ಸಿಂಪಲ್ಲಾಗ್ ಎದೆಯೊಳಗೆ ಕಚಗುಳಿಯಿಡುತ್ತೆ ಈ ಲವ್ ಸ್ಟೋರಿ !

ಸಿಂಪಲ್ಲಾಗ್ ಒಂದ್ ಲವ್ ಸ್ಟೋರಿ ಸುನಿ ಎಂಬ ಹೊಸ ನಿರ್ದೇಶಕನ ಚಿತ್ರ. ಈ ಸಿನಿಮಾದಲ್ಲಿ ಯಾವುದೇ ದೊಡ್ಡ ಸ್ಟಾರ್ ನಟಿಸಿಲ್ಲ,  ಇದರಲ್ಲಿ ರಕ್ಷಿತ್ ಶೆಟ್ಟಿ ಎಂಬ ಮಂಗಳೂರಿನ ಹುಡುಗ ಜೊತೆ ಕನ್ನಡ ಕಿರುತೆರೆಯಲ್ಲಿ ಹಿಂದೊಮ್ಮೆ ಕಾಣಿಸಿಕೊಂಡಿದ್ದ ಶ್ವೇತಾ ಶ್ರೀವಾಸ್ತವ್ ಎಂಬ ಹುಡುಗಿ ನಟಿಸಿದ್ದಾಳೆ. ಚಿತ್ರದ ಇತರ ತಾರಾವರ್ಗದಲ್ಲೂ ದೊಡ್ಡ ನಟರು ಯಾರೂ ಇಲ್ಲ.  ನಿರ್ದೇಶಕರಿಂದ ಹಿಡಿದು ಪ್ರತಿಯೊಬ್ಬ ತಂತ್ರಜ್ಞನೂ ಹೊಸಬ, ಹಾಡುಗಳನ್ನು ಮಲೇಶಿಯಾ, ಸಿಂಗಾಪುರ, ಯೂರೋಪ್‍ಗಳಲ್ಲಿ ಚಿತ್ರಿಸಿಲ್ಲ. ಹೆಸರೇ ಹೇಳೋಹಾಗೆ ಇಲ್ಲಿ ಎಲ್ಲವೂ "ಸಿಂಪಲ್" ಆಗಿದೆ ಆದರೂ ನಂಬಿದ್ರೆ ನಂಬಿ ಈ ಚಿತ್ರ ಬಿಡುಗಡೆಯಾದ ದಿನದ ಮೊದಲ ಆಟಕ್ಕೆ ಯಾವ ಸ್ಟಾರ್ ನಟನ ಚಿತ್ರಕ್ಕೂ ಇರದಂಥ ಭರ್ಜರಿ ಜನ ಬೆಂಬಲ ವ್ಯಕ್ತವಾಗಿದೆ!. ಮಲ್ಟಿಪ್ಲೆಕ್ಸ್‍ಗಳತ್ತ  ತಲೆ ಹಾಕುವುದನ್ನೇ ಮರೆತಿದ್ದ ಕನ್ನಡ ಪ್ರೇಕ್ಷಕ ಈ ಚಿತ್ರವನ್ನು ಮುಗಿಬಿದ್ದು ನೋಡುತ್ತಿದ್ದಾನೆ. ಮೊದಲ ಮೂರು ದಿನದ ಎಲ್ಲಾ ಆಟಗಳೂ ಬಹುತೇಕ ಬುಕ್ ಆಗಿವೆ. ಕೆಲವು ಮಲ್ಟಿಪ್ಲೆಕ್ಸ್‍ಗಳು ವಿಶೇಷ ಪ್ರದರ್ಶನಗಳನ್ನು ಏರ್ಪಡಿಸಿವೆ. ಕಾಲೇಜ್ ಹುಡುಗ ಹುಡುಗಿಯರ ಜೊತೆ ಕುಟುಂಬಸ್ಥರೂ ಸಿನಿಮಾ ಮಂದಿರಗಳತ್ತ ಧಾವಿಸುತ್ತಿದ್ದಾರೆ. ಟಿಕೆಟ್ ಸಿಗದೆ ವಾಪಸ್ ಬಂದವರೂ ಇದ್ದಾರೆ, ಬ್ಲ್ಯಾಕ್‍ನಲ್ಲಿ ದುಪ್ಪಟ್ಟು ಹಣಕೊಟ್ಟು ನೋಡಿದವರೂ ಇದ್ದಾರೆ. ಯಾರೂ ಊಹಿಸಿರದ ಆರಂಭ ಚಿತ್ರಕ್ಕೆ ಸಿಕ್ಕಿದ್ದು ಸ್ವತಃ ಚಿತ್ರ ತಂಡವನ್ನೇ ಒಂದು ಹಂತಕ್ಕೆ ಬೆಚ್ಚಿ ಬೀಳಿಸಿದೆ.

