ಕಣ್ಣ ಹನಿ

ಕಣ್ಣ ಹನಿ ಜಾರಿತು
ಹೇಳಿದರೂ ಕೇಳದೆ
ಕಣ್ಣು ಕಿವಿಗೆಷ್ಟು ದೂರ ಎಂದಿಂದು ಅರಿತೆ
ಒಂದೆಡೆಯೆ ಇದ್ದರೂ
ಎದುರು ಮುಖ ಮಾಡಿವೆ
ತಮ್ಮ ತಾವರಿಯದಂತೆ ಎಂದಿಂದು ಅರಿತೆ

ದೂರದಿಂದೊಂದು ಸದ್ದು
ಮೊದಲ ಸಲ ಕೇಳಿಬಂತು
ಕಣ್ಣ ಹಾಯಿಸುವ ಮುನ್ನ ದೂರವಾಯಿತು
ಕಾಣದಂತಹ ನೋಟ
ಮೊದಲ ಸಲ ಕಂಡುಬಂತು
ಕಿವಿಯ ಅಗಲಿಸುವ ಮುನ್ನ ಕಾಣದಾಯಿತು

ಕೇಳಲೂ ಆರೆನು
ಕೇಳದಿರಲಾರೆನು
ಎದೆಯ ತುಡಿತದ ಪರಿಯ ಬಣ್ಣಿಸಲಾರೆನು
ಕಾಣಲೂ ಆರೆನು
ಕಾಣದಿರಲಾರೆನು
ಒಳಗೆ ಹುದುಗಿದ ಅರಿಯ ಮಣಿಸಲಾರೆನು