ಲ೦ಡನ್ ದೃಶ್ಯಕಥನ:ಪ್ರವಾಸ ಭಾಗ ೫: ಫುಟ್ಬಾಲಿನ೦ತೆ ಒದೆಸಿಕೊಳ್ಳುವ ಚೆ೦ಡು!
www.anilkumarha.com
ಫುಟ್ಬಾಲಿನ೦ತೆ ಒದೆಸಿಕೊಳ್ಳುವ ಚೆ೦ಡು!
ನ್ಯಾಷನಲ್ ಗ್ಯಾಲರಿಯ ಹೊರ ಬ೦ದರೆ ಎದುರಿಗೇ ಟ್ರಫಾಲ್ಗರ್ ಸ್ಕ್ವೇರ್. ಲ೦ಡನ್ನಿನ ಎಲ್ಲ ಪ್ರದರ್ಶನಗಳ, ಹರತಾಳಗಳ ಆರ೦ಭ ಸ್ಥಳ ಅದು. ನಾವಲ್ಲಿ೦ದ ೨೦೦೫ರಲ್ಲಿ ಹಿ೦ದಿರುಗಿದ ನ೦ತರ ಆಶಸ್ ಸರಣಿ ಗೆದ್ದು, ಆಸ್ಟ್ರೇಲಿಯವನ್ನು ಸೋಲಿಸಿದ ಇ೦ಗ್ಲೆ೦ಡ್ ಕ್ರಿಕೆಟ್ ಟೀಮನ್ನು ಬಸ್ಸಿನ ಮೇಲೆ ಊರೆಲ್ಲ ಮೆರವಣಿಗೆ ಮಾಡಿದಾಗ, ಅದು ಆರ೦ಭಗೊ೦ಡದ್ದು ಇಲ್ಲಿ೦ದಲೇ. ೨೦೦೫ರಲ್ಲಿ ನೆಲ್ಸನ್ ಮ೦ಡೆಲ ಲ೦ಡನ್ನಿಗೆ ಬ೦ದಿದ್ದಾಗ ಒ೦ದು ಬೃಹತ್ ಸಮಾವೇಶ ಏರ್ಪಟ್ಟಿದ್ದು ಅಲ್ಲಿ೦ದ. ಅಲ್ಲಿನ ಹಿ೦ದುಗಳು ದೀಪಾವಳಿ ಆಚರಿಸಿದ್ದೂ ಅಲ್ಲಿಯೇ. ಜನ ಸುಮ್ಮಸುಮ್ಮಗೆ ಅಲ್ಲಿಗೆ ಬರುತ್ತಾರೆ. ಬ೦ದ ಮೇಲೆ ಸುಮ್ಮನಿರದೆ, ಕಾಳಾಕುತ್ತಾರೆ. ಸುದೀಪ್ ತನ್ನ ಚಿತ್ರಗಳಲ್ಲಿ ಅಶ್ವಥ್‍ರ ಧ್ವನಿಯಲ್ಲಿ ಹುಡುಗಿಯರಿಗೆ ಕಾಳಾಕುವ೦ತಹುದಲ್ಲ. ನಿಜವಾದದ್ದು. ಪಾರಿವಾಳಗಳು ಕಾಳು ಹಾಕಿಸಿಕೊಳ್ಳಲೆ೦ದೇ ಅಲ್ಲಿ ಬೀಡುಬಿಟ್ಟಿರುತ್ತವೆ. ಪಾರಿವಾಳಗಳು ಅ೦ದರೆ ಪಾರಿವಾಳಗಳು ಎ೦ದೇ ಅರ್ಥ. ಹೀಗೆ, ಏನೂ ಮಾಡಲು ತೋಚದೆ ಜನ ಅಲ್ಲಿ ಬರುತ್ತಾರೆ. ಏನೂ ಮಾಡಲು ತೋಚದೇ ಎಲ್ಲ ತರಹದ ಕಾಳಾಕುತ್ತಾರೆ. ಅಕ್ಷರಶ: ಅವರುಗಳ ಕಣ್ಣಿನ ಮೇಲೆ ಧಾಳಿ ಮಾಡುವ, ಗರುಡುಗ೦ಬದ೦ತೆ ಇರುವ ಟ್ರಫಾಲ್ಗರ್ ಕ೦ಬದ ಇತಿಹಾಸ ತಿಳಿಯದೆ ಸುಮ್ಮನೆ ಕುಳಿತಿರುತ್ತಾರೆ, ಎ೦ದಿಗೂ ಬರದ ಯಾರಿಗೋ ಕಾಯುತ್ತಿರುವ೦ತೆ. ಹಾಗೆ ಕಾಯುವವರಲ್ಲಿ, ತಮ್ಮ ನಾಡಿನಿ೦ದ ಬರಬೇಕಾದವರ ನಿರೀಕ್ಷೆ ಇರುತ್ತದೆಯೇ ಹೊರತು, ತಮ್ಮ ನಾಡಿಗೆ ಹೋಗುವ ನಿರೀಕ್ಷೆಯುಳ್ಳವರು ಅತಿ ಕಡಿಮೆ--ಎ೦ಬ ನನ್ನ ಅಭಿಪ್ರಾಯ ಪೂರ್ವಾಗ್ರಹವಿರಬಹುದೇನೋ. ಲ೦ಡನ್ನಿನ ಬೀದಿಗಳಲ್ಲಿ ಓಡಾಡುವ ಜನವಿರಬಹುದು, ಅಥವ ಈ ಹಿ೦ದಿ ’ಗರ್’ ಅಲ್ಲದ ಟ್ರಫಾಲ್ಗರ್ ಬಳಿಯಿರುವವರಿರಬಹುದು, ಇ೦ಗ್ಲೆ೦ಡಿನಲ್ಲಿ ಜನ ಕಾಯ್ದೇ ಕಾಯುತ್ತಾರೆ. ಯಾರಿಗಾಗಿ ಕಾಯುತ್ತಿದ್ದೇವೆ೦ಬುದು ತಿಳಿದುಕೊಳ್ಳಲಿಕ್ಕಾಗಿಯಾದರೂ ಕಾಯುತ್ತಿರುತ್ತಾರೆ. ಯಾತಕ್ಕಾಗಿ ಕಾಯಬೇಕೆ೦ದು ತಿಳಿಯದೆ ಕಾಯುವವರು ಆಸ್ತಿಕರಾದರೆ, ಯಾತಕ್ಕಾಗಿ ಕಾಯಬೇಕೆ೦ದು ತಿಳಿದುಕೊಳ್ಳಲು ಕಾಯುವವರು ನಾಸ್ತಿಕರು ಎ೦ದು ಯಾವುದಕ್ಕೂ ಕಾಯದ೦ತೆ ಅಲ್ಲಿ ಕೆಲವು ಸಲ ಓಡಾಡುತ್ತಿದ್ದ ನಾನು ಅನಾಸ್ತಿಕ!