 

ಹೌದು, ಇಷ್ಟೆಲ್ಲಾ ಜನ ನೋಡುವಂಥದ್ದು ಏನಿದೆ ಈ ಚಿತ್ರದಲ್ಲಿ ಅಂದ್ರಾ? ಚಿತ್ರದ ಸಂಭಾಷಣೆ ಮತ್ತು ಚಿತ್ರವನ್ನು ನಿರೂಪಿಸಿದ ರೀತಿ ಪ್ರೇಕ್ಷಕರ ಎದೆಯೊಳಗೆ ನುಗ್ಗಿ ಕಚಗುಳಿ ಇಡೋದು ಖಂಡಿತ. ಅಂತದ್ದೊಂದು ಶಕ್ತಿ ಚಿತ್ರಕ್ಕಿದೆ.  ಇಬ್ಬರೂ ತಂತಮ್ಮ ಹಳೆ ಲವ್ ಸ್ಟೋರಿ ಹೇಳಿಕೊಳ್ಳುತ್ತಾ ಕಥೆ ಮುಂದೆ ಸಾಗುತ್ತದೆ. ಪ್ಲ್ಯಾಷ್ ಬ್ಯಾಕ್ ಹೇಳುವಾಗ ತನ್ನೆದುರು ಕುಳಿತ ನಾಯಕಿಯನ್ನೇ ಮನಸ್ಸಲ್ಲಿ ಕಲ್ಪಿಸಿಕೊಂಡು ನಾಯಕ್ಲ ಕಥೆ ಹೇಳಿದರೆ, ನಾಯಕಿ ಕೂಡ ನಾಯಕನ್ನೇ ಮನಸಲ್ಲಿ ಕಲ್ಪಿಸಿಕೊಂಡು ತನ್ನ ಹಳೆಯ ಪ್ರೇಮ ಪುರಾಣವನ್ನು ಬಿಚ್ಚಿಡುತ್ತಾಳೆ. ಈ ಪ್ಲ್ಯಾಷ್ ಬ್ಯಾಕ್‍ನಲ್ಲೇ ಪ್ರೇಕ್ಷಕಕೂಡ ಕಳೆದು ಹೋಗುತ್ತಾನೆ. ಚಿತ್ರದ ಕೊನೆಯಲ್ಲೊಂದು ತಿರುವಿದೆ, ಹಾಗೆಯೇ ಚಿತ್ರವನ್ನು ಮುಗಿಸಿದ ರೀತಿ ಕೂಡಾ ಮೆಚ್ಚುವಂಥದ್ದು. ಕಥೆ ಸಿಂಪಲ್ ಆದರೆ ನಾಯಕ-ನಾಯಕಿ ಮಾತಾಡಿಕೊಳ್ಳುವ ರೀತಿಯೇ ಚಿತ್ರದ ಪ್ರಧಾನ ಆಕರ್ಷಣೆ. ಅಲ್ಲಲ್ಲಿ ದ್ವಂದ್ವಾರ್ಥ ಎನಿಸಿದರೂ ಯಾವುದೂ ಅತಿರೇಕವಾಗಿಲ್ಲ. ಒಂದೊಂದು ಸಂಭಾಷಣೆಗೂ ಶಿಳ್ಳೆಗಳ ಸ್ವಾಗತ. ಓಟ್ಟಿನಲ್ಲಿ ಒಂದು ಒಳ್ಳೆಯ ಚಿತ್ರ.