ಜೀವನ
ಕಾದುತಲಿ ಕಲಿತನದಿ ಕಾಡುತಲಿ ಹಗೆತನದಿ
ಹೊಗಳುತಲಿ ಸಂತಸದಿ ತೆಗಳುತಲಿ ಕುತ್ಸಿತದಿ
ಅರಿಯುತಲಿ ಉತ್ಸುಕದಿ ಮರೆಯುತಲಿ ಮೌಢ್ಯದೊಳು
ಅರಸುತಲಿ ತವಕದೊಳು ದೂಡುತಲಿ ಬೇಸರದಿ
ಸಂತಸದಿ ನಗುನಗುತ ದುಃಖದೊಳು ಅಳುವಿನಲಿ
ಕುಣಿಕುಣಿದು ಕುಪ್ಪಳಿಸಿ ಕುಸಿಕುಸಿದು ಉಮ್ಮಳಿಸಿ
ಬೀಗುತಲಿ ಎದೆಯುಬ್ಬಿ ಬೊಬ್ಬಿಡುತ ಭೀತಿಯಲಿ
ವಿಜಯದಲಿ ಹೂಂಕರಿಸಿ ಸೋಲಿನೊಳು ಕನಲುತಲಿ
ಜೀವನವ ಜಯಿಸುತಲಿ ಅನುಭವದ ಸಿರಿತನದಿ
ಸಾರ್ಥಕತೆಯ ಸದಾಶಯವ ಕರುಣಿಸೆಯಾ ಸದಾಶಿವನೆ.
Rating