ಮಾಡು ತಾಯಿ ನೀ ಸಂಹಾರ

ಮಾಡು ತಾಯಿ ನೀ ಸಂಹಾರ

ಹಳ್ಳಿಯಿಂದಲಾ ದಿಲ್ಲಿಯ ತನಕ ಶುಂಭ ನಿಶುಂಭರ ಸರಕಾರ

ಮಾಡು ತಾಯಿ ನೀ ಸಂಹಾರ ||ಪ||

ಪಂಚಾಯತಿ ಪುರಸಭೆ ಮೆಂಬರುಗಳ ಆದಾಯವ ನೀ ನೋಡಿಹೆಯಾ ?

ಜಿಲ್ಲಾ ಮಟ್ಟಕು ಮೇಲಿನ ಮಂದಿಯ ಊಹೆಯಾದರೂ ಮಾಡಿಹೆಯಾ ?

ಸರಕಾರಗಳೆನ್ನುವ ಉಧ್ಯಮದಲಿ ಹೂಡಿಕೆದಾರರ ನೀ ನೋಡು

ರಕ್ತಬೀಜರಂತುದಿಸಿದ ಮಂದಿಯ ಈ ಜಗದಿಂದಲೇ ಹೊರದೂಡು   ||೧||

ಕೊಳ್ಳೆಗೆ ಶಾಲೆ ದೇವಸ್ಥಾನಗಳೆನ್ನುವ ಭೇದವದಿರದವರು

ಎಲ್ಲೆಡೆ ಒಂದೇ ರೀತಿಯ ಸುಲಿಗೆಯ ಮಾಡುತ ಜೀವನ ಕಳೆವವರು

ಎದೆಸೀಳಿದರೊಂದಕ್ಷರವಿಲ್ಲದ ದಡ್ಡ ಶಿಖಾಮಣಿ ನಾಯಕರು

ಪುಂಡರ ಪಡೆ ಕಟ್ಟುತ ಊರೊಳಗೆ ಚಂಡ ಮುಂಡರಂತಿರುವವರು ||೨||

ಪಾಪಿಗಳಿಗೆ ರಕ್ಷಣೆ ನೀಡುವರು ಪಾಪದವರ ಋಣ ಹಿಂಡುವರು

ಮಾಡಬಾರದ ಕಾರ್ಯಕೆ ಬಡವರ ದುಡಿಸಿ ಕೆಡಿಸಿ ಹೆಣ ಕೆಡಗುವರು

ಹಣ ಗಳಿಕೆ ಏನಾದರು ಸರಿಯದು ಎನ್ನುತ ಐಶಾರಾಮದೊಳು

ಇರುವರ ಮದವಡಗಿಸು ನೀ ಬಂದು ಉರುಳಿಸು ಕಾಲದ ಪಾಶದೊಳು ||೩||

ನೆಲವನು ಜನರನು ವಂಚನೆ ಮಾಡಿ ಮಾಳಿಗೆ ಮನೆಗಳ ಕಟ್ಟಿದರೆ

ಅದು ಸುಖ ಕೊಡದೆಂದರಿವರು ಮುಂದೆ  ಇಂದಿವರನು ನೀ ಮೆಟ್ಟಿದರೆ 

ಕಪಟದ ನಯ ವಂಚಕ ನಾಯಕರನು ಬಿಡಬೇಡ ನೀ ಹಿಡಿ ಕೊಲ್ಲು

ದುರ್ಮತಿ ಹೊಂದಿದ ದುರ್ಜನರಿಂದ ಬಸವಳಿಯದೆ ಮಾತೆಯೆ ಗೆಲ್ಲು ||೪||

                                                                                                          - ಸದಾನಂದ