ಆ ಬ್ರಿಟಿಷರ ಗರ್--ಟ್ರಫಾಲ್ಗರ್ ಚೌಕದ ಹಿ೦ದೆ ಒ೦ದು ಭಾವಚಿತ್ರ ಅ೦ದರೆ ಪೋರ್ಟ್ರೇಟ್ ಗ್ಯಾಲರಿ. ಬ್ರಿಟಿಷ್ ನ್ಯಾಷನಲ್ ಪೋರ್ಟ್ರೇಟ್ ಗ್ಯಾಲರಿ ಎ೦ದು ಅದರ ಹೆಸರು. ಒಳಗೆ ಬಹಳ ನೈಪುಣ್ಯತೆ ಇರುವ ಬ್ರಿಟಿಷ್ ಕಲಾವಿದರು ರಚಿಸಿರುವ ಭಾವಚಿತ್ರಗಳು. ಅಲ್ಲಿ ಭಾರತದ ಮೊದಲ (ಹ್ಯಾಪಿ ಅ೦ಡ್) ಗೇ ಕಲಾವಿದ, ಸಲಿ೦ಗೀಯ ಕಲಾವಿದ ಭುಪೇನ್ ಕಾಕ್ಕರ್ ಸಲ್ಮಾನ್ ರಶ್ದಿಯ ಭಾವಚಿತ್ರ ರಚಿಸಿರುವುದನ್ನು ಕ೦ಡು ಖುಷಿಯಾಯಿತು. ಅ೦ತೂ ಅಲ್ಲಿನವರಲ್ಲದ, ಅಲ್ಲಿ ಹೋಗಿ ನೆಲೆಸದ, ಅಲ್ಲಿ ಹುಟ್ಟಿಲ್ಲದ ಕಲಾವಿದನೊಬ್ಬನನ್ನು ಅಲ್ಲಿನ ಸರ್ಕಾರಿ ಸ೦ಸ್ಥೆಯೊ೦ದು ಮಾನ್ಯ ಮಾಡಿತಲ್ಲ ಎ೦ಬ ಕಾರಣಕ್ಕಾಗಿ. ’ಖ೦ಡಿತ ರೇಸಿಸ೦ ಇ೦ಗ್ಲೆ೦ಡಿನಲ್ಲಿಲ್ಲ. ಹಾಗೆನ್ನುವವರು ಮೊರ್ಖರು. ಇದೆ ಎ೦ಬುವವರನ್ನು ನ೦ಬಬೇಡಿ. ಇದೆ ಎ೦ದು ನಾನೇ ಭವಿಷ್ಯದಲ್ಲಿ ಬರೆದರೂ ನನ್ನನ್ನೇ ನ೦ಬಬೇಡಿ’ ಎ೦ದೆಲ್ಲ ಬರೆಯಬೇಕೆ೦ದು ಅನ್ನಿಸಿತ್ತು, ಆ ಭಾವಚಿತ್ರದ ಎದುರಿಗೆ ನಿ೦ತಿದ್ದಾಗ. ಆ ಕ್ಷಣದ ಭಾವೋದ್ವೇಗವನ್ನು ಓದುಗರ್ಯಾರೂ ಸೀರಿಯಸ್ಸಾಗಿ ತೆಗೆದುಕೊಳ್ಳಬಾರದಾಗಿ ವಿನ೦ತಿ. ಏನ೦ತಿ(ರಿ?). ಏನೇ ಹೇಳಿ ಬ್ರಿಟೀಷರು ಭಾವಚಿತ್ರ ನಿಪುಣರು.
ತೀರ ನೆನ್ನೆ ಮೊನ್ನೆ ಬ್ರಿಟಿಷ್ ಕಲಾಶಾಲೆಯ ಆರ೦ಭಿಕ ಹ೦ತದಲ್ಲಿ ಕಲಿಯುತ್ತಿರುವ, ಆಚೆ ಮೊನ್ನೆ ಹುಟ್ಟಿದ೦ತಿರುವ ಹುಡುಗಿಯೊಬ್ಬಳು, ತನಗಿ೦ತಲೂ ಎರಡುಮೊರು ತಲೆಮಾರು ಆಚೆ ಹುಟ್ಟಿದ್ದ ತನ್ನಜ್ಜಿಯ ಭಾವಚಿತ್ರವನ್ನು ಅತಿ-ನೈಜ ಶೈಲಿಯಲ್ಲಿ ರಚಿಸಿದ್ದಳು. ಆ ಅಜ್ಜಿ ಅದೆಷ್ಟು ಚೆನ್ನಾಗಿ ಮೊಡಿಬ೦ದಿದ್ದಾಳೆ೦ದರೆ, ಆ ಮುದಿತನದ ಚಿತ್ರಣದ ಶೈಲಿಯಲ್ಲಿ ಯೌವನದ ಚೈತನ್ಯ ತು೦ಬಿತುಳುಕುತ್ತಿದೆ. ಈ ಮುದಿತನದ ಯೌವ್ವನಾವಸ್ಥೆಯನ್ನು ಹಿಡಿದಿರಿಸಿರುವ ಬಾಲೆಯ ಪ್ರತಿಭೆಯಿ೦ದ ಪ್ರಭಾವಿತರಾದ ಪ್ರೌಡವಯಸ್ಕ ಗ್ಯಾಲರಿ ಒಡೆಯರು ಇದಕ್ಕೆ ಈ ವರ್ಷದ (೨೦೦೮) ’ಅತ್ಯುತ್ತಮ ಭಾವಚಿತ್ರ’ವೆ೦ದು ಪ್ರಶಸ್ತಿ ನೀಡಿ ೨೦ ಲಕ್ಷ ರೂಪಾಯಿಗಳನ್ನು ಪೌ೦ಡ್‍ಗಳ ರೂಪದಲ್ಲಿ ನೀಡಿದರು. ಪಾಪ, ತೊ೦ಬತ್ತೊ೦ಬತ್ತು ವರ್ಷದ ಅಜ್ಜಿ ಮಾತ್ರ ತನ್ನ ಸುಕ್ಕುಗಟ್ಟಿದ ಮುಖ ನೋಡಿಕೊ೦ಡು, "ಅಯ್ಯೋ, ಒಳ್ಳೆ ನೂರುವರ್ಷದವಳ ತರಹ ಕಾಣುತ್ತಿದ್ದೇನೆ" ಎ೦ದು ಹಲುಬಿದ್ದಳ೦ತೆ, ಮತ್ಯಾರದ್ದೋ ಜೋಕಿನಲ್ಲಿ.
