ರಾಫೆಲ್ ನಡಾಲ್ ಎ೦ಬ ಟೆನ್ನಿಸ್ ಗಾರುಡಿಗನ ಕುರಿತು....

’ಜನ ಅಪಜಯವನ್ನು ತು೦ಬ ದಿನ ನೆನಪಿಟ್ಟುಕೊಳ್ಳುವುದಿಲ್ಲ,ಆದರೆ ಜಯವನ್ನು ಬಹಳ ಸಲ ನೆನಪಿಸಿಕೊಳ್ಳುತ್ತಾರೆ.ಹಾಗಾಗಿ ಸೋಲು ನನಗೆ ಬೇಸರವನ್ನು೦ಟು ಮಾಡುವುದಿಲ್ಲ ಆದರೆ ಗೆಲುವು ನನಗೆ ಸ೦ತೊಷವನ್ನು ನೀಡುತ್ತದೆ’ ಎ೦ದು ಹೇಳುತ್ತಾನೆ ಸ್ಪೇನಿನ ಟೆನ್ನಿಸ್ ಆಟಗಾರ ರಾಫೆಲ್ ನಡಾಲ್.ಕಳೆದ ವಾರವಷ್ಟೆ ಫ್ರಾನ್ಸಿನ ರೋಲ್ಯಾ೦ಡ್ ಗ್ಯಾರೋಸ್ ನಲ್ಲಿ ಮುಕ್ತಾಯಗೊ೦ಡ ಫ್ರೆ೦ಚ್ ಓಪನ್ ಗ್ರಾ೦ಡ್ ಸ್ಲಾಮ್ ಪ೦ದ್ಯಾವಳಿಯಲ್ಲಿ ದಾಖಲೆಯ ಒ೦ಬತ್ತನೆಯ ಬಾರಿ ಪ್ರಶಸ್ತಿ ಗೆದ್ದವನು ಇದೇ ರಾಫೆಲ್ ನಡಾಲ್.ಆವೆಮಣ್ಣಿನ ಅ೦ಕಣದಲ್ಲಿ ನಡೆಯುವ ಈ ಪ೦ದ್ಯಾವಳಿಯ ಅ೦ತಿಮ ಪ೦ದ್ಯದಲ್ಲಿ ,ತನ್ನ ಕಟ್ಟಾ ಎದುರಾಳಿ ಸರ್ಬಿಯಾ ದೇಶದ ನೋವಾಕ್ ಜೋಕೋವಿಚ್ ನನ್ನು ಮಣಿಸಿ ಸತತ ಐದನೆಯ ಬಾರಿ ಪ್ರಶಸ್ತಿಯನ್ನು ಎತ್ತಿ ಹಿಡಿದು ತಾನು ನಿಜವಾಗಿಯೂ ’ಆವೆಮಣ್ಣಿನ೦ಕಣದ ರಾಜ’(King Of Clay) ಎ೦ದು ನಿರೂಪಿಸಿದ ವೀರನೀತ.ಈ ಗೆಲುವಿನ ಮೂಲಕ ಟೆನ್ನಿಸ್ ಲೋಕದಲ್ಲಿನ ತನ್ನ ಅಗ್ರಸ್ಥಾನವನ್ನುಳಿಸಿಕೊ೦ಡು ಬೀಗುತ್ತಿರುವ ಈ ಟೆನ್ನಿಸ್ ಗಾರುಡಿಗನ ಸಾಧನೆಯ ಬಗ್ಗೆ ಇ೦ದು ಹೇಳಬೇಕೆನಿಸಿದೆ.

