"ಶಿವರಾತ್ರಿಯ ಅರ್ಥಪೂರ್ಣತೆ "

"ಶಿವರಾತ್ರಿಯ ಆ ಶುಭದಿನದಂದು ಎಲ್ಲ ದೈವಭಕ್ತರೂ ಹೊಸ ಆಶಯಗಳೆಡೆಗೆ ತಮ್ಮ ಕಂಗಳನು ನೆಟ್ಟು ಶಿವನನ್ನು ಅರ್ಚಿಸಿ ಹೊಸ ಬದುಕಿನೆಡೆಗೆ ಪ್ರಬುದ್ಧ ಹೆಜ್ಜೆಗಳನ್ನಿಟ್ಟು ಸಾಗಲು ಮಾಡುವ ಸಂಕಲ್ಪವೆ ಒಂದು ಆರೋಗ್ಯಕರ ವಿಚಾರ. ಈ ಕುರಿತಂತೆ ಕನ್ನಡ ಸಾಹಿತ್ಯದಲ್ಲಿ ಶಿವನ ಕುರಿತು ವಿಭಿನ್ನ ಪರಿಕಲ್ಪನೆಗಳಿವೆ. ಶಿವ ಎಲ್ಲ ವರ್ಗದವರ ದೇವರು ಅದರಲ್ಲಿಯೂ ವಿಶೇಷವಾಗಿ ಆತ ಜನ ಸಾಮಾನ್ಯರ ಮತ್ತು ಶ್ರಮಿಕ ವರ್ಗದವರ ದೇವರು. ಇವರಿಗೆ ಶಿವ ಎನ್ನುವುದು ಬರಿ ದೇವರ ಹೆಸರಲ್ಲ ಅದೊಂದು ಭರವಸೆ ಬದುಕು ನಂಬಿಕೆ ಮತ್ತು ಮೌಲ್ಯ ಎಲ್ಲವೂ ಕೂಡ ಹೌದು. ವಚನಕಾರರ ಶಿವನಿಗೂ ಮತ್ತು ಜನ ಸಾಮಾನ್ಯರ ಶಿವನಿಗೂ ಒಂದು ಸಾಮ್ಯತೆಯಿದೆ. ಶಿವ ಮನೆಯಿಂದ ಮನೆಗೆ ಮತ್ತು ಮನದಿಂದ ಮನಕ್ಕೆ ನಿರಂತರವಾಗಿ ಚಲಿಸುವ ಒಂದು ನಂಬಿಕೆ ಮತ್ತು ಚೇತನ.

ಆದರೆ ಇಂದಿನ ವೈಚಾರಿಕ ಯುಗದಲ್ಲಿ ಗ್ರಾಮೀಣರಿಗಿಂತ ಅನೇಕ ವಿದ್ಯಾವಂತರು ನಗರ ಪ್ರದೇಶದವರು ವೈಚಾರಿಕತೆಯನ್ನು ಬದಿಗೊತ್ತಿ ಬರಿ ಯಾಂತ್ರಿಕವಾಗಿ ತಮ್ಮದೆ ವೈಖರಿಯಲ್ಲಿ ಸಹ ಮನಸ್ಕರು ಒಂದೆಡೆ ಒಟ್ಟಿಗೆ ಸೇರಿ ಕುಡಿದು ಕುಣಿದು ಕುಪ್ಪಳಿಸಿ ಶಿವರಾತ್ರಿಯ ಆಚರಣೆಗೆ ತೊಡಗುತ್ತಿರುವುದು ಒಂದು ಖೇದಕರ ಸಂಗತಿ. ಧಾರ್ಮಿಕ ಮೂಢ ನಂಬಿಕೆಗಳು ಜನ ಸಮೂಹವನ್ನು ದಿಕ್ಕೆಡಿಸುತ್ತಿವೆ. ಹೀಗಾಗಿ ಯಾವುದೆ ಆಚರಣೆಗಳ ಕುರಿತಾಗಿ ಕೂಲಂಕುಷವಾಗಿ ವಿಚಾರ ವಿನಿಮಯ ಮಾಡಿ ವಿಮರ್ಶಿಸಿ ಅವುಗಳನ್ನು ಹೊಸ ಬೆಳಕಿನಲ್ಲಿ ನೋಡಿ ಒಪ್ಪುವುದು ಎಲ್ಲರ ಆದ್ಯ ಕರ್ತವ್ಯವಾಗಬೇಕು.

ಪರಶಿವನ ಕುರಿತು ಹನ್ನೆರಡನೆ ಶತಮಾನದಲ್ಲಿ ಆಗಿ ಹೋದ ವಚನಕಾರರು ನೀಡಿದ ಪರಿಕಲ್ಪನೆ ಬಹಳ ಅದ್ಭುತ ವಾದುದು. ಆತ ಸ್ಥಿರ ಜಂಗಮನಂತೆ ಚರ ಜಂಗಮ ಕೂಡ. ಈ ಹಿನ್ನೆಲೆಯಲ್ಲಿ ನಮ್ಮ ಆಚಾರ ವಿಚಾರಗಳು ಮತ್ತು ಸತ್ಯ ಹಾಗೂ ಮಿಥ್ಯಗಳು ವೈಚಾರಿಕ ಮೂಸೆಯಲ್ಲಿ ಪರೀಕ್ಷೆಗೊಳಪಟ್ಟು ಹೊಸ ರೂಪ ಪಡೆಯಬೇಕು. ಹುಟ್ಟಿದ ಮನುಷ್ಯ ಬದುಕಲೆ ಬೇಕು, ಆದರೆ ಅದು ಅಂಧಾಚರಣೆಯ ಬದುಕು ಆಗಬಾರದು ಯಾಕೆಂದರೆ ಶಿವ ಬಹಳ ಸರಳ ಮತ್ತು ಆತ ಪರಿಶ್ರಮದ ಒಂದು ಸಂಕೇತ. ಇದು ಆಗಿಹೋದ ವಚನಕಾರರ ಆಶಯ."

