ನ್ಯಾನೋ ಕತೆಗಳು (ಭಾಗ ಎ೦ಟು)

ಆಕೆಯ ಗ೦ಡ ಆಕೆಗೆ ಪದೇ ಪದೇ ಮೋಸ ಮಾಡುತ್ತಿದ್ದ.ಒ೦ದೆಡೆ ಸರಿಯಾಗಿ ನೌಕರಿ ಮಾಡದೆ ಪದೇ ಪದೇ ಕ್ಷುಲ್ಲಕ ಕಾರಣಗಳಿಗೆ ಕೆಲಸ ಬಿಡುತ್ತಿದ್ದ.ಈಕೆಯ ದುಡಿಮೆಯಲ್ಲಿಯೇ ಬದುಕುವುದಲ್ಲದೇ ಸುಳ್ಳು ಕಾರಣಗಳನ್ನು ಕೊಟ್ಟು ಆಕೆಯಿ೦ದ ಹಣ ಕೀಳುತ್ತಿದ್ದ.ಆಕೆಗದು ಗೊತ್ತಿದ್ದರೂ ಸುಮ್ಮನಿರುತ್ತಿದ್ದಳು.ಒಮ್ಮೆ ದೊಡ್ಡದೊ೦ದು ಮೊತ್ತದ ಹಣ ಗ೦ಡ ತನ್ನಿ೦ದ ಲಪಟಾಯಿಸಿದ್ದು ಗೊತ್ತಾಗಿ ಮಾನಸಿಕ ಕಿರಿಕಿರಿಯಿ೦ದ ಬಳಲಿದ ಆಕೆ ಏನು ಮಾಡುವುದೆ೦ದು ಗೊತ್ತಾಗದೇ ನೆಮ್ಮದಿಗಾಗಿ ಸಿನಿಮಾವೊ೦ದಕ್ಕೆ ತೆರಳಿದಳು.ಸಿನಿಮಾದಲ್ಲಿ ಗ೦ಡ ಹೊಡೆದರೂ ಹೊಡೆಸಿಕೊ೦ಡು,ವೇಶ್ಯೆಯ ಮನೆಗೆ ಹೋದರೂ ಸುಮ್ಮನಿರುವ,ವರದಕ್ಷಿಣೆಗಾಗಿ ಸುಟ್ಟರೂ ಸುಮ್ಮನಿರುವ ನಾಯಕಿಯ ಪಾತ್ರ ಕ೦ಡ ಈಕೆ ’ಥೂ ..!! ಎ೦ಥಾ ಕಚಡಾ ಫಿಲ್ಮ್ ಇದು.. ಈಗಿನ ಕಾಲದಲ್ಲಿ ಯಾರಿರ್ತಾರೆ ಈ ತರಹದ ಹೆ೦ಗಸರು..?? ನನ್ನ೦ಥವಳಾಗಿದ್ದರೇ ಡೈವೋರ್ಸ್ ಕೊಟ್ಟು ಜೈಲಿಗೆ ಹಾಕುತ್ತಿದ್ದೆ ಇ೦ಥವರನ್ನ..’ ಎನ್ನುತ್ತಾ ಮಧ್ಯದಲ್ಲಿಯೇ ಚಿತ್ರ ಮ೦ದಿರದಿ೦ದ ಹೊರನಡೆದಳು

***********************************************************************************************************************************

ತಾನುಮೊದಲ ಬಾರಿಗೆ ಹೋಗುತ್ತಿರುವ ಸ್ಟಾಪಿನ ಬಗ್ಗೆ ಆ ಮುದುಕ ಪಕ್ಕದಲ್ಲಿ ಕುಳಿತಿದ್ದ ಯುವಕನನ್ನು ಪದೇ ಪದೇ ವಿಚಾರಿಸುತ್ತಿದ್ದ.'ತಾತಾ, ಸ್ಟಾಪ್ ಬಂದ್ರೇ ನಾನೇ ಹೇಳ್ತೀನಿ.ಎಷ್ಟು ಸಲ ಕೇಳ್ತೀರಾ...'? ಎಂದು ಸಿರ್ರನೇ ಸಿಡುಕಿದ ಯುವಕ.ವೃದ್ಧ ಸುಮ್ಮನಾದ.ತನ್ನ ಸ್ಟಾಪಿನಲ್ಲಿಳಿದ ಯುವಕ ಇಂಟರವ್ಯೂ ಗೆ ಹೋಗಬೇಕಾಗಿದ್ದ ಬಸ್ಸನ್ನೇರಿ, ತನಗೆ ಗೊತ್ತಿರದ ಆ ಸ್ಟಾಪಿನ ಬಗ್ಗೆ ಪಕ್ಕದಲ್ಲಿ ಕುಳಿತವರನ್ನು ವಿಚಾರಿಸಿದ,ಹಿಂದೆ ಕುಳಿತವರನ್ನು ಕೇಳಿದ,ನಿರ್ವಾಹಕರನ್ನು ಮೂರು ಬಾರಿ ಕೇಳಿದ.'ಸ್ಟಾಪ್ ಬಂದ್ರೇ ನಾನೇ ಹೇಳ್ತೀನಿ ಸಾರ್,ಯಾಕೆ ಪದೇ ಪದೇ ಕೇಳ್ತೀರಾ..'? ಎಂದ ನಿರ್ವಾಹಕ. ನಿರ್ವಾಹಕನ ಮುಖದಲ್ಲಿ ಮೂಡಿದ ಅಸಹನೆ ಕಂಡು ಯುವಕ ಸುಮ್ಮನಾದ.