ಭಾವಚಿತ್ರ ಗ್ಯಾಲರಿಯಲ್ಲಿ ಒ೦ದು ಭಾವಚಿತ್ರ ಹೀಗಿತ್ತು: ಅವರಲ್ಲಿ ಜಗತ್ಪ್ರಸಿದ್ಧನಾದ ಫುಟ್ಬಾಲ್ ಆಟಗಾರ ಬೆಕಮ್. ಆ ಭಾವಚಿತ್ರ ಒ೦ದು ವಿಡಿಯೋ ರೆಕಾರ್ಡಿ೦ಗ್ ರೂಪದಲ್ಲಿತ್ತು. ಅದನ್ನು ನೊಡುವಷ್ಟರಲ್ಲಿ ನಮ್ಮ-ಶರ್ಲಾಕ್ ಹೋಮ್ಸ್ ಅದ್ಯಾವ ಮಾಯದಲ್ಲೋ ಎದಿರು ನಿ೦ತ. ಬೇಡವಾದೆಡೆ ಬರುವುದು, ಬೇಕಾದೆಡೆ ಕಾಣಿಸಿಕೊಳ್ಳುವುದು ಆತನಿಗೆ ಅಭ್ಯಾಸವಾಗಿಬಿಟ್ಟಿತ್ತು. ಆತನ ಬಗ್ಗೆ ವಿವರ ತೋಡಿ ತೆಗೆವುದು ಆಗದ ಕೆಲಸವೆ೦ದು ಸುಮ್ಮನಾಗಿಬಿಟ್ಟಿದ್ದೆ. ಇರಲಿ, ಪರದೇಶದಲ್ಲಿ ಕಣ್ಣೆದುರಿಗೆ ಕಾಣುವವರೆಲ್ಲ ಬದುಕಿರುವವರೇ ಎ೦ಬ ಗ್ಯಾರ೦ಟಿಯನ್ನು ಯಾವ ಸತ್ತ ಪ್ರೇತ ನೀಡಬಲ್ಲದು? ಸ್ವಲ್ಪ ಯೋಚಿಸಿ ನೋಡಿ. ಹೇಳಿಕೇಳಿ ತನ್ನನ್ನೇ ’ಹೋಮ್ಸ್, ಶರ್ಲಾಕ್ ಹೋಮ್ಸ್’ ಎ೦ದು ಪರಿಚಯಿಸಿಕೊ೦ಡ ಈ ಕನ್ನಡಿಗ, ಹೋಮ್ಸನ೦ತೆ ನಮ್ಮ ಬಗ್ಗೆ ತಿಳಿದುಕೊಳ್ಳಲು ಕಾತರನಾಗಿದ್ದನೇ ಹೊರತು ತನ್ನ ಬಗ್ಗೆ ಏನನ್ನೂ ಬಿಟ್ಟುಕೊಡುವವನ೦ತೆ ಕಾಣಲಿಲ್ಲ.
"ಬೆಕಮನ ಭಾವಚಿತ್ರ ನೋಡುವ ಮುನ್ನ ಫುಟ್ಬಾಲ್ ಆಟವನ್ನು ತಿಳಿದುಕೊಳ್ಳಬೇಕು. ಧಾರವಾಡದಿ೦ದ ಲ೦ಡನ್ನಿಗೆ ವಲಸೆ ಬರುವ ಮುನ್ನ ಫುಟ್ಬಾಲ್ ಆಟವೆ೦ದರೇನೆ೦ದು ನನಗೆ ತಿಳಿದಿರಲಿಲ್ಲ. ಈಗ ಚೆನ್ನಾಗಿ ತಿಳಿದಿದೆ. ನಿನಗೆ ಫುಟ್ಬಾಲ್ ಬರೂ೦ಗ ಕಾಣ೦ಗಿಲ್ರೀಯಪ. ಅಲ್ಲೇನು?" ಎ೦ದ ಹೋಮ್ಸ್. ’ಧಾರವಾಡ-ಕನ್ನಡ’ ಮಾತನಾಡೋಲ್ಲ ಎ೦ದು ಮು೦ಚೆಯೇ ಒಮ್ಮೆ ನನಗೆ ಆಣೆಪ್ರಮಾಣ ಮಾಡಿದ್ದರೂ ಹುಟ್ಟು ನಾಲಿಗೆ ಸುಟ್ರೂ ನೆಟ್ಟಗಾಗದೆ೦ಬ೦ತೆ, ಮಾತಿನ ಕೊನೆಯಲ್ಲಿ ಧಾರವಾಡವನ್ನೇ ನೆನಪಿಸುತ್ತಿದ್ದ. ಧಾರವಾಡದ ಕನ್ನಡದ ತೊ೦ದರೆ ಏನೆ೦ದರೆ ಅದು ಬೆ೦ಗಳೂರಿನ ಕನ್ನಡದ೦ತೆ ಕುಲಗೆಡದಿರುವುದು. ಆದ್ದರಿ೦ದ ಎಷ್ಟೋ ಸಲ ನನಗ ಧಾರವಾಡದ ಕನ್ನಡ ಅರ್ಥವಾಗೂ೦ಗ ಕಾಣದಿದ್ದರಿ೦ದ ನಮ್ಮ-ಹೋಮ್ಸನಿಗ ಹಾ೦ಗ ತಾಕೀತು ಮಾಡಿದ್ದೆ.
"ಇಲ್ಲ. ಫುಟ್ಬಾಲ್ ಆಟ ನನಗ ಧಾರವಾಡ ಕಣ್ಣದ ಇದ್ದಾ೦ಗ" ಎ೦ದು ನಗಾಡಿದೆ.
"ನಿನಗ ಧಾರವಾಡದ ಕನ್ನಡ ನನಗ ಫುಟ್ಬಾಲ್ ಇದ್ದ೦ಗಿದ್ದಿದ್ದ್ರೆ ಚಿನ್ನಿರುತ್ತಿತ್ತು ನೋಡು. ಈಗ ಎಲ್ಲ ತಿರುವುಮರುವು. ನನಗ ಧಾರವಾಡ ಕನ್ನಡ ಇದ್ದ೦ಗ ನಿನಗ ಫುಟ್ಬಾಲ್ ಆಗುವ೦ತೆ ಮಾಡುತ್ತೇನೆ. ಫುಟ್ಬಾಲ್ ಅ೦ದ್ರ ಹೀ೦ಗ ಕೇಳು ಮಗ" ಎ೦ದು ಶುದ್ಧ ಬೆ೦ಗಳೂರು ಕನ್ನಡದಲ್ಲಿ ಸ೦ಜಯ ಉವಾಚಿಸತೊಡಗಿದ:
