ವಾಕಿಂಗ್ ನ್ಯೂಸ್!

ಒಂದೇ ಒಂದು "ದಿನಪತ್ರಿಕೆ" ಮನೆಗೆ ತರಿಸದಿದ್ದರೂ, ಎಲ್ಲಾ ಪತ್ರಿಕೆಗಳಲ್ಲಿ ಬಂದಿರುವ ಸುದ್ದಿ ನನಗೆ ಮುಂಜಾನೆಯೇ ಗೊತ್ತಿರುವುದು! ಮುಂಜಾನೆ ವಾಕಿಂಗ್‌ನ ಲಾಭವಿದು!

ಅದು ಹೇಗೆ ಎಂದು ಹೇಳುತ್ತೇನೆ ಕೇಳಿ- ವಾಕಿಂಗ್ ಹೋಗುವಾಗ, ದೂರದಲ್ಲಿ ಪತ್ರಿಕೆ ಮನೆಮನೆಗೆ ಹಾಕುವ ಹುಡುಗ ಕಂಡರೆ, ಒಂದು ಗೇಟಿನ ಬಳಿ ನಿಲ್ಲುವೆ. "ಏನಿವತ್ತು ಇಷ್ಟು ತಡಾ?" ಎನ್ನುವಾಗ, ಆತ ಏನೋ ಕಾರಣ ಹೇಳಿ ಆ ಮನೆಯೊಳಗೆ ಎಸೆಯುವ ಪತ್ರಿಕೆ ನನ್ನ ಕೈಗೆ ಕೊಟ್ಟು ಹೋಗುವನು. ಅದನ್ನು ಪೂರ್ತಿ ಓದಿ ಮನೆಯೊಳಗೆ ಎಸೆದು ವಾಕಿಂಗ್ ಮುಂದುವರೆಸುವೆ. :)

ಬೆಂಗಳೂರಿನಲ್ಲಿ ಒಂದೇ ತೊಂದರೆ ಎಂದರೆ, ಹೆಚ್ಚಿನ ಮನೆಯವರು ಪ್ರೆಸ್ಟಿಜ್‌ಗೆ ಎಂದೋ, ಪುಟ ಜಾಸ್ತಿ ಎಂದೋ ಟಾಯ್(TOI) ಪತ್ರಿಕೆ ತರಿಸುವರು. ಆದ್ದರಿಂದ ಪ್ರತೀ ಮನೆಗೆ ನುಗ್ಗುವ ಅಗತ್ಯವಿರುವುದಿಲ್ಲ.

ಈ ಕನ್ನಡ ಪತ್ರಿಕೆ ತರಿಸುವವರು ಎಂಟು ಗಂಟೆಗೆ ಆಫೀಸು ಇದ್ದರೆ ಏಳು ಗಂಟೆಗೆ ಎದ್ದು ದಡಬಡ ಹೊರಡುವವರು. ಅವರ ಮನೆಯೆದುರು ಪತ್ರಿಕೆ ಕೆಲವೊಮ್ಮೆ ಸಂಜೇವರೆಗೂ ಹಾಗೇ ಬಿದ್ದಿರುವುದು. ಅವರದೇ ಪತ್ರಿಕೆ ಅವರ ಮನೆಯೆದುರೇ ಓದುತ್ತಿದ್ದರೂ, "ಏನಿವತ್ತು ವಿಶೇಷ ಸುದ್ದಿ?" ಎಂದು ನಮ್ಮ ಬಳಿ ಕೇಳಿ, ಇಣುಕಿ ಪತ್ರಿಕೆಯ ಮೈನ್ ನ್ಯೂಸ್ ನೋಡಿ ಆಫೀಸ್‌ಗೆ ಓಡುವರು!

