"ನಂಬಿಕೆ"

ಇಂದು ಮುಂಜಾನೆ, ನಾನು ಹಾಗು ನನ್ನ ಗೆಳೆಯ ಇಬ್ಬರೂ ಹೋಟೆಲ್ ಒಂದರಲ್ಲಿ ತಿಂಡಿ ತಿನ್ನುತ್ತಾ, ಏನೇನೋ ಹರಟುತ್ತಾ ಕುಳಿತಿದ್ದೆವು, 

ಆಗ ದಿಗ್ಗನೆ ನನ್ನ ಗೆಳೆಯನ ಮನದಲ್ಲಿ ಏನೋ ಒಂದು ಪ್ರಶ್ನೆ ಮೂಡಿತು,

ನನ್ನನ್ನು ಕೇಳಿದ, "ಗೆಳೆಯ ನಂಬಿಕೆ ಎಂದರೇನು?" ಎಂದು, 

ನಾನು ಮುಗುಳ್ನಕ್ಕು ಹೇಳಿದೆ, ನಂಬಿಕೆ ಎಂದರೆ Belief, 

"ಅಯ್ಯೋ ಹಾಗಲ್ಲ ಮಾರಾಯ, ಪದಕ್ಕೆ ಇನ್ನೊಂದು ಪದದ ಅರ್ಥ ಅಲ್ಲ, ನಾನು ಕೇಳಿದ್ದು ಆ ಪದದ ಭಾವಾರ್ಥ, ಒಳಾರ್ಥ," ಎನೇನೊ ಗೊಣಗಿದ,

ನಾನು ಸುಮ್ಮನೆ ಏನೋ ಯೋಚಿಸುವನಂತೆ ನಟಿಸ ತೊಡಗಿದೆ (ವಾಸ್ತವವಾಗಿ ನನಗೆ ತಿನ್ನುವ ದೋಸೆಯ ಮೇಲೆ ಆಸಕ್ತಿ ಜಾಸ್ತಿ ಇತ್ತು),

ಅಷ್ಟುಹೊತ್ತಿಗಾಗಲೇ, ಹೋಟೆಲಿನ ಮಾಣಿ ಬಿಲ್ಲನ್ನು ತಂದು ನಮ್ಮ ಮುಂದಿಟ್ಟ, ದೋಸೆಯನ್ನು ಚಟ್ನಿಯಲ್ಲಿ ಅದ್ದಿ ಅದರ ಸ್ವಾದವನ್ನು ಸವಿಯುತ್ತಿದ್ದ ನನ್ನ ಹೊರ ಮನಸಿಗೆ ಅದರ ಅರಿವಾಗಲಿಲ್ಲ,

ತಿಂದು ಮುಗಿಸಿದ ನನ್ನ ಗೆಳೆಯ ಬಿಲ್ ಹಣವನ್ನು ಮಾಣಿಯ ಕೈಲಿಟ್ಟ, ಬಿಲ್ ತೆಗೆದುಕೊಂಡ ಮಾಣಿ, ಕ್ಯಾಷಿಯರ್ ಇದ್ದಲ್ಲಿಗೆ ಹೊದ‌, 

ನಾನು ನನ್ನ ಗೆಳೆಯನ ಮೇಲೆ ಕಿರುಚಿದೆ,,,

"ಏನಾಯ್ತು " ? ಅವನೆಂದ (ಬಹುಷಃ ಬಿಲ್ ಅವನು ಪಾವತಿಸಿದ್ದಕ್ಕೆ ನನಗೆ ಕೋಪ ಬಂದಿರಬೇಕು ಎಂದುಕೊಂಡನೇನೋ)

"ಮಾಣಿಯ ಕೈಯಲ್ಲಿ ಬಿಲ್ ನ ಹಣ ಕೊಟ್ಟೆಯಲ್ಲ! ಒಂದು ವೇಳೆ ಮಾಣಿ ಹಿಂತಿರುಗಿ ಬಂದು ಹಣವನ್ನೇ ನೀಡಿಲ್ಲ ಎಂದರೆ ?" ನಾನು ಅದೇ ದಾಟಿಯಲ್ಲಿ ನುಡಿದೆ,

"ಹ್ಹ ಹ್ಹ" ನಕ್ಕು ಬಿಟ್ಟ ಆತ,

ಯಾಕೇ ? ಯಾಕೆ ನಗ್ತಾ ಇದ್ದೀಯ ! ನಾನು ಕೇಳಿದೆ,

"ಜನರ ಮೇಲೆ ಅಷ್ಟು "ನಂಬಿಕೆ" ಕಳೆದುಕೊಂಡರೆ ಹೇಗೆ ಮಾರಾಯ?, ಅದೂ ಅಲ್ಲದೇ ಅಷ್ಟೂ "ನಂಬಿಕೆ" ಇಲ್ಲದೇ  ಅವನನ್ನು ಇಲ್ಲಿ ಕೆಲ್ಸಕ್ಕೆ ಇಟ್ಟುಕೊಳ್ತಾರ ?" ಗೆಳೆಯ ಉಸುರಿದ,

ನಾನು ಮುಗುಳ್ನಕ್ಕೆ, ಗೆಳೆಯ ಅವನ ಪ್ರಶ್ನೆಗೆ ಅವನೇ ಉತ್ತರ ಕಂಡುಕೊಂಡ, ಮಾಣಿ ನಂಬಿಕೆ ಉಳಿಸಿಕೊಂಡ. 

-ನವೀನ್ ಜೀ ಕೇ