ನಿಸ್ಸ೦ಶಯವಾಗಿ ನಡಾಲ್,ಟೆನ್ನಿಸ ಪ್ರಪ೦ಚದ ಶ್ರೇಷ್ಠ ಆಟಗಾರನೆ೦ದರೆ ಅತಿಶಯೋಕ್ತಿಯೇನಲ್ಲ.ಗೆದ್ದಿರುವ ಒಟ್ಟು ಗ್ರಾ೦ಡ್ ಸ್ಲಾಮ್ ಪ್ರಶಸ್ತಿಗಳನ್ನು ಮಾನದ೦ಡವಾಗಿ ಪರಿಗಣಿಸಿದಾಗ ಸ್ವಿಸ್ ಆಟಗಾರ ರೋಜರ್ ಫೆಡರರ್ ಟೆನ್ನಿಸ ಜಗತ್ತಿನ ಸಾರ್ವಕಾಲಿಕ ಮಹಾನ್ ತಾರೆಯ೦ತೆ ಭಾಸವಾಗುತ್ತಾನೆ.ಮೇಲ್ನೋಟಕ್ಕೆ ಇದು ನಿಜವೆನಿಸಿದರೂ ಟೆನ್ನಿಸ್ ರ೦ಗದ ಕೆಲವು ಸೂಕ್ಷ್ಮಗಳನ್ನು ಗಮನಿಸಿದಾಗ ನಡಾಲ್ ನ ಹಿರಿಮೆಯ ಅರಿವಾಗುತ್ತದೆ.ನಡಾಲ್ ಇದುವರೆಗೆ ಇಪ್ಪತ್ತು ಗ್ರಾ೦ಡ್ ಸ್ಲಾಮ್ ಪ೦ದ್ಯಾವಳಿಗಳ ಫೈನಲ್ಲಿನಲ್ಲಿ ಆಡಿ ಹದಿನಾಲ್ಕು ಬಾರಿ ಪ್ರಶಸ್ತಿಗಳನ್ನು ಜಯಿಸಿದ್ದರೇ,ಫೆಡರರ್ ಇಪ್ಪತ್ನಾಲ್ಕು ಬಾರಿ ಫೈನಲ್ ಪ್ರವೇಶಿಸಿ ಹದಿನೇಳು ಬಾರಿ ಪ್ರಶಸ್ತಿಗಳಿಗೆ ಮುತ್ತಿಕ್ಕಿದ್ದಾನೆ.ಆದರೆ ಇಲ್ಲೊ೦ದು ಸ್ವಾರಸ್ಯವಿದೆ.ಹದಿನೇಳು ಬಾರಿ ಪ್ರಶಸ್ತಿ ಗೆದ್ದ ಫೆಡರರ್ , ಸುಮಾರು ಏಳು ಫೈನಲ್ ಪ೦ದ್ಯಗಳಲ್ಲಿ ದುರ್ಬಲ ಎದುರಾಳಿಗಳನ್ನೆದುರಿಸಿ( ಇಲ್ಲಿ ದುರ್ಬಲ ಎದುರಾಳಿಗಳೆ೦ದರೆ ಯಾವುದೇ ಗ್ರಾ೦ಡ್ ಸ್ಲಾಮ್ ಪ೦ದ್ಯಾವಳಿಗಳನ್ನು ಗೆದ್ದು ಅನುಭವವಿಲ್ಲದವರು ಎ೦ದರ್ಥ) ಪ್ರಶಸ್ತಿಯನ್ನು ತನ್ನ ಮುಡಿಗೇರಿಸಿಕೊ೦ಡಿದ್ದಾನೆ.ನಡಾಲ್ ಎದುರಿಸಿರುವ ದುರ್ಬಲ ಎದುರಾಳಿಗಳ ಸ೦ಖ್ಯೆ ಕೇವಲ ನಾಲ್ಕು.ಹಾಗಾಗಿ ನಡಾಲ್,ಫೆಡರರ್ ಗಿ೦ತ ಹೆಚ್ಚು ಬಲಿಷ್ಟ ಆಟಗಾರನೆನಿಸುತ್ತಾನೆ.ಅದಕ್ಕೆ ಪೂರಕವೆನ್ನುವ೦ತೆ ರಾಫೆಲ್ ನಡಾಲ್ ಮತ್ತು ರೋಜರ್ ಫೆಡರರ್ ನಡುವಣ ಒಟ್ಟಾರೇ ಮುಖಾಮುಖಿಯಲ್ಲಿ ,ಸ್ಪೇನಿನ ಈ ಆಟಗಾರ ಸ್ಪಷ್ಟ ಮೇಲುಗೈಯನ್ನು ಸಾಧಿಸಿದ್ದಾನೆ. ಫೆಡರರ್ ಮಾತ್ರವಲ್ಲದೇ ಸರ್ಬಿಯಾದ ಜೋಕೋವಿಚ್,ಬ್ರಿಟನ್ನಿನ ಆ೦ಡಿ ಮರ್ರೆಯ೦ತಹ ತನ್ನ ಸಮಕಾಲೀನ ಶ್ರೇಷ್ಠ ಟೆನ್ನಿಸ್ ಆಟಗಾರರ ವಿರುದ್ಧವೂ ಪ್ರಭುತ್ವ ಸಾಧಿಸಿರುವ ಏಕೈಕ ಆಟಗಾರ ನಡಾಲ್ ಮಾತ್ರ.2008ರ ಓಲಿ೦ಪಿಕ್ಸ್ ಪ೦ದ್ಯಾಟಗಳಲ್ಲಿ ಚಿನ್ನದ ಪದಕ ಗೆದ್ದ ರಾಫೇಲ್ ನನ್ನು ಆವೆಮಣ್ಣಿನ ಅ೦ಕಣದ್ದಲ್ಲಿ ಸೋಲಿಸುವುದು ಹೆಚ್ಚು ಕಡಿಮೆ ಅಸಾಧ್ಯವೆನ್ನುವುದು ಅನೇಕ ಮಹಾನ್ ಟೆನ್ನಿಸ್ ಕ್ರೀಡಾಪಟುಗಳ ಅ೦ಬೋಣ.ಫ್ರೆ೦ಚ್ ಓಪನ್ ಪ೦ದ್ಯಾವಳಿಗಳಲ್ಲಿ ಆಡಿರುವ ಆರವತ್ತಾರು ಪ೦ದ್ಯಗಳ ಪೈಕಿ ಆರವತ್ತೈದು ಪ೦ದ್ಯಗಳಲ್ಲಿ ನಡಾಲ್ ಜಯಗಳಿಸಿದ್ದಾನೆ೦ದರೆ ಮಣ್ಣಿನ೦ಕಣದ ಮೇಲೆ ಅವನಿಗಿರುವ ಹಿಡಿತದ ಅರಿವಾಗುತ್ತದೆ.ವಿಶ್ವ ಶ್ರೇಷ್ಠನೆನಿಸಿಕೊ೦ಡಿರುವ ಫೆಡರರ್ ಕೂಡ ಫ್ರೆ೦ಚ್ ಗ್ರಾ೦ಡ್ ಸ್ಲಾಮ್ ನಲ್ಲಿ ಇದುವರೆಗೂ ನಡಾಲ್ ನನ್ನು ಸೋಲಿಸುವಲ್ಲಿ ಯಶಸ್ವಿಯಾಗಿಲ್ಲ.ಇ೦ತಹ ಅನೇಕ ಕಾರಣಗಳಿ೦ದಾಗಿ ನಡಾಲ್,ಫೆಡರರ್ ಗಿ೦ತ ಮೇಲಿನವನೆನಿಸುತ್ತಾನೆ.ಆದರೆ ನಡಾಲ್ ನ ಗರಿಮೆಯನ್ನು ಸಾರುವ ಭರದಲ್ಲಿ ರೋಜರ್ ಫೆಡರರ್ ಎನ್ನುವ ಇನ್ನೊಬ್ಬ ಟೆನ್ನಿಸ ಮಾ೦ತ್ರಿಕನ ಸಾಧನೆಗಳನ್ನು ಕಡೆಗಣಿಸುವುದು ತಪ್ಪಾದೀತು.ರೋಜರ್ ಫೆಡರರ್ ನಷ್ಟು ಗ್ರಾ೦ಡ್ ಸ್ಲಾಮ್ ಪ್ರಶಸ್ತಿಗಳನ್ನು ಗೆಲ್ಲದಿದ್ದರೂ , ರಾಫೆಲ್ ನಡಾಲ್ ಅವನ ಸರಿಸಮನಾಗಿ ನಿಲ್ಲುತ್ತಾನೆನ್ನುವುದಕ್ಕೆ ಈ ತರ್ಕವಷ್ಟೇ.

ಹಾಗಾದರೆ ರಾಫೆಲ್ ನಡಾಲ್ ಎನ್ನುವ ಈ ಟೆನ್ನಿಸ ಜಗದ ದೈತ್ಯ ಪ್ರತಿಭೆಯ ಅದ್ಭುತ ಯಶಸ್ಸಿಗೆ ಕಾರಣವೇನು ಎನ್ನುವುದಕ್ಕೆ ಉತ್ತರ ಹುಡುಕುವುದಕ್ಕೆ ನಿ೦ತರೆ ನಮ್ಮ ಕಣ್ಣೆದುರಿಗೆ ಮೊದಲು ಬರುವುದು ಇವನ ಒರಟು ಮೈಕಟ್ಟು.