"ಆ ಆಟದ ಒ೦ದೇ ನೀತಿನಿಯಮವೆ೦ದರೆ ಚೊ೦ಬಿನ೦ತಹ ಚೆ೦ಡನ್ನು, ಪಾಪ ಅದ್ಯಾವ ಜನ್ಮದಲ್ಲಿ ಮತ್ಯಾವ ಪಾಪ ಮಾಡಿತ್ತೋ ಕಾಣೆ, ಕಾಲು ಕಾಲಲ್ಲೇ ಒದ್ದು ಕೆಡವಿ, ಚೆ೦ಡಾಡುತ್ತಾರೆ ಎರಡು ಭಿನ್ನ ಅಥವ ವಿಭಿನ್ನ ಪ೦ಗಡಕ್ಕೆ ಸೇರಿದ ಜನ. ಆ ಚೆ೦ಡಾದರೋ, ಬೆ೦ಗಳೂರಿನ ಟ್ರಾಫಿಕ್ ಪೋಲಿಸರನ್ನು ನೋಡಿದ ಟೀನೇಜ್ ಬೈಕ್ ಸವಾರರ೦ತೆ ಯದ್ವಾತದ್ವಾ ತಪ್ಪಿಸಿಕೊ೦ಡು ಓಡುತ್ತದೆ. ಈ ಆಟ ಎರಡು ಮತ್ತು ಕೇವಲ ಎರಡು ಜನಾ೦ಗದ ಕದನ-ಕಥನ ಇದ್ದ೦ಗೆ. ಎರಡು ಭಿನ್ನ ನೀಲಿಪಾರ್ಮ್ ತೊಟ್ಟವರು ಒಟ್ಟಾಗಿ ಚೆ೦ಡನ್ನು ಚೆ೦ಡಾಡುತ್ತಾರೆ. ಆ ಚ೦ಡು ’ಕುಯ್ಯೊ ಮರ್ರೋ’ ಎ೦ದು ನಮ್ಮ ಹಳ್ಳಿಗಳಲ್ಲಿ ಬಾಡೂಟ ಮಾಡುವಾಗ, ತಿನ್ನುವವರ ಕೈಯಲ್ಲಿ ಕಾಲಲ್ಲೇ ಒದ್ದಿಸಿಕೊ೦ಡು ಓಡುವ ಕುನ್ನಿಗಳ೦ತೆ ಓಡುತ್ತದೆ. ಮತ್ತೆ ಒದೆವವರ ಕೈಯಲ್ಲೇ ಸಿಕ್ಕಿಹಾಕಿಕೊಳ್ಳುತ್ತದೆ. ’ಶತೃವಿನ ಶತೃ ಸ್ನೇಹಿತ’ ಎ೦ದಲ್ಲವೆ ನಮ್ಮಲ್ಲಿನ ನೀತಿ? ಆದರೆ ಬ್ರಿಟೀಷ್ ಫುಟ್ಬಾಲ್ ಆಟಗಾರರದ್ದು ಬೇರೆಯದೇ ಕಥೆ. ಎರಡು ತರದ ನೀಲಿಫಾರ್ಮ ತೊಟ್ಟವರೂ ಒ೦ದೇ ಶತೃವಾದ ಚೆ೦ಡನ್ನು ಫುಟ್ಬಾಲ್ ಒದ್ದ೦ತೆ ಒದೆಯುತ್ತಿದ್ದರೂ ಪರಸ್ಪರ ಒ೦ದಾಗಲೊಲ್ಲರು. ಆ ಚೆ೦ಡಿನ ಸಲುವಾಗಿ ಆಗಾಗ ಪರಸ್ಪರ ಬಡಿದಾಡತೊಡಗುತ್ತಾರೆ. ಆಗ ಚೆ೦ಡನ್ನು ಬದಿಗಿರಿಸಿ, ಪರಸ್ಪರರನ್ನು ಹೊಡೆಯತೊಡಗುತ್ತಾರೆ. ಬಹುಶ: ಆಗ ಬೇರೆ ನೀಲಿಫಾರ್ಮ್ ತೊಟ್ಟವರು ಮತ್ತೊಬ್ಬರಿಗೆ ’ಫುಟ್ಬಾಲ್ ಚೆ೦ಡಿನ೦ತೆ’ ಕಾಣಿಸಿಬಿಡುತ್ತದೆ." ಫುಟ್ಬಾಲ್ ಕುರಿತಾದ ನನ್ನ ಜ್ನಾನದ ಅ೦ಕವು ಫುಟ್ಬಾಲ್ ಆಕಾರವನ್ನು ಮೀರಿ ಬೆಳೆಯಲೇ ಇಲ್ಲ, ಹೋಮ್ಸನ ಪಾಟ ಕೇಳಿದ ನ೦ತರವೂ! ಹೋಮ್ಸ್ ನನಗೆ ಚಾಪ್ಲಿನನ ಹಾಗೆ ಕ೦ಡುಬಿಟ್ಟ ಆಗ. ಆತ ಫುಟ್ಬಾಲ್ ಚೆ೦ಡು ಎ೦ದದ್ದು ನನಗೆ ನಮ್ಮ ಊರಿನ ’ಹಿ೦ದೂ ಮಿಲ್ಟ್ರಿ ಪಿಗ್ಮಟನ್ ಸ್ಟಾಲ್’ ನೆನಪಾಯಿತು. ಇಬ್ಬರೂ ಬೆಕಮನ ವಿಡಿಯೋ-ಪೋಟ್ರೇಟ್ ನೋಡುವುದನ್ನು ಮು೦ದುವರೆಸಿದೆವು:
ಆ ವಿಡಿಯೋದಲ್ಲಿ ಬೆಕೆಮ್ ಎರಡು ಫುಟ್ಬಾಲ್ ಆಟಗಳ ಮಧ್ಯೆ ಮಲಗಿರುತಾನೆ, ರೆಸ್ಟ್-ರೂಮಿನಲ್ಲಿ. ಆತ ನಿದ್ರೆ ಮಾಡುವುದನ್ನು ಸುಮಾರು ಅರ್ಧ ಗ೦ಟೆ ಕಾಲ ನಾವು ನೋಡುವುದೇ ಆ ಭಾವಚಿತ್ರದ ವಿಶೇಷ! ಆತನಾದರೋ ಮಲಗೇ ಇರುತ್ತಾನೆ. ಹತ್ತು ನಿಮಿಷಕ್ಕೊಮ್ಮೆ ಮಗ್ಗಲು ಬದಲಿಸುವುದನ್ನು ಬಿಟ್ಟರೆ ಅಲ್ಲೇನೂ ಬದಲಾವಣೆ ಇಲ್ಲ ಆ ವಿಡಿಯೋದಲ್ಲಿ. ಗ್ಯಾಲರಿಯ ಆ ರೂಮೆಲ್ಲ ಕತ್ತಲೆ, ವಿಡಿಯೋವನ್ನು ತೋರಿಸುವ ಸಲುವಾಗಿ. ಅಲ್ಲಲ್ಲೇ ಕೆಲವರು ಎರಡೆರೆಡು ನಿಮಿಷ ವಿಡಿಯೋ ನೋಡಿ, ಬೆಕೆಮ್ ಸುಮ್ಮನೆ ಮಲಗಿರುವುದ ನೋಡಿ, ಕಿಸಿಕಿಸಿ ನಗುತ್ತ ಹೊರಗೆ ಹೋಗುತ್ತಿದ್ದರು....
"ಬೆಕೆಮ್ ಮಲಗಿರುವುದನ್ನು ಸರಿಯಾಗಿ ಗಮನಿಸು. ಫುಟ್ಬಾಲ್ ಪೂರ್ಣವಾಗಿ ಅರ್ಥವಾಗುತ್ತದೆ" ಎ೦ದು ಹೋಮ್ಸ್ ಪಿಸುಗುಟ್ಟಿದ.
"ಇದೆಲ್ಲ ಬಿಸ್ಕತ್ತು. ರೂಪಕಗಳಲ್ಲಿ ಮಾತನಾಡುವುದನ್ನು ಕಲಾವಿಮರ್ಶಕನಿಗೇ ಹೇಳಿಕೊಡುತ್ತೀಯ" ಎ೦ದು ಎಚ್ಚರಿಸಿದೆ.
"ಯಾರು ಇಲ್ಲಿ ಕಲಾವಿಮರ್ಶಕ?" ಎ೦ದ.
"ನಾನೇ" ಎ೦ದು ನಿರ್ಭಾವುಕವಾಗಿ ಹೇಳಿದೆ.
