ನಾನು ನಾನಾಗಬೇಕು

ನಾನು ನಾನಾಗಬೇಕು,

ನನ್ನದಲ್ಲದ ಹಾಡ ನಾನು ಹಾಡಲಿ ಹೇಗೆ,
ನನ್ನದಲ್ಲದ ನುಡಿಯ ನಾನು ನುಡಿಯಲಿ ಹೇಗೆ
ನನ್ನದಲ್ಲದ ಕನಸ ನಾನು ಕಾಣಲಿ ಹೇಗೆ
ನಾನು ನಾನಾಗಬೇಕು, ಅವರಿವರಂತಾಗದೆ.

ನನ್ನದಲ್ಲದ ಒಲವ ನಾನು ಬಯಸಲಿ ಹೇಗೆ
ನನ್ನದಲ್ಲದ ಮುಖವ ನಾ ಹೇಗೆ ತೊರಲಿ
ನನ್ನಲಿಲ್ಲದ ಚೆಲುವ, ನಾನು ತೋರಲಿ ಏಕೆ?
ನಾನು ನಾನಾಗಬೇಕು, ಅವರಿವರಂತಾಗದೆ.

ನನ್ನದಲ್ಲದ ದಾರಿಯನು ನಾನು ತುಳಿಯಲಿ ಹೇಗೆ
ನನ್ನದಲ್ಲದ ನೀತಿಗಳ, ನಾ ಹೇಗೆ ಪಾಲಿಸಲಿ
ಒಲ್ಲದ ಗೆಳತಿಯನು, ನಾನು ಮೆಚ್ಚಿಸಲೇಕೆ
ನಾನು ನಾನಾಗಬೇಕು, ಅವರಿವರಂತಾಗದೆ.

ನನ್ನೊಳಗಿಲ್ಲದ ನಾನು, ನಾನು ಆಗಲಿ ಏಕೆ?
ನನ್ನೊಳಗಿಲ್ಲದ ಹೆದರಿಕೆಗೆ, ನಾನು ಅಂಜಲಿ ಏಕೆ?
ಒಳಗೊಂದ, ಹೊರಗೊಂದನೆಣಿಸುವ ಇಬ್ಬಂದಿ ನನಗೇಕೆ?
ನಾನು ನಾನಾಗಬೇಕು, ಅವರಿವರಂತಾಗದೆ.

ಕನ್ನಡಿಯಾಗುವೆ, ಬಿಂಬವಾಗಲಾರೆ
ಬಿಂಬ ಮಿಥ್ಯ, ಕನ್ನಡಿಯು ನಿತ್ಯ

-----ಜಯಪ್ರಕಾಶ ನೇ ಶಿವಕವಿ