>>>ಹಿರಿಯರೇ ನಿಮ್ಮೀ ಬರಹವನ್ನು ಇಂದು ಈಗ ನೋಡಿ ಪ್ರತಿಕ್ರಿಯಿಸುತ್ತಿರುವೆ..

ಹಬ್ಬ ಹರಿದಿನ ಆಚರಣೆ ವಿಷಯಕ್ಕೆ ಬಂದರೆ ನಗರದವರಿಗಿಂತ ಹಳ್ಳಿಗರೇ ಬಹುಪಾಲು ಅರ್ಥಪೂರ್ಣವಾಗಿ ಮತ್ತು ಅಚ್ಚುಕಟ್ಟಾಗಿ ಆಚರಿಸುವರು..(ಸಾಲ ಸೋಲ ಮಾಡಿಯಾದರೂ)
ಈ ಹಿಂದೆ ಸುಮಾರು ಹತ್ತು ವರುಷಗಳ ಹಿಂದೆಲ್ಲ ಪ್ರತಿ ಶಿವರಾತ್ರಿ ಜಾಗರಣೆ ದಿನ ಉಪವಾಸ ಇದ್ದು ಮಧ್ಯ ರಾತ್ರಿಯಲ್ಲಿ ಊರಿಂದ ೨ ಕಿಲೋ ಮೀಟರ್ ದೂರ ಇರುವ ನಮ್ಮೂರಿನ ಶ್ರೀ ಬೋಳ ಬಸವೇಶ್ವರ(ಸುತ್ತ ಮುತ್ತ ಗೊಡೆಗಳಿವೆ ಆದ್ರೆ ಮೇಲೆ ಚತ್ತು (ಟೆರೆಸ್)ಹಾಕಲು ಹೋದರು ಅದು ನಿಲದೆ ಬೀಳುತ್ತೆ ಹಾಗೆಯೇ ನೆರಳೂ ಸಹಾ ಮಲಗಿರುವ ಬಸವನ ಮೇಲೆ ಬೀಳುವ ಹಾಗಿಲ್ಲ ) ದೇವಸ್ಥಾನ್ಕೆಕ್ ಪಾದಯಾತ್ರೆಯಲ್ಲಿ ಸಾಗಿ ಭಜನೆ ಮಾಡಿ ಆ ನಂತರ ದೇವರ ಪ್ರಸಾದ ಎಂದು ಗುಗ್ಗರಿ -ಗಾರಿಗೆ ತಿನ್ನುತ್ತಿದ್ದೆವು..ಉಪವಾಸದ ನಂತರದ ಲಘು ಉಪಾಹಾರ ತರಹದ ಅದು ತಿನ್ನಲು ಭಲೇ ಮಜವಾಗಿರುತ್ತಿತ್ತು...ಈಗ್ಗೆ ನಾ ಬೆಂಗಳೂರು ಸೇರಿದ ಮೇಲೆ ಅದು ಸಾಧ್ಯವಾಗದೆ ಆ ರೀತಿಯ ಆಚರಣೆ ಇಲ್ಲಿ ಮಾಡಲೂ ಆಗದೆ ವ್ಯಥೆ ಪಡುವಂತಾಯ್ತು ;((

ಮುಂದಿನ ವರ್ಷ ಶಿವರಾತ್ರಿಗೆ ಅಲ್ಲಿಗೆ ಹೋಗುವೆ..

ಶಿವರಾತ್ರಿ ಕುರಿತ ನಿಮ್ಮ ಸಂಕ್ಚಿಪ್ತ ಬರಹ ಅರ್ಥಪೂರ್ಣವೂ ಸಕಾಲಿಕವೂ ಆಗಿದ್ದು ಶಿವರಾತ್ರಿ ಮಹಿಮೆ ಆಚರಣೆ ಹಿಂದಿನ ಮಹತ್ವ -ಅರ್ಥಪೂರ್ಣ ಆಚರಣೆ ಬಗ್ಗೆ ಮನದಟ್ಟು ಮಾಡಿಸುವುದು..
ಕೆಲ ದಿನಗಾ ನಂತರ ನಿಮ್ಮ ಬರಹ ಮತ್ತು ಪ್ರತಿಕ್ರಿಯೆಗಳು(ಇತರ ರ ಬರಹಗಳಿಗೆ)ನೋಡಿ ಓದಿ ಖುಷಿ ಆಯ್ತು..

ಶುಭವಾಗಲಿ..

ಆ ಪರ ಶಿವನು ಸಕಲರಿಗೆ ಆಶೀರ್ವದಿಸಲಿ..

\।