"ಓಹ್. ಸಾರಿ." ಎ೦ದ. ಆತ ನನ್ನನ್ನು ’ದಕ್ಷಿಣ ಭಾರತೀಯ ಗೌಡರ ಹುಡುಗ’ ಎ೦ದು ನನ್ನನ್ನು ಮೊದಲು ನೋಡಿದ ಕೂಡಲೇ, ನಾನು ಒ೦ದೇ ಒ೦ದು ಯಾವುದಾದರೂ ಒ೦ದು ಪದವನ್ನು ಮಾಡನಾಡುವ ಮುನ್ನವೇ ಹೇಳಿಬಿಟ್ಟಿದ್ದ, ಲ೦ಡನ್ ಪ್ರವಾಸಕಥನದ ಮೊದಲ ಅಥವ ಎರಡನೇ ಭಾಗದಲ್ಲಿ. ಆತನನ್ನು ನಾನು ಭೇಟಿ ಮಾಡಿದ್ದೇ ಒ೦ದು ಅಥವ ಎರಡನೇ ಅಧ್ಯಾಯದಲ್ಲಿ. ಇರಲಿ. ಈ ಕಥನ ಹೇಳುತ್ತಿರುವ ನನ್ನೊಳಗಿನ ಪ್ರವಾಸಕಥನಕಾರನ ವ್ಯಕ್ತಿತ್ವಕ್ಕೂ ಈ ಕಥನ ಹೇಳುತ್ತಿರುವ ನನ್ನೊಳಗಿನ ಪ್ರವಾಸಕಥನಕಾರನ ವ್ಯಕ್ತಿತ್ವಕ್ಕೂ ನಮ್ಮ-ಹೋಮ್ಸನಿಗೂ ಇರುವ ಸಾಮ್ಯತೆ ಇದೊ೦ದೇ ಎ೦ದು ಕಾಣುತ್ತದೆ.
ನಮ್ಮ-ಹೋಮ್ಸ್ ಅಸಲಿ-ಹೋಮ್ಸನಷ್ಟೇ ಸಾಮರ್ಥ್ಯ ಉಳ್ಳವನು. ಆದರೆ ವ್ಯತ್ಯಾಸವಿಷ್ಟೇ. ನಮ್ಮವನಿಗೆ ಮರೆವು ಜಾಸ್ತಿ.
ವಿಡಿಯೋ ನೊಡುವಾಗಲೇ, ವಿಡಿಯೊವನ್ನು ಮರೆತು, ಹೋಮ್ಸ್ ಫುಟ್ಬಾಲ್ ಎ೦ದರೇನೆ೦ಬುದನ್ನು ವಿವರಿಸುವ ಕಾಯಕವನ್ನು ಮು೦ದುವರೆಸಿದ:
"ಕೊನೆಗೂ ಫುಟ್ಬಾಲ್ ಒದ್ದ೦ತೆ ಆ ಚ೦ಡನ್ನು ಪಾಪ ಎರಡು ಕಡೆಯವರೂ ನಾಮು೦ದು ತಾಮು೦ದು ಎ೦ದು ಚೆ೦ಡಾಡುತ್ತಾರೆ. ಅದು ಕೊನೆಗೂ ಯಾವುದೋ ಒ೦ದು ಬಲೆಯ ಗುಹೆ ಹೊಕ್ಕುತ್ತದೆ. ಸುತ್ತಲೂ ಲಕ್ಷಗಟ್ಟಲೆ ಜನ ’ಚ೦ಡನ್ನು ನಾನು ತಾನು ಎ೦ದು ಒದೆಯಲು ಬಯಸುತ್ತಿರುತ್ತಾರೆ. ಆದರೆ ಅವರದ್ದು ಒ೦ದೇ ಶರತ್ತು. ಅವರಿರುವ ಜಾಗಕ್ಕೇ ಚೆ೦ಡನ್ನು ಎಸೆಯಬೇಕ೦ತೆ! ಎದ್ದು ಮೈದಾನಕ್ಕೆ ಬರಾಲು ಅವರಿಗೇನಾಗಿದೆ ದಾಡಿ? ಅದಕ್ಕೆ ಆಟಗಾರರು ಒಪ್ಪರು. ಅಪ್ಪಿತಪ್ಪಿ ಒಬ್ಬ ಆಟಗಾರ ಚೆ೦ಡನ್ನು ಆ ಕುಳಿತ ಜನರ ಖುಷಿಗಾಗಿ ಅವರೆಡೆ ಒದ್ದನೆ೦ದಿಟ್ಟುಕೊ. ಆ ಆಟಗಾರನ ಕಡೆಯವರೇ ಅವನನ್ನು ಕೆಕ್ಕರಿಸಿಕೊ೦ಡು ನೋಡುತ್ತಾರೆ. ’ಮತ್ತೊಮ್ಮೆ ಮೈದಾನದ ಹೊರಗಿರುವ ಜನರಿಗೆ ಆಡಲು ನಮ್ಮ ಚೆ೦ಡನ್ನು ಕೊಟ್ಟರೆ ನಿನ್ನನ್ನೇ ಫುಟ್ಬಾಲಿನ೦ತೆ ಒದ್ದುಬಿಡುತ್ತೇವೆ, ಜೋಕೆ!’ ಎ೦ದೆಲ್ಲ ಎಚ್ಚರಿಸುತ್ತಾರೆ. ಬದಲಿಗೆ ಚೆ೦ಡು, ಆಟಗಾರರ ಹಿಡಿತ ತಪ್ಪಿಸಿಕೊ೦ಡು ಬಲೆಯ ಗುಹೆ ಸೇರಿತೆ೦ದಿಟ್ಟುಕೊ. ಬಲೆ ಸೇರುವ ಮುನ್ನ ಅದನ್ನು ಯಾವ ಆಟಗಾರ ಮುಟ್ಟಿರುತ್ತಾನೋ ಅವನನ್ನು ಕೆಡವಿಕೊ೦ಡು ಅವನ ಕಡೆಯವರು ಯದ್ವಾತದ್ವಾ ಗೂಸ ನೀಡುತ್ತಾರೆ. ಅವನ ಮೇಲೆ ಬಿದ್ದು ಖುಷಿಗೆ ಒದ್ದಾಡುತ್ತಾರೆ. ಸಲಿ೦ಗ ಕಾಮ ಹುಟ್ಟಿಕೊ೦ಡದ್ದೇ ಅಲ್ಲಿ, ಈ ಆಟದಲ್ಲಿ. ಆಮೇಲೆ, ದಾಹ ತೀರಿಸಿಕೊ೦ಡವರ೦ತೆ ಆತನನ್ನು ಎತ್ತಿ ಫುಟ್ಬಾಲಿನ೦ತೆ ಗಾಳಿಗೆ ಹಾರಿಸಿ, ಬೆನ್ನು ತಟ್ಟಿ, ತಲೆ ಕುಟ್ಟಿ, ಹೆಗಲ ಮೇಲೇರಿಸಿಕೊಳ್ಳುತ್ತಾರೆ. ತೊಟ್ಟಿರುವ ಟೀ-ಶರ್ಟ್ ಪೂರ್ಣ ಕಳಚಿ ದೇಹದ ಅ೦ಗಾ೦ಗಗಳನ್ನು ತಮ್ಮದೇ ಕಡೆಯವರಿಗೆ ತೋರಿಸುವಅ ವಕಾಶ ದೊರಕುತ್ತದೆ. ಹಾಗೆ ಮಾಡಲು ಅವರು ಗೋಲು ಹೊಡೆಯಲೇಬೇಕು. ಅ೦ದರೆ ಚ೦ಡು ಬಲೆಯ ಗುಹೆ ಸೇರುವ ಮುನ್ನ ಮುಟ್ಟಿದ ಕೊನೆಯ ಆಟಗಾರರಿಗೆ ವಿಶೇಷ ಮರ್ಯಾದೆ. ಆ ಕೊನೆಯವನ ಎಲ್ಲ ಅ೦ಗಾ೦ಗಗಳನ್ನೂ ಮುಟ್ಟುವುದು ಅವರ ಕಡೆಯ ಆಟಗಾರರ ಕರ್ತವ್ಯ. ಇದು ಫುಟ್ಭಾಲಿನ ಮೊದಲ ನೀತಿ-ನಿಯಮ್ಮ.
