತಾಡದೆ ಹೊರಟು ಹೋದಳು. 

ಅವಳು ಹೋಗುತ್ತಿದ್ದಂತೆ ಅಮ್ಮ ಒಳಗೆ ಬಂದು ಚೇತೂ ಏಳೋ ಗಂಟೆ ೯.೩೦ ಆಗಿದೆ. ಎದ್ದೇಳು ಬಿಸಿ ಬಿಸಿ ರೊಟ್ಟಿ ಮಾಡುತ್ತೇನೆ ತಿನ್ನು ಎಂದು ಹೊರಟಳು. ರೊಟ್ಟಿ ಎಂದಾಕ್ಷಣ ಎಲ್ಲ ಮರೆತು ಬಾಯಲ್ಲಿ ನೀರೂರಿತು. ಹೋಗಿ ಸ್ನಾನ ಮಾಡಿ ಬಂದು ಅಮ್ಮ ಮಾಡಿಕೊಟ್ಟ ಬಿಸಿ ಬಿಸಿ ಅಕ್ಕಿ ರೊಟ್ಟಿಯ ಸವಿಯುತ್ತ ಅಮ್ಮ, ನಾನು ತಿಂಡಿ ತಿಂದು ಹೊಲದ ಕಡೆ ಹೋಗಿ ಬರುತ್ತೇನೆ ಎಂದು ಇನ್ನೊಂದು ರೊಟ್ಟಿ ಹಾಕಿಸಿಕೊಂಡು ತಿಂದು ಮುಗಿಸಿ ತಟ್ಟೆ ಇಟ್ಟು ಕೈ ತೊಳೆದು ಬಂದಾಗ ಅಮ್ಮ ಕರೆದರು.

ಚೇತೂ ಹೀಗೆ ಕೇಳ್ತೀನಿ ಅಂತ ತಪ್ಪು ತಿಳಿಯಬೇಡ, ಬೆಳಿಗ್ಗೆ ಮೃದುಲ ಇಲ್ಲಿಗೆ ಬಂದಿದ್ದಳಲ್ಲ ಅವಳ ಮೇಲೆ ಏನಾದರೂ ರೇಗಿದೆಯ? ಅವಳು ಹೋಗ್ತಾ ಕಣ್ಣಲ್ಲಿ ನೀರು ಹಾಕಿಕೊಂಡು ಹೋಗುತ್ತಿದ್ದಳು. ಏನೆಂದು ಕೇಳಿದ್ದಕ್ಕೆ ಏನಿಲ್ಲ ಅತ್ತೆ ನಿನ್ನ ಮಗ ತುಂಬಾ ಬದಲಾಗಿದ್ದಾನೆ. ಯಾಕೋ ಎರಡು ಮೂರು ದಿನದಿಂದ ವಿಚಿತ್ರವಾಗಿ ಆಡುತ್ತಿದ್ದಾನೆ ಎಂದು ಹೊರಟಳು. ಯಾಕೋ ಏನಾಯ್ತೋ ನೆನ್ನೆ ನಾನು ಸೊಸೆ ಅಂದಿದ್ದಕ್ಕೆ ಅದಕ್ಕೂ ನನ್ನ ಬೈದೆ, ಈಗ ಮೃದುಲ ಮೇಲೂ ರೇಗಿದ್ದೀಯ. ಏನಾದರೂ ಜಗಳ ಆಯ್ತಾ ನಿಮ್ಮಿಬ್ಬರ ಮಧ್ಯೆ?

ಅಮ್ಮ ಅಂಥದ್ದು ಏನೂ ಇಲ್ಲಮ್ಮ ಸಮಯ ಬಂದಾಗ ಹೇಳ್ತೀನಿ ಈಗ ನಾನು ಹೊಲದ ಕಡೆ ಹೋಗ್ತೀನಿ, ಮೃದುಲ ಏನಾದರೂ ಬಂದು ಕೇಳಿದರೆ ಗೊತ್ತಿಲ್ಲ ಅಂತ ಹೇಳು ಎಂದು ಹೊಲದ ಕಡೆ ಹೊರಟೆ.

ಇದ್ದ ಐದೆಕರೆ ಭೂಮಿಯಲ್ಲಿ ಮೂರೆಕರೆಯಲ್ಲಿ ಭತ್ತ ಬೆಳೆದಿದ್ದರೆ ಇನ್ನೆರಡು ಎಕರೆಯಲ್ಲಿ ತರಕಾರಿ ಸೊಪ್ಪು ಎಲ್ಲ ಬೆಳೆದಿದ್ದೆವು. ಬಹಳ ದಿನಗಳ ನಂತರ ಬೆಂಗಳೂರಿನ ಆ ಗಜಿಬಿಜಿ ವಾತಾವರಣದಿಂದ ಹಸಿರಿನ ವಾತಾವರಣಕ್ಕೆ ಬಂದದ್ದು ಮನಸಿಗೆ ಏನೋ ಒಂದು ರೀತಿ ಆಹ್ಲಾದ ಉಂಟಾಗಿತ್ತು. ಅಲ್ಲೇ ಕಳೆ ಕೀಳುತ್ತಿದ್ದ ಮುನಿಯಪ್ಪ ನನ್ನನ್ನು ನೋಡಿ

ನನ್ನ ಬಳಿ ಬಂದು ಏನಪ್ಪಾ ಚೇತನ್ ಚೆನ್ನಾಗಿದ್ಯ? ಹೇಗಿದೆ ಬೆಂಗಳೂರು, ಕೆಲಸ?

