ಅವ್ವ ಕೇಳವ್ವ

ಅವ್ವ ಕೇಳವ್ವ

ನೀ ಕರುಣಿಸವ್ವ ನಗುವರಳಿಸವ್ವ ಜಗದೊಳಗೆ ಜೀವಗಳಿಗೆ
ಸಾಕೆನಿಸದಂತೆ ನರಳಾಟವಿರದ ಅಳುವಿರದೆ ಭಾವಗಳಿಗೆ ||ಪ||

ಕೆಟ್ಟ ಮಕ್ಕಳನು ದೃಷ್ಟಿ ಬೀರಿ ನೀ ದಿಟ್ಟರಾಗಿಸವ್ವ
ನಷ್ಟವಾಗದಂತಿಷ್ಟವಾದ ಸಂತುಷ್ಟಿ ಮೂಡಿಸವ್ವ  || 
ಈ ಪೃಥ್ವಿಯಲ್ಲಿ ಕೋಟ್ಯಾನುಕೋಟಿ ಅತ್ಯಾಶೆಯುಳ್ಳ ಮಂದಿ
ಸ್ವಾರ್ಥವನು ಮೀರಿ ಪರಮಾರ್ಥಕೆಂದು ದುಡಿಯುವರೆ  ಜಗದಿ  ಹೊಂದಿ  ||೧||

ಹಸಿವಾಗಬೇಕು ವಶವಾಗಬೇಕು ಸುಜ್ಞಾನಕೆಂದು ಮನಸು  
ಉಸಿರಾಗಬೇಕು ಹಸಿರಾಗಬೇಕು ಸಂಮೃದ್ಧಿಯಿಂದ ಕನಸು  ||
ಕಲಿತಿರಲು ಬೇಕು ಕಲಿಯಾಗಬೇಕು ಹುಲಿಯಂತೆ ಬಾಳಬೇಕು
ಕೊಳೆ ಕಳೆದುಕೊಂಡು ನಳನಳಿಸಿಕೊಂಡು ಗೆಲುವೆಂದು ಹೇಳಬೇಕು ||೨||

ಈ ಮಾತ ನೀನು ಕೇಳವ್ವ ತಾಯಿ ನೀಡವ್ವ ಜಗಕೆ ಶಾಂತಿ
ನೀ ಸ್ವಚ್ಚಗೊಳಿಸಿ ಚೆನ್ನಾಗಿ ಬೆಳೆಸಿ ನೀಗವ್ವ ಹುಸಿಯ ಭ್ರಾಂತಿ  ||
ಒಂದಾಗಿ ಬದುಕಿ ಈ ಜೀವಜಾಲ ಮಾದರಿಗಳಾಗುವಂತೆ
ಇಂದೊಲಿದು ಹರಸು ಕರುಣೆಯಲಿ ನಡೆಸು ನಿನ್ನಿಚ್ಚೆ ತಪ್ಪದಂತೆ ||೩||


                                                   - ಸದಾನಂದ