ಈದಿನ ಬೆಳಗ್ಗೆ ವಾಕಿಂಗ್ ಹೋಗುವಾಗ "ಕನ್ನಡ ಪತ್ರಿಕೆ" ಕಣ್ಣಿಗೆ ಬಿತ್ತು! ನೋಡಿದರೆ ಗೇಟಿಗೆ ಬೀಗ.. ಜಂಪ್ ಮಾಡಬಹುದು, ಆದರೆ ಆ ಬದಿಯಲ್ಲಿ ಮುಳ್ಳಿನ ಗಿಡವಿದ್ದರೆ..? ಅದೇ ಸಮಯದಲ್ಲಿ ಮನೆ ಯಜಮಾನ ನಿದ್ದೆಗಣ್ಣಲ್ಲಿ ಬಂದು ಬೀಗ ತೆಗೆಯಲು ಪರದಾಡುತ್ತಿದ್ದ. ಅವನ ಜತೆಯಲ್ಲಿದ್ದ ನಾಯಿ ಬೆಳಗ್ಗಿನ "ವಾಕಿಂಗ್‌‍"ಗೆ ಅವಸರಪಡಿಸುತ್ತಿತ್ತು. ಅವನ ಕೈಯಿಂದ ಕೀ ತೆಗೆದುಕೊಂಡು,ಗೇಟು ತೆಗೆಯುವುದರೊಳಗೆ ನಾಯಿ ಮತ್ತು ಆತ ನಾಗಾಲೋಟ... ಬೀಗ, ಕೀ ನನ್ನ ಕೈಯಲ್ಲಿ! ಒಳ್ಳೆಯದೇ ಆಯ್ತು ಬಿಡಿ. ಒಳಗೆ ಹೋಗಿ, ಪತ್ರಿಕೆ ಎತ್ತಿ, ವರಾಂಡದಲ್ಲಿರುವ ಟೇಬ್‌ಲ್ ಮೇಲೆ ಬೀಗ ಕೀ ಇಟ್ಟು, ಚೇರ್ನಲ್ಲಿ ಕುಳಿತು ಓದಲು ಪ್ರಾರಂಭಿಸಿದೆ. ಓದುವುದರಲ್ಲಿ ಎಷ್ಟು ಮಗ್ನವಾಗಿದ್ದೆ ಎಂದರೆ ಆತನ ಮನೆಯಾಕೆ ಕಾಫಿ ತಂದಿಟ್ಟು, ಬೀಗ ಕೀ ತೆಗೆದುಕೊಂಡು ಹೋದುದು ಗೊತ್ತೇ ಆಗಲಿಲ್ಲ. "ಕಾಫಿ ಆರುತ್ತೇ, ಬೇಗ ಕುಡಿಯಿರಿ" ಎನ್ನುವ ಮಾತು ಒಳಗಿಂದ ಕೇಳಿದಾಗ, ಪೇಪರಿಂದ ತಲೆ ಹೊರಗೆ ಹಾಕಿ ನೋಡಿದೆ. ಬಿಸಿಬಿಸಿ, ಗಮಗಮ ಕಾಫಿ ಟೇಬಲ್ ಮೇಲೆ ಇತ್ತು. ಬಿಡಲು ಸಾಧ್ಯನಾ? ಕಾಫಿ ಕುಡಿಯುತ್ತಾ ಓದು ಮುಂದುವರೆಸಿದೆ. ರಾಜಕೀಯ, ರೇಪ್, ರಸ್ತೆ ಅಪಘಾತ, ರಾಹುಲ್, ರವೀಂದ್ರ ಜಡೇಜ, ರಜನೀಕಾಂತ, ಪತ್ರಿಕೆ ತುಂಬಾ ರಾರಾರಗಳೆಗಳೇ....."ರಾಯರೇ...ನಮಸ್ತೇ.."ಸ್ವರ ಕೇಳಿ ಕುರ್ಚಿಯಿಂದ ಬೀಳುವುದು ಬಾಕಿ! ಕತ್ತೆತ್ತಿ ಮೇಲೆ ನೋಡಿದೆ...ಮಾತೇ..ಬರಲಿಲ್ಲಾ...

(ಇನ್ನೂ ಇದೆ)