ಏಕೆ ಹೀಗೆ ಮಾಡಿದೆ ನೀನು?

ಏಕೆ ಹೀಗೆ ಮಾಡಿದೆ ನೀನು, ಗೆಳೆಯ,

ಅದೇಕೆ ಹೀಗೆ ಮಾಡಿದೆ ನೀನು ||ಪ||

ಬದುಕಿನ ಒಂದೊಂದೂ ಹೆಜ್ಜೆಗೂನು,

ಜೊತೆಗಿರುವೆನೆಂದು ಮಾಡಿದ ಆಣೆಯ,

ಏಕೆ ಮರೆತೆಯೋ, ಗೆಳೆಯ,

ಅದೇಕೆ ಮರೆತೆಯೋ ||೧||

ಏಕೆ ಹೀಗೆ ಮಾಡಿದೆ ನೀನು, ಗೆಳೆಯ,

ಇದ್ದಕ್ಕಿದ್ದಂತೆ ಎದ್ದು ಹೊರಟೆ,

ಹೇಳೆದೇ ಕೇಳದೇ ಕೈ ಬಿಟ್ಟು ಹೋದೆ,

ಏಕೇ ಹೋದೆಯೋ, ಗೆಳೆಯ,

ಅದೇಕೇ ಹೋದೆಯೋ ||೨||

ಏಕೆ ಹೀಗೆ ಮಾಡಿದೆ ನೀನು, ಗೆಳೆಯ,

ನನ್ನ-ನಿನ್ನ ಮಕ್ಕಳನ್ನು ಮುದ್ದು ಮಾಡಿ,

ಬೆಳೆಸಿ ನಿಲಿಸುವ, ಗುರುತರ ಹೊಣೆಯ,

ಹೊರಿಸಿ ಹೋದೆಯೋ, ಗೆಳೆಯ,

ಅದೇಕೆ ಹೋದೆಯೋ ||೩||

ಏಕೆ ಹೀಗೆ ಮಾಡಿದೆ ನೀನು, ಗೆಳೆಯ,

ಜಗ್ಗೆನು ಕುಗ್ಗೆನು, ಕುಸಿದರೆ ನಿನ್ನಾಣೆ,

ಮಕ್ಕಳ ಸಡಗರ ಕಾಣದೇ, ಹೋದ,

ನಿನ್ನದೇ ಚಿಂತೆಯೋ, ಗೆಳೆಯ,

ನಿನ್ನದೇ ಚಿಂತೆಯೋ ||೪||