***********************************************************************************************************************************

ಆಫೀಸಿನ ಫೈಲುಗಳಲ್ಲಿ ತಪ್ಪುಗಳ ಮೇಲೆ ತಪ್ಪುಗಳನ್ನು ಕ೦ಡ ಕ೦ಪನಿಯ ಮಾಲೀಕ ಸರಿಯಾಗಿ ಕೆಲಸ ಮಾಡುವುದಾದರೇ ಮಾಡಿ,ಇಲ್ಲವಾದರೇ ಕೆಲಸ ಬಿಟ್ಟು ಹೊರಡಿ ಎ೦ದು ಆ ವೃದ್ಧನಿಗೆ ಬಯ್ದ.ಮನೆಗೆ ಬ೦ದ ವೃದ್ಧ ಪದವಿಯಾಗಿದ್ದರೂ ಇನ್ನೂ ಕೆಲಸ ಸಿಗದ ಮಗನನ್ನು ನೋಡಿ ’ಏಯ್ ದ೦ಡಪಿ೦ಡ,ಯಾಕಾದ್ರೂ ಹುಟ್ಟಿದಿಯೋ ನನ್ನ ಹೊಟ್ಟೇಲಿ..’ ಎ೦ದು ಸಿಡುಕಿದ. ಕೆಲಸ ಸಿಗದ ಅಸಹನೆಯಲ್ಲಿದ್ದ ಮಗ,’ನಾನೇನು ಹುಟ್ಟಿಸು ಅ೦ತಾ ಕೇಳಿದ್ನಾ ನಿನ್ನ...’ ಎ೦ದು ಕೂಗಾಡಿ ಬೈಕನ್ನೇರಿ ಸ್ನೇಹಿತನ ಮನೆಗೆ ಹೊರಟಾಗ ಸಿಗ್ನಲ್ ನಲ್ಲಿ ಅಟೋವ...ೊ೦ದಕ್ಕೆ ಬೈಕ್ ತಾಗಿಸಿದ.ಮೀಟರ್ ಹೆಚ್ಚಾಗಿ ಓಡಿಸಿದ್ದಾನೆ೦ದು ಯಾರೋ ಕೊಟ್ಟ ಕ೦ಪ್ಲೇಟಿನಿ೦ದ ಕಿರಿಕಿರಿಯಲ್ಲಿದ್ದ ಆಟೋದವನು ’ಯಾಕೋ ನಿನ್ನ ...ನ್ನ ಕಣ್ಣು ಕಾಣೊಲ್ವಾ..’ ಎ೦ದು ಇವನ ಮೇಲೆ ರೇಗಿದ.’ಎನೋ ,ಬೋ..ಮಗನೇ ನನಗೇ ಬಯ್ತಿಯಾ..’ ಎ೦ದವನೇ ಇವನು ಆಟೋದವನಿಗೆ ಒದ್ದ.ಆಟೋದವನಿಗೆ ಬೀಳಬಾರದ ಜಾಗಕ್ಕೆ ಒದೆ ಬಿದ್ದು ಆಟೋದವನು ಸ್ಥಳದಲ್ಲೇ ಅಸುನೀಗಿದ.ಉದ್ಯೋಗ ಹಿಡಿಯಬೇಕಿದ್ದ ವಿದ್ಯಾವ೦ತ ಜೈಲು ಸೇರಿದ.ಮಗ ಜೈಲು ಸೇರಿದ ಸುದ್ದಿ ಕೇಳಿದ ವೃದ್ದ ಹೃದಯಾಘಾತದಿ೦ದ ಮೃತಪಟ್ಟ

***********************************************************************************************************************************

ಮೊಮ್ಮಗಳ ಮದುವೆ ನೋಡಿ ನೆಮ್ಮದಿಯಾಗಿ ಕಣ್ಣು ಮುಚ್ಚುತ್ತೇನೆ,ನಾನು ಸಾಯುವುದರೊಳಗೆ ಅವಳಿಗೊ೦ದು ಮದುವೆ ಮಾಡಿ ಎ೦ದು ಕಾಯಿಲೆ ಬಿದ್ದ ಅಜ್ಜಿ ಗೋಳಾಡಿದಳು.ಅವಳ ಗೋಳಾಟಕ್ಕೆ ಮಣಿದ ಮನೆಯವರು ಮೊಮ್ಮಗಳಿಗೆ ಮನಸ್ಸಿಲ್ಲದಿದ್ದರೂ ಒತ್ತಾಯಪೂರ್ವಕವಾಗಿ ಮದುವೆ ಮಾಡಿದರು.ಮೊಮ್ಮಗಳ ಮದುವೆಯಾಗುತ್ತಲೇ ಅಜ್ಜಿಯ ಆರೋಗ್ಯ ಸುಧಾರಿಸತೊಡಗಿತು.ಮೇಲ್ನೋಟಕ್ಕೆ ಒಳ್ಳೆಯವನ೦ತೇ ಕ೦ಡರೂ ಸ್ಯಾಡಿಸ್ಟ್ ಪತಿ ಮೊಮ್ಮಗಳನ್ನು ಮಾತುಮಾತಿಗೂ ಬಯ್ಯತ್ತಿದ್ದ,ವಿನಾಕರಣ ಹೊಡೆಯುತ್ತಿದ್ದ ,ಸಿಗರೇಟಿನಿ೦ದ ಸುಡುತ್ತಿದ್ದ.ಗ೦ಡನ ಹಿ೦ಸೆ ತಾಳಲಾರದೇ ಮದುವೆಯಾದ ವರ್ಷದೊಳಗೆ ಮೊಮ್ಮಗಳು ಆತ್ಮಹತ್ಯೆ ಮಾಡಿಕೊ೦ಡಳು.ಆಜ್ಜಿ ಸಾಯುವ ಮೊದಲು ಮೊಮ್ಮಗಳು ಸತ್ತಳು