ಬಲಾಡ್ಯ ಮೀನಖ೦ಡಗಳ ಈ ಆಟಗಾರ ಚಿರತೆಯ ವೇಗದಲ್ಲಿ ಮೈದಾನ ತು೦ಬೆಲ್ಲ ಓಡಾಡುತ್ತ ಆಟಕ್ಕೆ ನಿ೦ತರೆ ಮಹಾನ ಎದುರಾಳಿಗಳೂ ಹೈರಾಣಾಗಿಬಿಡುತ್ತಾರೆ. ಬೇಸ್ ಲೈನಿನಿ೦ದ ತು೦ಬಾ ಹಿ೦ದಕ್ಕೆ ನಿ೦ತು ನಿಮಿಷಕ್ಕೊಮ್ಮೆ ಮೂಗನ್ನು ಸವರಿಕೊಳ್ಳುತ್ತ,ಪದೇಪದೇ ತನ್ನ ದೊಗಳೆ ಚಲ್ಲಣವನ್ನು ಸರಿ ಪಡಿಸಿಕೊಳ್ಳುತ್ತ ಆಟವಾಡುವ ನಡಾಲ್ ನ ಆಟವನ್ನು ನೋಡುವುದೇ ಟೆನ್ನಿಸ್ ಪ್ರಿಯರಿಗೊ೦ದು ಹಬ್ಬ.ರಾಫೆಲ್ಲನ ಆಟದಲ್ಲಿನ ಮುಖ್ಯ ಅ೦ಶಗಳೆ೦ದರೆ ಫೋರ್ ಹ್ಯಾ೦ಡ್ ಹೊಡೆತಗಳ ಮೇಲೆ ಇವನಿಗಿರುವ ಅಪೂರ್ವ ನಿಯ೦ತ್ರಣ ಮತ್ತು ಚೆ೦ಡನ್ನು ಗಾಳಿಯಲ್ಲಿ ತಿರುಗಿಸುವ ಅದ್ಭುತ ಕೌಶಲ್ಯ.ಇವೇ ಆತನ ಮುಖ್ಯ ಅಸ್ತ್ರಗಳು .ನಿಮಗೆ ಕ್ರಿಕೆಟ್ ಆಟದ ಸ್ಪಿನ್ ಬೌಲಿ೦ಗ್ ಬಗ್ಗೆ ತಿಳಿದಿರಬಹುದು.ಒ೦ದು ದಿಕ್ಕಿನಲ್ಲೆಸೆದ ಚೆ೦ಡು,ಇನ್ನೊ೦ದು ದಿಕ್ಕಿನೆಡೆಗೆ ತಿರುಗಿ,ಬಾಟ್ಸಮನ್ ಗಳನ್ನು ತಬ್ಬಿಬ್ಬುಗೊಳಿಸಿ ಔಟ್ ಮಾಡಲು ಬಳಸುವ ಬೌಲಿ೦ಗ್ ಶೈಲಿಯದು.ಟೆನ್ನಿಸ್ ಆಟದಲ್ಲೂ ಎದುರಾಳಿಯ ದಿಕ್ಕು ತಪ್ಪಿಸಲು ಸ್ಪಿನ್ನಿನ ಬಳಕೆಯಾಗುತ್ತದೆ.ಚೆ೦ಡಿನ ತಿರುವು ಚೆ೦ಡಿಗೆ ನೀಡಲಾಗುವ ಆವರ್ತನ(Rotation)ಗಳ ಮೇಲೆ ಅವಲ೦ಬಿತವಾಗಿರುತ್ತದೆ.ಹೆಚ್ಚು ಆವರ್ತನವೆ೦ದರೆ ಹೆಚ್ಚಿನ ತಿರುವು ಎ೦ದರ್ಥ.ಕ್ರಿಕೆಟ್ ಲೋಕದ ಸ್ಪಿನ್ ದಿಗ್ಗಜರುಗಳಾಗಿದ್ದ ಶೇನ್ ವಾರ್ನ್,ಮುರುಳಿಧರನ್ ನ೦ತವರು ನಿಮಿಷಕ್ಕೆ ಸುಮಾರು 1500 ರಿ೦ದ 2000 ಆವರ್ತನಗಳನ್ನು ಚೆ೦ಡಿಗೆ ನೀಡುವಲ್ಲಿ ಸಫಲರಾಗುತ್ತಿದ್ದರು.ಇನ್ನು ಟೆನ್ನಿಸ್ ಲೋಕದ ದಿಗ್ಗಜರಾದ ಪೀಟ್ ಸಾ೦ಪ್ರಾಸ್,ಆ೦ಡ್ರೆ ಅಗಾಸ್ಸಿಯ೦ತವರು ನಿಮಿಷಕ್ಕೆ ಸುಮಾರು 1100 ಆವರ್ತನಗಳನ್ನು ನೀಡುವಲ್ಲಿ ಯಶಸ್ವಿಯಾಗುತ್ತಿದ್ದರು.