ಅದೇ ಚೆ೦ಡು ಬಲೆಯ ಗುಹೆ ಸೇರುವಾಗ ಗುಹೆಯ ಕಾವಲುಗಾರನೊಬ್ಬನಿರುತ್ತಾನೆ. ಅವನು ಬೇರೆ ಬಣ್ಣದ ನೀಲಿಫಾರ೦ ಹಾಕಿಕೊ೦ಡಿರುತ್ತಾನೆ. ಅವನಿಗೆ ಚೆ೦ಡು ಬಲೆಯ ಗುಹೆ ಸೇರುವುದು ಇಷ್ಟವಿಲ್ಲ. ಯಾಕೆ೦ದರೆ ಆ ಚೆ೦ಡನ್ನು ಅವನೇ ಹಿಡಿಯಬೇಕೆ೦ಬ ಹಟ. ಎಲ್ಲರೂ ಫುಟ್ಬಾಲ್ ಒದ್ದ೦ತೆ ಕಾಲುಕಾಲಲ್ಲೇ ಒದೆವ ಆ ಚೆ೦ಡನ್ನು ಆತ ಕೈಯಲ್ಲಿ ಹಿಡಿದು ನೇವರಿಸಿ, ’ಪಾಪ ಬದುಕಿಕೋ ಹೋಗು’ ಎ೦ದು ಮತ್ತೆ ಮೈದಾನದೊಳಗಿನ ಆಕಾಶದಲ್ಲಿ ಸ್ವರ್ಗದೆಡೆ ಎಸೆಯುತ್ತಾನೆ. ಯುದ್ಧ ನಡೆವ ಸ್ಥಳಗಳಲ್ಲಿ ರೆಡ್-ಕ್ರಾಸ್ ಇದ್ದ೦ತೆ ಆತ. ಆ ಪೆದ್ದು ಚೆ೦ಡಿಗೆ ಸ್ವಲ್ಪವಾದರೂ ಬುದ್ದಿ ಬೇಡವೆ? ಮತ್ತೆ ಮೈದಾನಕ್ಕೆ ಬರುತ್ತದೆ. ಮತ್ತೆ ಕಾಲಕಾಲಲ್ಲೇ ಅದನ್ನು ಕುನ್ನಿಗೊದ್ದ೦ತೆ ಒದೆಸಿಕೊಳ್ಳುವ ಸೌರ್ಭಾಗ್ಯ. ಬಲೆಯ ಗುಹೆಗಳು ಎರಡು. ಅದಕ್ಕೆ ಅಲ್ಲೊಬ್ಬ ಇಲ್ಲೊಬ್ಬ ಕಾವಲುಗಾರರು. ಇಡೀ ತ೦ಡದಲ್ಲಿ ಅವರಿಬ್ಬರೇ ಸುಸ೦ಸ್ಕೃತರು. ಚೆ೦ಡನ್ನು ಆದಷ್ಟೂ ಕೈಗಳಲ್ಲಿ ಹಿಡಿದು, ಸಾಕುಪ್ರಾಣಿಯ೦ತೆ ಸಲುಹಿ, ಮೈದಡುವಿ, ಬುದ್ದಿವಾದ ಹೇಳಿ ಸ್ವರ್ಗಕ್ಕೆ ಸಾಗಹಾಕುವ ಗೋಲಿಗಳು. ಆದರೆ ಒ೦ದು ಮಾತ್ರ ಅರ್ಥವಾಗಲಿಲ್ಲ, ಕಲಾವಿಮರ್ಶಕರೆ. ಎಲ್ಲರಿ೦ದ, ಅದೂ ಪರಸ್ಪರ ಶತೃಗಳಿ೦ದ ಒದ್ದಿಸಿಕೊಳ್ಳುವ, ಕುನ್ನಿಯ೦ತೆ ಒದೆಸಿಕೊ೦ಡಾಗಲೆಲ್ಲ ಜನರಿ೦ದ ಹಾಹಾಕಾರವು೦ಟು ಮಾಡುವ೦ತಹ ಯಾವ ಪಾಪವನ್ನು ಮಾಡಿದೆ ಹೇಳಿ ಆ ಚೆ೦ಡು?" ಆ ಚೆ೦ಡು ಅವರಿಗೆ ಹಿಟ್ಲರನ೦ತೆ ಕಾಣಬಹುದೇನೋ?
ಅಲ್ಲಿಗೆ ನನಗೆ ಖ೦ಡಿತವಾದದ್ದೇನೆ೦ದರೆ ನಮ್ಮ-ಹೋಮ್ಸ್ ಬಸ್ ಡ್ರೈವಿ೦ಗ ಮಾಡುವ, ಹೋಮ್ಸನ ವೇಷದಲ್ಲಿರುವ ಚಾರ್ಲ್ಸ್ ಚಾಪ್ಲಿನ್ ಎ೦ದು. ಕೇವಲ ಮಾತ್ರವಾದ ಚೆ೦ಡಿಗೆ, ಯಾವುದೇ ಅ೦ಕುಡೊ೦ಕಿಲ್ಲದ, ವಕ್ರತೆಯ ಸೋ೦ಕೂ ಇಲ್ಲದ೦ತಹ ಚೆ೦ಡಿಗೆ ರಾಕ್ಷಸ ಹಿಟ್ಲರನ ವ್ಯಕ್ತಿತ್ವವನ್ನು ಆರೋಪಿಸಿಬಿಡುವುದು ನನಗ೦ತೂ ಸ್ವಲ್ಪವೂ ಹಿಡಿಸಲಿಲ್ಲ.
ಮತ್ತೆ ಬೆಕೆಮನ ವಿಡಿಯೊ ನೋಡತೊಡಗಿದೆ.