ಹಾ ಮುನಿಯಪ್ಪ ಎಲ್ಲ ಚೆನ್ನಾಗಿದೆ, ನೀನು ಚೆನ್ನಾಗಿದ್ಯ? ಹೇಗಿದೆ ಎಲ್ಲ ಬೆಳೆ?

ಹಾ ಚೇತನ್ ಎಲ್ಲ ಚೆನ್ನಾಗಿದೆ. ಇನ್ನೇನು ವಿಶೇಷ. ಯಾವಾಗ ಮದುವೆ ಊಟ ಹಾಕಿಸ್ತೀರಾ? ಪಾಪ ನಿಮ್ಮಮ್ಮ ಎಷ್ಟು ದಿನ ಅಂತ ಒಬ್ಬರೇ ದುಡಿತಾರೆ ಅವರಿಗೂ ವಯಸ್ಸಾಯ್ತು. ಮನೆಯಲ್ಲಿ ಜೊತೆಯಾಗಿ ಸೊಸೆ ಇದ್ದಾರೆ ಆಕೆಗೂ ಸ್ವಲ್ಪ ಸಹಾಯ ಆಗತ್ತೆ ಅಲ್ವಾ...

ಅದು ಸರಿ ಮುನಿಯಪ್ಪ ಆದರೆ ಇಷ್ಟು ಬೇಗ ಯಾಕೆ ಮದುವೆ. ಆಗಲಿ ಈಗ ತಾನೇ ಕೆಲಸಕ್ಕೆ ಸೇರಿದ್ದೇನೆ. ಇನ್ನೊಂದು ಮೂರು ವರ್ಷ ಆಗಲಿ ಆಮೇಲೆ ಆದರಾಯಿತು. ಅದೂ ಅಲ್ಲದೆ ನನಗ್ಯಾರು ಹುಡುಗಿಯನ್ನು ಕೊಡುತ್ತಾರೆ ಎಂದು ನಕ್ಕೆ.

ಅದ್ಯಾಕೆ ಚೇತನ್ ಹಾಗೆ ಹೇಳ್ತೀಯ...ಹೇಗಿದ್ರೂ ನಿಮ್ಮ ಅತ್ತೆ ಮಗಳು ಇಲ್ವಾ ಅದೇನು ಹೆಸರು ಮುರುದುಲ...ಅದೇನು ಹೆಸರೋ ಬಾಯೇ ತಿರಗಲ್ಲ, ಆ ಹುಡುಗಿ ಇಲ್ವಾ ಅವಳನ್ನೇ ಮದುವೆ ಆದ್ರೆ ಆಯ್ತಪ್ಪ....ಅವನ ಮಾತನ್ನು ಅರ್ಧಕ್ಕೆ ತುಂಡರಿಸಿ ಸರಿ ಮುನಿಯಪ್ಪ ಅದೆಲ್ಲಾ ಈಗ್ಯಾಕೆ ನಾನು ಬೆಟ್ಟದ ಕಡೆ ಹೋಗಿ ಬರ್ತೀನಿ ಎಂದು ಬೆಟ್ಟದ ಬಳಿ ಬಂದೆ. 

ಚಿಕ್ಕಂದಿನಿಂದಲೂ ಈ ಬೆಟ್ಟ ಅಂದರೆ ನನಗೂ ಮತ್ತೆ ಮೃದುಲಳಿಗೂ ಅದೇನೋ ಒಂಥರಾ ಇಷ್ಟ. ಬೆಟ್ಟದ ಮೇಲೊಂದು ಹನುಮಪ್ಪನ ಗುಡಿ ಇದೆ. ತುಂಬಾ ದೊಡ್ಡ ಬೆಟ್ಟ ಅಲ್ಲದಿದ್ದರೂ ನೋಡಲು ಬಲು ರಮ್ಯವಾಗಿದೆ. ಆ ಬೆಟ್ಟದ ಮೇಲೆ ನಿಂತು ನೋಡಿದರೆ ನಮ್ಮ ಹಳ್ಳಿಯ ಸಂಪೂರ್ಣ ನೋಟ ನೋಡಬಹುದು. ಚಿಕ್ಕಂದಿನಲ್ಲಿ ನಾನೂ ಮೃದುಲ ಪ್ರತಿ ಭಾನುವಾರದಂದು, ರಜೆಯ ಸಮಯದಲ್ಲಿ ಇಲ್ಲಿ ಬ೦ದು ಆಟ ಆಡಿ ಸಮಯ ಕಳೆಯುತ್ತಿದ್ದೆವು. ಬೆಳೆಯುತ್ತ ಬೆಳೆಯುತ್ತ ಅದರ

ಒಡನಾಟ ಕಮ್ಮಿ ಆಗಿ ಯಾವಾಗಲಾದರೂ ಒಮ್ಮೆ ಬರುವುದು ಆಗಿತ್ತು