ಎಲ್ಲಿ ನೋಡಲಿ ನಿನ್ನ

ಎಲ್ಲಿ ನೋಡಲಿ ನಿನ್ನ, ಹೇಗೆ ಕಾಣಲಿ ನಿನ್ನ|

ನಿನ್ನಿರುವ ಹುಡುಕಿ ನಾ ಬಲು ಸೋತೆನು||

ಕಣ್ಣಿನಲಿ ನೋಟವನು,ಕಿವಿಯೊಳು ಶಬ್ಧವನು|

ಬಾಯ್ತುಂಬ ಹರಿನಾಮ ನುಡಿಸಿದವನಾರು? ||

 

ಎಲ್ಲಿ ನೋಡಲಿ ನಿನ್ನ, ಹೇಗೆ ಕಾಣಲಿ ನಿನ್ನ|

ನಿನ್ನಿರುವ ಹುಡುಕಿ ನಾ ಬಲು ಸೋತೆನು||

 

ಹಸಿವು ಕೊಟ್ಟವ  ನೀನು ,ಅನ್ನ ಕೊಟ್ಟವ ನೀನು|

ಹೊನ್ನಿನಲಿ ಆಸೆಯನು ಇತ್ತವನು ನೀನು ||

ಸಕಲ ಇಂದ್ರಿಯಗಳಿಗೆ  ಶಕ್ತಿದಾತನು ನೀನು|

ಮಾತಿಗೇ  ನಿಲುಕದ ಚೈತನ್ಯ ನೀನು||

 

ಎಲ್ಲಿ ನೋಡಲಿ ನಿನ್ನ, ಹೇಗೆ ಕಾಣಲಿ ನಿನ್ನ|

ನಿನ್ನಿರುವ ಹುಡುಕಿ ನಾ ಬಲು ಸೋತೆನು||

 

ನನ್ನೊಳಗೆ ನಿನ್ನಿರುವು ಕಾಣಲಾರದೆ ನಾನು|

ಬರಿ ಭ್ರಮೆಯಲಿ ಕಾಲ ಕಳೆದ ನಾನು|

ಎಲ್ಲರೊಳು ನೆಲಸಿರುವ ನಿನ್ನರಿವ  ಮರೆತು

ತಲ್ಲಣಿಸಿರುವ ಜನರ ಪೊರೆದವನು ನೀನು||

 

ಎಲ್ಲಿ ನೋಡಲಿ ನಿನ್ನ, ಹೇಗೆ ಕಾಣಲಿ ನಿನ್ನ|

ನಿನ್ನಿರುವ ಹುಡುಕಿ ನಾ ಬಲು ಸೋತೆನು||

 

ಸ್ನೇಹಿತರೇ, ರಾಗ ಸಂಯೋಜನೆಯೊಂದಿಗೆ ಬರೆದ ಕವನಗಳನ್ನು ಹಾಡಿದಾಗ ಕೇಳಲು ಬಲು ಹಿತಕರವಾಗಿರುತ್ತದೆ. ಈ ಕವನವನ್ನು ನಾನು ಬರೆದು ರಾಗ ಸಂಯೋಜನೆ ಮಾಡಿದ ನಂತರ ಗಾಯಕಿಯೊಬ್ಬರು ಹಾಡಿದ್ದಾರೆ. ಅದನ್ನು ನನ್ನ ಬ್ಲಾಗ್ ನಲ್ಲಿ ಪ್ರಕಟಿಸಿರುವೆ. ಸಂಪದದ ನಿಯಮದಂತೆ ಇಲ್ಲಿ ಅದರ ಕೊಂಡಿ ಕೊಡುವುದು ತಪ್ಪಾಗಬಹುದು. ಆದರೆ ಸಂಪದಿಗರಿಗೆ ನಾನು  ಈ ಹಾಡನ್ನು ಕೇಳಿಸಿ ಅವರಿಂದ ತಪ್ಪು-ಒಪ್ಪುಗಳ ಅಭಿಪ್ರಾಯಗಳನ್ನು ಪಡೆದರೆ  ಹಾಡನ್ನು ಇನ್ನೂ ಚೆನ್ನಾಗಿ ಬರೆಯಲು/ಹಾಡಲು ಅನುಕೂಲವಾಗುತ್ತದೆ. ಆ ದೃಷ್ಟಿಯಿಂದ ಕಾಮೆಂಟ್ ಕಾಲಮ್ ನಲ್ಲಿ ಕೊಂಡಿ ನೀಡಿರುವೆ. ಸಂಪದ ವ್ಯವಸ್ಥಾಪಕರ ಅನುಮತಿ ಕೋರುವೆ.