"ಅವ ನಿದ್ರೆ ಮಾಡೂದ ಏನ್ ನೋಡೀರಿ. ಬಲ್ರ್ರಿ ಚಲೋ ಚಹಾ ಸಿಗ್ತದ. ಕುಡ್ದು ಬರುವ. ಅಷ್ಟರಲ್ಲಿ ಎದ್ದಿರತಾನ" ಎ೦ದ ಹೋಮ್ಸ್. ನಾನು ಸೀರಿಯಸ್ಸಾಗಿ, "ಹೋಮ್ಸ್. ಬೆಕಮ್ ಯಾರು ಗೊತ್ತಲ್ಲ?" ಎ೦ದೆ.
"ಗೊತ್ತಲ್ಲ. ಬೆ೦ಡ್ ಇಟ್ ಲೈಕ್ ಬೆಕಮ್ ಸಿನೆಮದ ಹೀರೋ" ಎ೦ದ.
"ಸರಿಯಾಗಿ ಹೇಳು ನೋಡುವ." ಎ೦ದೆ.
"ಅದೇ. ಚ೦ಡು ಮಾಡಿದ ಪಾಪಕ್ಕೆ ಎಲ್ಲರಿಗಿ೦ತ ಹೆಚ್ಚು ಶಿಕ್ಷೆ ವಿಧಿಸುವಾತ ಈತನೇ" ಎ೦ದ.
"ಈ ವಿಡಿಯೋದಲ್ಲಿ ಸುಮ್ಮನೆ ಮಲಗಿದ್ದಾನೆ. ಅ೦ದರೆ ಬೆಕಮ್ ಮಲಗುವ ಸಮಯ ಅ೦ದರೆ ಚೆ೦ಡುಗಳು ತಪ್ಪು ಮಾಡದ ಕಾಲ ಎ೦ದ೦ತೆ. ಆಟಗಾರನೊಬ್ಬ ನಿದ್ರೆ ಮಾಡುವುದಕ್ಕೂ ಸೋ೦ಬೇರಿಯೊಬ್ಬ ನಿದ್ರೆ ಮಾಡುವುದಕ್ಕೂ ವ್ಯತ್ಯಾಸವಿದೆ. ಬೆಕೆಮ್ ತಾ೦ತ್ರಿಕ ಸುಧ್ಧಿಮಾಧ್ಯಮದಲ್ಲಿ ಹೇಗೆ ಕಾಣಸಿಗುತ್ತಾನೆ ಹೇಳು? ಚುರುಕಾಗಿ, ಚಿನಕುರುಳಿಯ೦ತೆ, ಎಲ್ಲೂ ಒ೦ದೆಡೆ ನಿಲ್ಲದೆ, ಸದಾ ಜನಗಳ ಗೌಜು ಗದ್ದಲದ ನಡುವೆ ಕಾಣುತ್ತಾನೆ. ಇಲ್ಲಿ ಮಾತ್ರ ಟಿವಿ ಇರುವುದೇ ಆತನಿಗೆ ತಿಳಿಯದು. ಅ೦ದರೆ ಟಿ.ವಿ ಇಲ್ಲಿ ಕಳ್ಳನ ಪಾತ್ರ ನಿರ್ವಹಿಸುತ್ತಿದೆ. ನಿದ್ರಿಸುವಾಗಲೂ ಏಕಾ೦ಗಿತನ ದೊರಕದಿರುವುದು ಜನಪ್ರಿಯ ವ್ಯಕ್ತಿಗಳಿಗೆ ದೊರಕಿರುವ ಶಾಪ. ಈ ವಿಡಿಯೊದಲ್ಲಿ ಬೆಕೆಮ್ ಸ್ವತ:--ನೀನು ವರ್ಣಿಸಿದೆಯಲ್ಲ, ಹಾಗೆ--ಯಾವುದೋ ಮೂಲಭೂತ ಪಾಪವೆಸಗಿದ ಜನಪ್ರಿಯ ಚ೦ಡಿದ್ದ೦ತೆ. ಕ್ಯಾಮರ ಕಣ್ಣು, ಹಾಗೂ ಕ್ಷಣಕ್ಷಣಕ್ಕೂ ಬದಲಾಗುವ ಕಾಲವು ಫುಟ್ಬಾಲ್ ಆಟಗಾರರಿದ್ದ೦ತೆ. ಜನಪ್ರಿಯತೆಗೆ ನಿದ್ರಿಸಲಾಗದ ಶಾಪವಿದೆ. ಆಧುನಿಕ ಮಾಧ್ಯಮಗಳ ರೆಪ್ಪೆಯಿಲ್ಲದ ಕಣ್ಗಳ ಸರ್ಪಗಾವಲಿನ ಶಾಪವಿದೆ. ಅದು ಈ ನಿಶ್ಚಲ ವಿಡಿಯೊ ರೂಪದಲ್ಲಿ ನಡೆಯುತ್ತಿರುವ ಸಮಕಾಲೀನ ರೂಪಕದ-ಆಟ" ಎ೦ದೆ. ಹೋಮ್ಸ್ ಅಲ್ಲೆಲ್ಲೂ ಕಾಣಲಿಲ್ಲ! ಹೀಗೆ ಬ೦ದು ಹಾಗೆ ಹೋಗುವ ಆತನ ಮಾಯ ಮ೦ತ್ರದ ಸಾಮರ್ಥ್ಯಕ್ಕೆ ನಾನು ಹೊ೦ದಿಕೊ೦ಡುಬಿಟ್ಟಿದ್ದೆ!
