ಸಂಗಾತಿಯೊಲವು

                      ಸಂಗಾತಿಯೊಲವು

ಸಂಗಾತಿಯೊಲವಿರಲು ಸುಪ್ತಸಾಗರಗಳನು
ತಲ್ಲಣಿಸಿ ಮೀರುವಾಸೆ
ಬಯಕೆಗಳ ಹರಿಗೋಲನೇರಿ ಪಯಣಿಸುತಿರಲು
ಹುಟ್ಟು ಹಿಡಿದವಳು ಚೆಲುವಿನಾಕೆ ||

ಸಂಗಾತಿಯೊಲವೋ ಅಮೃತ
ನಿತ್ಯ ಸಂಜೀವಿನಿ
ಅಧರಾಮೃತವೇ ಅದರ ಪ್ರತಿರೂಪ

ಚೆಲುವು ತೋರುವಳು ಆಸ್ತೆ ವಹಿಸುವಳು
ಮೆದುವೆರಳ ಆಟದಲಿ ಪುಳಕಗೊಳಿಸುವಳು
ಮಯ್ಯ ಮರೆಸುವಳು ಅರಿವು ನೀಡುವಳು
ಇದಕೆಲ್ಲ ಕಾರಣವು ಅವಳ ಒಲವು

ಭಾವಕ್ಕೆ ಪ್ರತಿಸ್ಪಂದಿ
ಸತ್ಯಕ್ಕೆ ಅನುವರ್ತಿ
ನಿತ್ಯವೂ ಎನಗಿವಳು ಸ್ಪೂರ್ತಿ

ಸಪ್ತ ಸಾಗರದಲೆಯು ಅಪ್ಪಳಿಸಿ ಬರುತಿರಲು
ಹುಟ್ಟುಹಿಡಿದವಳೊಲವು ನಿರತವಿರಲು
ತೀರವೆತ್ತಲುಯೆಂದು ತಿಳಿಯದವರಾದರೂ
ಪಯಣದಲಿ ಆನಂದ ಕಾಣಬಹುದು



                                                            -    ಸದಾನಂದ