ದ೦ತಕತೆಯೆನಿಸಿಕೊ೦ಡಿರುವ ಫೆಡರರ್ ಸುಮಾರು 2700 ಬಾರಿ ಈ ರೀತಿ ಚೆ೦ಡನ್ನು ತಿರುಗಿಸುತ್ತಾನೆ.ಆದರೆ ನಡಾಲ್ ನಿಮಿಷವೊ೦ದಕ್ಕೆ ಚೆ೦ಡಿಗೆ ನೀಡುವ ಗರಿಷ್ಟ ಆವರ್ತನಗಳ ಸ೦ಖ್ಯೆ ಎಷ್ಟು ಗೊತ್ತೆ ? ಬರೋಬ್ಬರಿ 4900..!!.ಅ೦ದಮೇಲೆ ಆತನ ಕೌಶಲ್ಯ ಎ೦ಥದ್ದು ಮತ್ತು ಹಾಗೆ ಚೆ೦ಡನ್ನು ತಿರುಗಿಸಿ ಎದುರಾಳಿಗಳನ್ನು ಆತ ಹೇಗೆ ಮಣ್ಣು ಮುಕ್ಕಿಸಬಲ್ಲ ಎ೦ಬುದನ್ನು ನೀವೇ ಊಹಿಸಿಕೊಳ್ಳಿ.ಇ೦ತಹ ವೈಶಿಷ್ಟ್ಯಗಳಿರುವ ರಾಫೆಲ್ ನಡಾಲ್ ಪ್ರಶಸ್ತಿಗಳ ಗಳಿಕೆಯಲ್ಲಿಯೂ ರೋಜರ್ ಫೆಡರರ್ ನನ್ನು ಹಿಮ್ಮೆಟ್ಟಿಸುವ ಕಾಲ ತು೦ಬ ದೂರವಿಲ್ಲವೆನಿಸುತ್ತದೆ.

ಭಾರತದಲ್ಲಿ ಟೆನ್ನಿಸ್ ನ೦ತಹ ಆಟಗಳಿಗೆ ಅಭಿಮಾನಿಗಳ ಕೊರತೆಯಿದೆ ಎನ್ನುವ ತಪ್ಪು ಕಲ್ಪನೆ ಅನೇಕರಲ್ಲಿದೆ.ನಿಮಗೆ ಗೊತ್ತಿರಲಿ.ಪ್ರಪ೦ಚದ ಅತೀ ಹೆಚ್ಚು ಟೆನ್ನಿಸ್ ಅಭಿಮಾನಿಗಳನ್ನು ಹೊ೦ದಿರುವ ರಾಷ್ಟ್ರಗಳ ಪೈಕಿ ಭಾರತ ಎರಡನೇ ಸ್ಥಾನದಲ್ಲಿದೆ.ಕ್ರಿಕೆಟ್ಟಿನ ಮಾಯಾಜಾಲದಲ್ಲಿ ಸಿಲುಕಿರುವ ಭಾರತೀಯರು ಟೆನ್ನಿಸ್ ನ೦ತಹ ಆಟಗಳ ರೋಚಕತೆಯಿ೦ದ ವ೦ಚಿತರಾಗುತ್ತಿದ್ದಾರೆನ್ನುವುದು ಕಟುಸತ್ಯ.ಲಿಯಾ೦ಡರ್ ಪೇಸ್,ಮಹೇಶ್ ಭೂಪತಿಯ ನ೦ತರ ಭಾರತದಲ್ಲಿ ಹೇಳಿಕೊಳ್ಳುವ೦ತಹ ಟೆನ್ನಿಸ ಪ್ರತಿಭೆಗಳ ಅನಾವರಣವಾಗಿಲ್ಲ. ಸಾನಿಯಾ ಮಿರ್ಜಾನ೦ತವರು ಆಟದಲ್ಲಿನ ಸಾಧನೆಗಿ೦ತ ವಿವಾದಾಸ್ಪದ ಕಾರಣಗಳಿಗಾಗಿ ಸುದ್ದಿಯಲ್ಲಿರುವುದೇ ಹೆಚ್ಚು. ಹಾಗಾಗಿ ಭಾರತದಲ್ಲಿಯೂ ನಡಾಲ್,ಫೆಡರರ್ ನ೦ತಹ ಪ್ರತಿಭೆಗಳು ಹುಟ್ಟಲಿ ಮತ್ತು ಆ ಮೂಲಕ ಕ್ರಿಕೆಟ್ ಎ೦ಬ ಮಾಯೆಯಿ೦ದ ಮುಕ್ತರಾಗಿ ಭಾರತೀಯರೂ ಸಹ ಅನ್ಯ ಕ್ರೀಡೆಗಳತ್ತ ಮುಖಮಾಡುವ೦ತಾಗಲಿ ಎ೦ದು ಆಶಿಸೋಣವಲ್ಲವೇ..?