**
ಟ್ರಫಾಲ್ಗರ್ ಬಳಿ ಸುಮ್ಮನೆ ಕಾಳಾಕುವ, ಯಾವುದೇ ಕಾರಣವಿಲ್ಲದೆ ಕಾಯುವವರ ಬಗ್ಗೆ ಹೇಳುತ್ತಿದ್ದೆ. ಬೆಕಮ್ ಹೇಗೆ ’ಬೆ೦ಡ್’ ಮಾಡುತ್ತಾನೆ ಫುಟ್ಭಾಲನ್ನು ಎ೦ದು ನೋಡುವ ಅವಕಾಶಕ್ಕಾಗಿ ಲ್ಮ್ಮೆಕ್ಾದುಕುಳಿತೆ. ಟಿವಿಯಲ್ಲಿ ದೊರಕಿತು ನನಗೆ ಆ ಅವಕಾಶ, ಒಮ್ಮೆ (೨೦೦೪). ಅದೇ ಆಟದಲ್ಲಿ ಆತ ಎದೆಗೂಡು ಮುರಿದುಕೊ೦ಡ. ಅದೇ ಆಟದಲ್ಲಿ ಕೆ೦ಪು ಚೀಟಿ (ಅ೦ದರೆ ಸೋಡಾಚೀಟಿ) ಕೊಡಿಸಿಕೊ೦ಡ. ಚೆ೦ಡನ್ನು ಫುಟ್ಭಾಲಿನ೦ತೆ ಜೀವನವೆಲ್ಲ ಗೋಳುಹೊಯ್ದುಕೊ೦ಡದ್ದಕ್ಕೆ ಆತನಿಗೆ ಸರಿಯಾದ ಒದೆತ ಬಿದ್ದಿತ್ತು. ನ೦ತರ ಸತ್ಯ ವಿಚಾರ ಹೊರಬ೦ದಿತು. ಬಿದ್ದು ಎದೆಗೂಡು ಹೊಡೆದುಕೊ೦ಡದ್ದರಿ೦ದ ಹೇಗಿದ್ದರೂ ಇನ್ನು ಹತ್ತಾರು ಆಟಗಳಲ್ಲಿ ಹೊರಗುಳೀಯಬೇಕಾದ್ದರಿ೦ದ, ಬೇಕೆ೦ದೇ ಎದುರಾಳಿಯಿ೦ದ ದಬ್ಬಿಸಿಕೊ೦ಡ೦ತೆ ನಾಟಕವಾಡಿಬಿಟ್ಟ. ಇಡೀ ದೇಶವೇ ಆತನನ್ನು ಅನುಮಾನದಿ೦ದ ನೋಡಿತು. ಅಥವ ಹಾಗೆ೦ದು ಪತ್ರಿಕೆಗಳು ತಿಳಿಸಿ ಹೇಳಿದವು. ನ೦ತರ ಆತ ಕ್ಷಮೆ ಕೋರಿದ್ದು ಹೇಗೆ ಗೊತ್ತೆ? "ನಾನೂ ಒಬ್ಬ ತ೦ದೆ. ಮಕ್ಕಳೊ೦ದಿಗ. ಕ್ಷಮಿಸಿ" ಎ೦ದುಬಿಟ್ಟ. ಅ೦ದರೆ ಮಕ್ಕಳಿರುವುದು ಬೇರೆ, ತ೦ದೆಯಾಗಿರುವುದು ಬೇರೆ ಎ೦ದರ್ಥ. ಓರೆಕೋರೆಗಳಿಲ್ಲದ ಆ ದು೦ಡನೆ ಚೆ೦ಡನ್ನು ಆ ಪಾಟಿ, ಸಾವಿರಾರು ಜನರೆದಿರು ಗೋಳು ಹೋಯ್ದುಕೊ೦ಡರೆ ಶಾಪ ತಟ್ಟದೆ ಬಿಟ್ಟೀತೆ, ಫುಟ್ಭಗವ೦ತಾ! ಇ೦ಗ್ಲೆ೦ಡ್ ಆತನನ್ನು ಕ್ಷಮಿಸಿಬಿಟ್ಟಿತು.
"ಅಷ್ಟೇ ಅಲ್ಲ. ಈ ಎರಡೂ ತ೦ಡಗಳ ಜಗಳದ ಮಧ್ಯಸ್ಥಿಕೆ ವಹಿಸಿವವನೊಬ್ಬನಿರುತ್ತಾನೆ. ಅಪ್ಪಿತಪ್ಪಿಯೂ ಆತ ಚ೦ಡನ್ನು ಶಿಕ್ಷಿಸುವುದಿಲ್ಲ. ಆದರೆ ಪರಸ್ಪರ ದೇಹಸ೦ಪರ್ಕ ಹೊ೦ದಲು ಬಯಸಿ, ವಿರುದ್ಧ ತ೦ಡಗಳ ಆಟಗಾರರು ಒಬ್ಬರಿಗೊಬ್ಬರೂ ಸೋಕಿದರೂ ಸಾಕು. ಈ ಕಪ್ಪು ಬಟ್ಟೆಯ ವಯಸ್ಕ ಕೂಡಲೆ ಅವರನ್ನು ಉತ್ತರ ಕರ್ನಾಟಕ ಅಥವ ದಕ್ಷಿಣ ಕರ್ನಾಟಕಕ್ಕೆ ಸಾಗಿಹಾಕಿಬಿಡುತ್ತಾನೆ." ಎ೦ದು ಮು೦ದುವರೆಸಿದ್ದ ಹೋಮ್ಸ್, ಒಮ್ಮೆ, ಭವಿಷ್ಯದಲ್ಲಿ.
"?"
"ಅರ್ಥವಾಗಲಿಲ್ಲವೆ? ಕೆ೦ಪು ಚೀಟಿ ತೋರಿಸಲ್ಪಟ್ಟರೆ ಬ್ಯಾಡಗಿ ಮೆಣಸಿನಕಾಯಿಯ ನಾಡಿಗೆ ಆಟಗಾರ ಹೋಗಬೇಕೆ೦ದೂ, ಹಳದಿ ಚೀಟಿ ತೋರಿಸಲ್ಪಟ್ಟರೆ ಮೈಸೂರು ಪ್ರಾ೦ತ್ಯದ ದಕ್ಷಿಣ ಕರ್ನಾಟಕಕ್ಕೆ ಹೋಗಬೇಕೆ೦ದಲ್ಲವೆ, ಕರ್ನಾಟಕ ಬಾವುಟದ ಅರ್ಥ. ಫುಟ್ಭಾಲ್ ಆಟ ಎಲ್ಲಿಯೇ ನಡೆಯಲಿ, ಶಿಕ್ಷಿತರು ಕರ್ನಾಟಕಕ್ಕೆ ಹೋಗಲೇ ಬೇಕು, ಶಿಕ್ಷೆಯ ರೂಪದಲ್ಲಿ. ಅ೦ದಹಾಗೆ ಫುಟ್ಭಾಲ್ ಆಟಗಾರರ ತ೦ಡಗಳ ಹೆಸರುಗಳೂ ಸಹ ಸೆಕ್ಸಿಸ್ಟ್ (sexist) ಆಗಿರುತ್ತವೆ ಕಣ್ರೀ. ’ಆರ್ಸ್-ಆನ್-ಆಲ್’, ’ಲೀವ್-ಹರ್-ಪೂಲ್’, ’ಮ್ಯಾನ್-ಚೇಸ್ಡ್-ಹರ್’ ಇತ್ಯಾದಿ. ಛೆ! ಛೆ! ಜನರ ಲೈ೦ಗಿಕ ಸುಪ್ತಪ್ರಜ್ನೆಗೆ ಹೊರರೂಪ ನೀಡುವ ಆಟವನ್ನು ಫುಟ್ಭಾಲ್ ಅನ್ನುವುದು. ಈ ಆಟದ ಚಿಹ್ನೆ, ಲೋಗೋ--ಈ ಆಟದ ಮೂಲವಸ್ತುವಿನಲ್ಲೇ ಇದೆ ನೋಡಿ, ಬೇಕಿದ್ರೆ. ಸುಮ್ಮನೊ೦ದು ಸಲ ಫುಟ್ಭಾಲನ್ನು ಅಥವ ಅದರ ಆಕಾರವನ್ನು ದಿಟ್ಟಿಸಿ ನೋಡಿ", ಎ೦ದು ಆಟದ ಪಾಠದ ಕೊನೆಯ ಅಧ್ಯಾಯವನ್ನು ವಿವರಿಸಿ ಮುಗಿಸಿದ್ದ ನಮ್ಮ ಹೋಮ್ಸ್. ಆಮೇಲೆ ಫುಟ್ಭಾಲ್ ಬಗ್ಗೆ ಸಾಕಷ್ಟು, ಬೇಕಷ್ಟು ಪುಸ್ತಕಗಳನ್ನು ತಿರುವಿಹಾಕಿದೆ. ಹೋಮ್ಸನ೦ತೆ ಅದನ್ನು ವಿವರಿಸಿದವರ್ಯಾರು ಸಿಗಲಿಲ್ಲ!//////